កីឡាអន្តរជាតិ
អន្តរជាតិ
អ្នកចាំទី Adrian ជាវីរបុរស ជួយ Liverpool ឈ្នះ Chelsea លើកពាន Super Cup
× លោក Jurgen Klopp រីករាយចំពោះការបង្ហាញខ្លួនដ៏អស្ចារ្យរបស់ Adrian បន្ទាប់ពីអ្នកចាំទីចំណូលថ្មីរូបនេះបានក្លាយជាវីរបុរសក្នុងការជួយ Liverpool លើកពាន UEFA Super Cup ឆ្នាំ២០១៩ និងជាលើកទី៤ក្នុងប្រវត្តិសាស្ត្រ ដោយយកឈ្នះ Chelsea តាមរយៈការទាត់បាល់កាត់សេចក្តីប៉េណាល់ទី ៥-៤។
Adrian ដែលទើបចូលរួមជាមួយហង្សក្រហមរដូវកាលនេះ ជាអ្នករារាំងការស៊ុតបាល់ប៉េណាល់ទីចុងក្រោយពីសំណាក់ Tammy Abraham ខ្សែប្រយុទ្ធ Chelsea ក្នុងចំណោមការស៊ុតសរុបទាំង៥លើកដូចគ្នា។ ក្រុមពីក្របខណ្ឌ Premier League ទាំងពីរនេះ បញ្ចប់ការប្រកួតទាំងម៉ោងផ្លូវការ និងបន្ថែម១៥នាទីពីរដងក្នុងលទ្ធផល ២-២ មុនឈានដល់ការទាត់បាល់កាត់សេចក្តី នាជំនួបក្នុងក្រុង Istanbul ប្រទេសតួកគី នារាត្រីថ្ងៃទី១៤ ខែសីហា។
អ្នកចាំទីសញ្ជាតិអេស្ប៉ាញដែលលោក Klopp ទិញពី West Ham United ដោយគ្មានតម្លៃផ្ទេរ ដើម្បីជំនួសតំណែងអ្នកចាំទី Simon Mignolet បានក្លាយជាជម្រើសដំបូងរបស់ Liverpool សម្រាប់ជំនួបដណ្តើមពាន Super Cup បន្ទាប់ពី អ្នកចាំទីឆ្នើម Alisson របួស។
អ្នកចាត់ការសញ្ជាតិអាល្លឺម៉ង់ពិតជារំភើបចិត្តជាមួយទម្រង់លេងដ៏អស្ចារ្យរបស់ Adrian សម្រាប់ជំនួបសំខាន់នេះ។
«Adrian ធ្វើបានល្អណាស់ ហើយគាត់ជាវីបុរស។ គាត់បានសង្គ្រោះបាល់ដ៏មិនគួរឲ្យជឿ ដូច្នេះខ្ញុំពិតជារីករាយសម្រាប់ការបង្ហាញខ្លួនរបស់គាត់»។ Klopp ប្រាប់ទូរទស្សន៍ BT Sport បែបនេះក្រោយចប់ការប្រកួត។
Liverpool ជាអ្នកតាមពីក្រោយការនាំមុខរបស់ Chelsea ដែលរកបានដោយខ្សែប្រយុទ្ធ Olivier Giroud នៅនាទី៣៦ មុនពេលខ្សែបម្រើ Sadio Mane ស៊ុតតាមស្មើវិញនៅនាទី៤៨ ហើយលទ្ធផល១-១ រក្សារហូតដល់ចប់ម៉ោងផ្លូវការ៩០នាទី។ ចូលដល់ម៉ោងបន្ថែម១៥នាទីដំបូង Mane បានសម្រេចគ្រាប់បាល់នាំមុខវិញនៅនាទី៩៥។ យ៉ាងណាការទាត់បាល់បញ្ចូលទីនៅនាទី ១០១ តាមរយៈការទាត់បាល់ពិន័យប៉េណាល់ទីរបស់ខ្សែបម្រើ Jorginho បានធ្វើឲ្យក្រុមរបស់លោក Frank Lampard និងលោក Klopp ឈានដល់ការទាត់បាល់កាត់សេចក្តីប៉េណាល់ទី ដោយ Liverpool ឈ្នះ Chelsea ៥-៤៕
Tag:
Super Cup
Adrian
Liverpool
© រក្សាសិទ្ធិដោយ thmeythmey.com