ទេសចរកូរ៉េ មកកម្ពុជាថយចុះ ២០ភាគរយ ក្នុងឆមាសទី១ឆ្នាំនេះ

ជាតិ

សេដ្ឋកិច្ច

ទេសចរកូរ៉េ មកកម្ពុជាថយចុះ ២០ភាគរយ ក្នុងឆមាសទី១ឆ្នាំនេះ

14, Aug 2019 , 9:19 pm

រូបភាព

ដោយ:

ភ្នំពេញ៖ លំហូរភ្ញៀវកូរ៉េខាងត្បូងមកកម្សាន្តកម្ពុជា ពីខែមករា ដល់ខែមិថុនាឆ្នាំ២០១៩ មានចំនួន ១៣,៩ ម៉ឺននាក់ ធ្លាក់ចុះ ២០ភាគរយ ធៀបនឹង ១៧,៤ម៉ឺននាក់ ក្នុងរយៈពេលដូចគ្នាឆ្នាំ២០១៨។ ទេសចរកូរ៉េ ឈរនៅលេខរៀងទី៥ បន្ទាប់ពីថៃ ឡាវ វៀតណាម និងចិន។

អត្ថបទទាក់ទង

ទេសចរឆមាសទី១៖ អន្តរជាតិមកកម្ពុជា ៣,៣លាននាក់, ខ្មែរចេញទៅក្រៅ ១លាននាក់

ហេតុអ្វី៦ខែដើមឆ្នាំនេះ ទេសចរនៅសៀមរាបធ្លាក់ចុះ? ស្តាប់លោករដ្ឋមន្ត្រីបកស្រាយ!

បើនិយាយពីតួលេខមួយឆ្នាំៗវិញ ភ្ញៀវកូរ៉េដែលបានកើនដល់ចំនួនជាង ៤០ម៉ឺននាក់ក្នុងមួយឆ្នាំនៅកម្ពុជា ក្នុងអំឡុងឆ្នាំ២០១២ បានធ្លាក់ទៅវិញក្នុងប៉ុន្មានឆ្នាំចុងក្រោយនេះ។ ក្នុងឆ្នាំ២០១៨កន្លងមក ភ្ញៀវកូរ៉េធ្លាក់ចុះ ១២ភាគរយ។ ហើយនៅឆមាសទី១ឆ្នាំនេះធ្លាក់ ២០ភាគរយ។

ការធ្លាក់ចុះទេសចរកូរ៉េនៅកម្ពុជា ត្រូវបានរដ្ឋមន្ត្រីក្រសួងទេសចរណ៍ លោក ថោង ខុន ប្រាប់ថាមកពីភ្ញៀវកូរ៉េងាកទៅប្រទេសវៀតណាម។ លោក ថោង ខុន បានថ្លែងក្នុងសិក្ខាសាលារៀបចំផែនការមេអភិវឌ្ឍន៍វិស័យទេសចរណ៍ខេត្តសៀមរាបកាលពីខែកក្កដា ដូច្នេះថា៖«ភ្ញៀវកូរ៉េធ្លាប់កើនដល់ ៣០ម៉ឺន ៤០ម៉ឺននាក់ ឥឡូវភ្ញៀវកូរ៉េនៅសល់តែជាង២០ម៉ឺន កូរ៉េបានប្ដូរទិសដៅទៅកាន់វៀតណាម»។ លោក ថោង ខុន បន្ថែមថា វៀតណាមមានគោលនយោបាយថ្មីសម្រាប់ទាក់ទាញលំហូរទេសចរ ដោយបើកចំហរឲ្យជនជាតិផ្សេងៗធ្វើមគ្គទេសក៏ នៅប្រទេសខ្លួនបាន ខណៈកម្ពុជាកំណត់ឲ្យតែជនជាតិខ្មែរទើបធ្វើមគ្គទេសក៏បាន។

ភ្ញៀវអឺរ៉ុប និងអាមេរិក បានធ្លាក់ចុះផងដែរក្នុងឆមាសទី១ឆ្នាំនេះ។ ដោយគិតជាទីផ្សាររួម មិនគិតប្រទេសនីមួយៗ ភ្ញៀវអឺរ៉ុបធ្លាក់ចុះជាង ៥ភាគរយ ហើយភ្ញៀវអាមរិកធ្លាក់ចុះជាង៥ភាគរយដូចគ្នានេះ។ តែក្រឡេកមើលទេសចរចិនវិញ គឺកើនឡើងជាង ៣៨ភាគរយ ដែលមានចំនួនដល់ ១,២៩លាននាក់ ឈរនៅលេខរៀងទី១៕