អន្តរជាតិ
បញ្ជូនប៉ូលិសប្រដាប់អាវុធទៅក្បែរហុងកុង, ប៉េកាំងកំពុងបំភ័យបាតុករ ឬចង់លេងមែនទែន?
រថយន្តរបស់ប៉ូលិសប្រដាប់អាវុធប្រជាជនចិន។ រូបភាព South China Morning Post
×![]()
ដោយ: តន ចាន់រិទ្ធារ៉ា
រថយន្តយោធារាប់រយគ្រឿង បានចតនៅមណ្ឌលកីឡាមួយកន្លែងក្នុងទីក្រុងស៊ិនជិន ជាប់ព្រំប្រទល់ជាមួយទឹកដីហុងកុង ជាទីដែលរងការរញ្ជួយញាប់ញ័រដោយសារបាតុករជាងពីរខែមកនេះ។ រថយន្តទាំងនោះមកពីកម្លាំងប៉ូលិសប្រដាប់អាវុធប្រជាជន (PAP) បានទៅដល់ស៊ិនជិនតាំងពីដើមសប្ដាហ៍មក ដើម្បីត្រៀមធ្វើសមយុទ្ធទ្រង់ទ្រាយធំ។ នេះបើតាមប្រព័ន្ធផ្សព្វផ្សាយរដ្ឋចិន។ តើប៉េកាំងប្រើយុទ្ធសាស្ត្របំភ័យ ឬចង់លេងមែនទែនដូច៣០ឆ្នាំមុន?
ស្ថានការណ៍នៅទីក្រុងហុងកុង នៅមិនទាន់ស្រាកស្រាន្តនៅឡើយ ចាប់តាំងពីការផ្ទុះការតវ៉ានៅដើមខែមិថុនាប្រឆាំងសេចក្ដីស្នើច្បាប់ធ្វើបត្យាប័នដ៏ចម្រូងចម្រាស។ ផ្ដើមពីរឿងនេះ ការតវ៉ាក៏រាលដាលកាន់តែធំឡើង ហើយប្រែទៅជាការទាមទារឲ្យមានកំណែទម្រង់ប្រជាធិបតេយ្យ ប្រឆាំងការលូកដៃជ្រៅរបស់រដ្ឋាភិបាលមជ្ឈិមនៅប៉េកាំងចូលកិច្ចការហុងកុង ដែលកន្លងមកអនុវត្តតាមគោលការណ៍ «ប្រទេសមួយ ប្រព័ន្ធពីរ» ។
ការធ្វើបាតុកម្មស្ទើររាល់ថ្ងៃក្នុងទីក្រុងហិរញ្ញវត្ថុមួយនេះ បានប៉ះពាល់យ៉ាងខ្លាំងដល់ការរស់នៅរបស់ប្រជាជន ពិសេសមុខមាត់របស់ហុងកុងជាមជ្ឈមណ្ឌលហិរញ្ញវត្ថុដ៏ធំមួយរបស់ពិភពលោក។ មេដឹកនាំហុងកុង ព្រមានជាច្រើនលើកថា បាតុករកំពុងរុញច្រានហុងកុងឲ្យដើរដល់ផ្លូវដែលមិនអាចបកក្រោយបាន បើមិនព្រមបញ្ឈប់ការតវ៉ាទេនោះ។ ប៉ុន្តែការទាមទារនៅតែមិនទាន់ទទួលបាន បាតុករវ័យក្មេងនៅហុងកុង នៅតែមិនទាន់ដកថយដដែល។
ប៉េកាំង ចង់បំភ័យបាតុករហុងកុង?
ស្របពេលដែលសភាពការណ៍តានតឹងជាលំដាប់ ចិនក៏ចល័តប៉ូលិសប្រដាប់អាវុធប្រជាជន (PAP) ទៅកាន់ទីក្រុងស៊ិនជិន ដែលជាប់ហុងកុង។ បើតាមវីដេអូដែលផ្សាយដោយប្រព័ន្ធផ្សព្វផ្សាយរដ្ឋចិន People’s Daily និង Global Times រថយន្តទាំងខ្សែៗ បានធ្វើដំណើរចូលទីក្រុងស៊ិនជិននៅដើមសប្ដាហ៍កន្លងទៅ។ ចំណែករូបភាពពីលើអាកាសដែលបញ្ចេញដោយ Maxar ក៏បង្ហាញពីវត្តមានរថយន្តដឹកនាំយោធារាប់រយគ្រឿងក្នុងពហុកីឡដ្ឋានមួយកន្លែង។
In video: Chinese armed police armored vehicle fleet is prepared for a drill in Shenzhen, S China's Guangdong province. pic.twitter.com/bU4IxhaM0s
— People's Daily, China (@PDChina) August 12, 2019
វត្តមានប៉ូលិសប្រដាប់អាវុធ បង្កឲ្យមានការបារម្ភថា ចិនអាចធ្វើអន្តរាគមន៍ដើម្បីបញ្ចប់បាតុកម្មនៅហុងកុង ដែលខ្លួនចោទថា មានសញ្ញាភេរវកម្មទៅហើយនោះ។ ប៉ុន្តែសារព័ត៌មានរដ្ឋចិនផ្សាយថា វត្តមានប៉ូលិសប្រដាប់អាវុធនៅស៊ិនជិន គឺដើម្បីចូលរួមសមយុទ្ធដែលបានគ្រោងទុកជាយូរមកហើយប៉ុណ្ណោះ។ មន្ត្រីអាមេរិកនិយាយថា ចំនួនប៉ូលិសប្រដាប់អាវុធនេះ មានខ្ទង់ពាន់នាក់ឯណោះ តែមិនទាន់មានសញ្ញាពីការចល័តទៅហុងកុងនៅឡើយទេ។
ការពង្រាយប៉ូលិសពិសេសច្រើននៅព្រំដែននេះ អាចជាយុទ្ធសាស្ត្ររបស់ប៉េកាំងក្នុងការបំភ័យបាតុករហុងកុងឲ្យបាក់ស្បាត ហើយបញ្ចប់ការតវ៉ារបស់ខ្លួនឲ្យបានលឿន។ ប៉េកាំង ពិតជាមិនពេញចិត្តឡើយនឹងទង្វើគឃ្លើនរបស់បាតុករនាពេលកន្លងមក ពិសេសការវាយប្រហារលើការិយាល័យតំណាងរដ្ឋាភិបាកមជ្ឈិម និងការលាបពណ៌ខ្មៅលើរូបសញ្ញាជាតិដែលតំណាងឲ្យចិនទាំងមូលនោះ។ បើប៉ូលិសប្រដាប់អាវុធចិនលូកដៃ ការតវ៉ា នឹងឆាប់ចប់មិនខាន។
ហុងកុងក្លាយជាធានអានមិនទីពីរ?
គ្រាន់ឃើញពីវត្តមានប៉ូលិសប្រដាប់អាវុធចិននៅជាប់ហុងកុង ដិតដាមព្រឹត្តិការណ៍ធានអានមិនឆ្នាំ១៩៨៩ ក៏វិលត្រឡប់មកវិញ។ សំណួរមួយក៏លេចឡើង តើហុងកុងនឹងក្លាយជាធានអានមិនទីពីរមែនទេ? រថក្រោះបើកជាន់បាតុករ ឈាមដាបពេញទីលាន មនុស្សស្លាប់គរជើងគ្នាដោយសារការបាញ់រះមិនរើសមុខរបស់កម្លាំងសន្តិសុខ។ នេះជារឿងរ៉ាវកាលពី៣០ឆ្នាំមុន ដែលបច្ចុប្បន្ន ជារឿងរសើបមួយរបស់បក្សកុម្មុយនីស្តចិន។
តើរដ្ឋអំណាចប៉េកាំងចង់់់ឲ្យរឿងបែបនេះកើតម្ដងទៀត? បើគ្រាន់តែចង់បញ្ចប់ការតវ៉ា វាចជារឿងងាយស្រួលមួយ ប៉ុន្តែផលវិបាករយៈពេលវែង ជាបញ្ហាប្រឈមមុខដែលប៉េកាំងត្រូវគិតគូរ មុននឹងអនុវត្តយុទ្ធសាស្ត្រដ៏គ្រោះថ្នាក់នេះ។ បើមានការបង្ក្រាបមែន មុខមាត់របស់ចិនដែលទទួលបានដោយលំបាក នឹងអសារបង់ទៅវិញ ចំណែកឯមុខមាត់ហុងកុងជាទីក្រុងហិរញ្ញវត្ថុ និងពាណិជ្ជកម្មអន្តរជាតិដ៏ធំ ក៏ត្រូវរលាយដែរ។ វិបត្តិសេដ្ឋកិច្ច នឹងកើតឡើងចំពោះតំបន់រដ្ឋបាលពិសេសមួយនេះ។
តើប៉េកាំងសុខចិត្តបោះបង់មុខមាត់ កេរ្តិ៍ឈ្មោះដើម្បីគ្រាន់តែបោសសម្អាតបាតុករឬ? សម្រាប់ស្ថាការណ៍សព្វថ្ងៃ វាមិនទាន់ដល់ដំណាក់កាលដែលចិនទ្រាំលែងបាននៅឡើយទេ។ ការសម្រេចចិត្តនៅស្ងៀម ហើយរិះគន់បាតុកម្ម ទំនងជាផ្លូវដើរដ៏ល្អសម្រាប់ប៉េកាំង ហើយឃ្លាំមើលសកម្មភាពីចម្ងាយ ដោយទុកឲ្យប៉ូលិសហុងកុង ជាអ្នកតទល់បាតុករជំនួសវិញ។ ម្យ៉ាងទៀត បាតុកម្ម ក៏មិនទាន់ទៅហួសពីបន្ទាត់ក្រហមដែរ។
ទោះមិនទាន់មានចំណាត់ការក្ដៅ ប៉េកាំងក៏ទំនងជាមិនទុកឲ្យវិបត្តិនៅហុងកុងអូសបន្លាយយូរដែរ។ នេះក៏ព្រោះតែនៅបាំងតែជាងមួយខែទៀតប៉ុណ្ណោះដល់ថ្ងៃបុណ្យជាតិទី៧០ របស់ចិនហើយ។ ថ្ងៃទី១ ខែតុលា ជាថ្ងៃកំណើតសាធារណរដ្ឋប្រជាមានិតចិន ដូចនេះប៉េកាំងពិតជាមិនចង់អបអរថ្ងៃពិសេសនេះ ដោយមានបញ្ហានៅហុងកុងឡើយ ព្រោះបង្ហាញថា បក្សកុម្មុយនីស្តមិនទាន់អាចបំពេញបំណងប្រជាជនចិនទាំងមូលនៅឡើយ៕
Tag:
ចិន
ហុងកុង
© រក្សាសិទ្ធិដោយ thmeythmey.com
