កីឡាជាតិ
ជាតិ
វិសាខា មិនហ៊ានមើលរំលងគិរីវង់សុខសែនជ័យសម្រាប់ជំនួបនៅល្ងាចនេះឡើយ លោក ហុក សុចិត្រា (ស្តាំ)ចាប់ដៃជាមួយលោក ផាន ចាន់ផាត ពេលចាប់ឆ្នោតប្រកួតវគ្គ៨ក្រុមចុងក្រោយ
× ការទម្លាក់ណាហ្គាវើលពីសំណាក់ក្រុមគីរីវង់សុខសែនជ័យនៅវគ្គ១៦ក្រុមចុងក្រោយ បានធ្វើឲ្យវិសាខាមានក្តីបារម្ភ និងបង្កើនការប្រុងប្រយ័ត្នកាន់តែខ្លាំង។ វិសាខានឹងយកបទពិសោធនេះ ដើម្បីរៀបចំក្រុមក្នុងការតទល់ជាមួយគីរីវង់សុខសែនជ័យ នាជំនួបវគ្គ៨ក្រុមចុងក្រោយពានរង្វាន់សម្តេច ហ៊ុន សែន ថ្នាក់ជាតិនៅល្ងាចថ្ងៃពុធនេះ។ ខ្សែប្រយុទ្ធឆ្នើមរបស់វិសាខា កែវ សុខផេង ជឿជាក់ថា ការប្រកួតនឹងមានភាពតានតឹង និងជក់ចិត្តបំផុត ដ្បិតគីរីវង់សប្បូរកីឡាមានសមត្ថភាព និងមានឆន្ទៈខ្ពស់ក្នុងការប្រកួត។
លោក ហុក សុចិត្រា អ្នកចាត់ការទូទៅក្លិបបាល់ទាត់វិសាខាបាននិយាយថា ការធ្លាក់របស់ណាហ្គាវើលនៅវគ្គ១៦ក្រុមចុងក្រោយជាបទពិសោធមួយដ៏ល្អសម្រាប់វិសាខា ក្នុងការរៀបចំក្រុមឲ្យបានល្អ ដើម្បីតទល់ជាមួយគីរីវង់សុខសែនជ័យ នាជំនួបជើងទី១នៃពានរង្វាន់សម្តេច ហ៊ុន សែន នៅម៉ោង៦ល្ងាចថ្ងៃទី១៤ ខែសីហានេះ នាកីឡដ្ឋានវិសាខា។ លោកបន្តថា ការធ្លាក់របស់ណាហ្គា វាបានបង្កជាក្តីបារម្ភក៏ពិតមែន តែវាបានជួយបង្កើនឲ្យក្រុមវិសាខាមានការប្រុងប្រយ័ត្នកាន់តែខ្លាំង។
ជាមួយការអះអាងត្រៀមខ្លួនបានល្អ លោក ហុក សុចិត្រា បានលើកឡើងថា៖«សម្រាប់ពានរង្វាន់សម្តេច ហ៊ុន សែន យើងទទួលបានបទពិសោធពីណាហ្គាវើល គឺយើងនឹងរៀបចំក្រុមឲ្យបានល្អក្នុងការតទល់ជាមួយគីរីវង់។ យើងឃើញថា ការតាំងចិត្ត ការប្រឹងប្រែង ការប្តូរផ្តាច់ក្នុងការប្រកួតពី១ប្រកួតទៅ១ប្រកួតរបស់គីរីវង់ គឺធ្វើបានល្អមែនទែន ហើយមានការរីកចម្រើនច្រើន»។
លោបានបន្ថែមថា៖«វាជាគំរូដ៏ល្អសម្រាប់យើងក្នុងការត្រៀមខ្លួនឲ្យបានល្អ ដើម្បីប្រកួតជាមួយគីរីវង់ យើងមិនអាចធ្វេសប្រហែសបានទេដោយសារមានបទពិសោធរួចហើយសម្រាប់ណាហ្គាវើល ដែលបានរងបរាជ័យពេលគាត់លេងជាមួយគីរីវង់។ វាជាបទពិសោធមួយដ៏ល្អសម្រាប់យើងក្នុងការរៀបចំក្រុម រៀបចំខ្លួន ការតាំងចិត្ត និងប្រមូលអារម្មណ៍ប្រកួត ដើម្បីបានលទ្ធផលល្អ»។
សម្រាប់ខ្សែប្រយុទ្ធឆ្នើមវិសាខា កែវ សុខផេង គីរីវង់សុខសែនជ័យជាក្រុមមានសមត្ថភាពខ្លាំងមួយ ដែលមានកីឡាករពោរពេញដោយឆន្ទៈក្នុងការប្រកួត ដែលវិសាខាមិនអាចមើលស្រាល។ ការយល់ឃើញបែបនេះរបស់ សុខផេង ធ្វើឡើងក្រោយក្រុមមានមូលដ្ឋាននៅខេត្តតាកែវខាងលើ បានទម្លាក់ជើងខ្លាំងណាហ្គាវើលនៅវគ្គ១/៨ពានសម្តេច ហ៊ុន សែន។
ក្នុងបទសម្ភាសជាមួយអ្នកសារព័ត៌មានក្រោយវិសាខាយកឈ្នះកំពង់ចាម ២-០ នាជំនួបលីគកំពូល អតីតកីឡាករភ្នំពេញក្រោនរូបនេះបាននិយាយថា៖«គីរីវង់សុខសែនជ័យជាក្រុមខ្លាំងមួយ ពីព្រោះគាត់អាចយកឈ្នះណាហ្គាវើលទាំងក្នុងពានរង្វាន់សម្តេច ហ៊ុន សែន និងលីគកំពូល ដូច្នេះយើងមិនអាចមើលងាយគាត់បានទេ។ គាត់ជាក្រុមខ្លាំងមួយសម្រាប់យើង ដែលយើងត្រូវតែប្រុងប្រយ័ត្ន និងការពារពេលលេងជាមួយគាត់»៕
Tag:
បាល់ទាត់
ហុក សុចិត្រា
វិសាខា
ណាហ្គាវើល
© រក្សាសិទ្ធិដោយ thmeythmey.com