អន្តរជាតិ
ប្រជាជនកូរ៉េខាងត្បូងជួបជុំគ្នាទាមទារឲ្យជប៉ុនសុំទោសចំពោះបញ្ហាទាសភាពសម័យសង្គ្រាម
× នៅថ្ងៃទី១៤ ខែសីហា មានការជួបប្រជុំលើកទី ១៤០០ ទាមទារអោយជប៉ុនធ្វើការសុំទោសទៅជនរងគ្រោះ ដែលត្រូវបានគេរំលោភបំពានកាលពីសម័យសង្គ្រាម ខណៈពេលប្រទេសទាំងពីរកំពុងមានជម្លោះពាណិជ្ជកម្ម។
សិស្ស និងប្រជាពលរដ្ឋកូរ៉េខាងត្បូងប្រមាណជិតពីរម៉ឺននាក់ ជួបជុំគ្នានៅមុខអតីតស្ថានទូតរបស់ជប៉ុននៅកណ្តាលទីក្រុងសេអ៊ូល និងមានអ្នកតំណាងរាស្ត្រគណបក្សប្រជាធិបតេយ្យពីររូបនៅពេលរសៀលនេះ។
តាមការចុះផ្សាយរបស់ទីភ្នាក់ងារសារព័ត៌មាន Yonhap លោកស្រី Gil Won-ok ដែលជាស្ត្រីរងគ្រោះពីការរំលោភបំពាននៅក្នុងសម័យសង្គ្រាមបាននិយាយថា អរគុណសម្រាប់មកកម្មពិធីនេះ ពួកយើងនឹងប្រយុទ្ធរហូតទាល់តែយើងឈ្នះ។
ការជួបជុំនេះ ធ្វើឡើងចំថ្ងៃរំលឹកដល់ស្ត្រីទាំងឡាយត្រូវបានទាហានជប៉ុនរំលោភបំពានកាលសម័យជប៉ុនដាក់អាណានិគម។ ជនរងគ្រោះ ដែលត្រូវបានគេរំលោភបំពាន ត្រូវបានគេប៉ាន់ប្រមាណថាមានចំនួន ២០០០០០នាក់ ហើយភាគច្រើនគឺជាជនជាតិកូរ៉េ។
ការជួបជុំរបស់ប្រជាជនកូរ៉េខាងត្បូងនេះ គឺទាញចំណាប់អារម្មណ៍អ្នកសារព័ត៌មានយ៉ាងខ្លាំង ខណៈពេលដែលជម្លោះរវាងជប៉ុន និងកូរ៉េខាងត្បូងកំពុងតែកើនកម្លៅ ដោយសារតែជម្លោះពាណិជ្ជកម្ម ការដកភាគីទាំងពីចេញពីបញ្ជីដៃគូរពាណិជ្ជកម្ម ដែលអាចទុកចិត្តបាន និងការរឹតត្បិតនូវធាតុកម្ររបស់ជប៉ុនបីប្រភេទទៅកូរ៉េខាងត្បូង។
សូមបញ្ជាក់ថា ធ្វើពីធីបុណ្យរម្លឹកខួបដល់ស្ត្រីរងគ្រោះដោយសារអំពើទាសភាពគឺចាប់ផ្តើមតាំងពីឆ្នាំ១៩៩២ ដោយសកម្មជនក្នុងស្រុក និងស្ត្រីរងគ្រោះពីការរំលោភបំពានរបស់កងទ័ពជប៉ុនដែលទាមទារអោយជប៉ុនសុំទោសជនរងគ្រោះជាសាធារណៈ៕
Tag:
ជប៉ុន
កូរ៉េខាងត្បូង
© រក្សាសិទ្ធិដោយ thmeythmey.com