ជាតិ
ជំនន់បីថ្ងៃនៅខេត្តព្រះសីហនុ ប៉ះពាល់ស្រូវជិត៩ពាន់ហិកតា និងត្រីជាង៣០ម៉ឺនក្បាល
×![]()
ដោយ: ឡាយ សុភាវតី
ភ្នំពេញ៖ គិតមកដល់ពេលនេះ មានស្រូវជិត៩ពាន់ហិកតា ហើយត្រីនិងក្ដាមចិញ្ចឹមប្រមាណ៣២ម៉ឺនក្បាល បានរងផលប៉ះពាល់ដោយសារជំនន់ទឹកភ្លៀង ដែលស្ថិតនៅក្នុងស្រុកចំនួនពីរ ក្នុងខេត្តព្រះសីហនុ កាលពីថ្ងៃទី៨ដល់១០សីហា ឆ្នាំ២០១៩។ 
លោក ផន ភិរុណ ប្រធានការិយាល័យសេដ្ឋកិច្ច និងសង្គមកិច្ច បានបញ្ជាក់ប្រាប់សារព័ត៌មានថ្មីៗតាមទូរសព្ទថា ស្រូវ និងត្រី ដែលរងផលប៉ះពាល់ទាំងនេះ ស្ថិតនៅក្នុងស្រុកព្រៃនប់ និងកំពង់សិលា ។
«ចំនួននៃការខូចខាតនេះ គឺមិនរងផលប៉ះពាល់ធ្ងន់ធ្ងរនោះទេ។ ហើយរបាយការណ៍សរុបនៃផលប៉ះពាល់ខេត្តក្នុងកំពុងបូកសរុប» ។ នេះបើតាមលោក ផន ភិរុណ ដែលបានបន្ថែមថា ផ្ទះពលរដ្ឋជិត១០០គ្រួសារ និងមាន់ ទាជាង៤០០ក្បាល ក៏រងផលប៉ះពាល់ដែរ ។
បើតាមលោក ផន ភិរុណ មន្ទីរកសិកម្មខេត្ត និងអាជ្ញាធរពាក់ព័ន្ធ បានត្រៀមស្រូវពូជសែនក្រអូប ដើម្បីជួយអន្តរាគមន៍ដល់ពលរដ្ឋ ក្រោយទឹកជំនន់ស្រកទៅវិញ។
ពាក់ព័ន្ធនឹងជំនន់ទឹកភ្លៀងនេះ លោក ឃៀង ភារម្យ អ្នកនាំពាក្យខេត្តព្រះសីហនុបានបញ្ជាក់សារព័ត៌មានថ្មីៗតាមទូរស័ព្ទនៅថ្ងៃទី១៣ សីហា ស្ថានភាពទឹកបានស្រកហើយ នៅឡើយតែតំបន់ទំនាបទាបប៉ុណ្ណោះ។« ប្រសិនបើស្ថានភាពទឹកភ្លៀងមិនមានការបន្តធ្លាក់ទៀត ខេត្តព្រះសីហនុនឹងស្រកទឹកអស់ទាំងស្រុង»។ នេះជាការបញ្ជាក់របស់លោក ភារម្យ៕
Tag:
ផលប៉ះពាល់
ទឹកជំនន់
© រក្សាសិទ្ធិដោយ thmeythmey.com
