អន្តរជាតិ
លោក លី សៀនឡុង៖ សិង្ហបុរី ត្រូវដោះស្រាយបញ្ហាបម្រែបម្រួលអាកាសធាតុ បើមិនចង់ត្រូវទឹកលិច
នាយករដ្ឋមន្រ្តីសិង្ហបុរី លី សៀនឡុង
×![]()
ដោយ: ធៀន ភារិន្ទ
នាយករដ្ឋមន្ត្រីសិង្ហបុរី លី សៀនឡុងនៅថ្ងៃទី ១៥ ខែសីហា និយាយថា សុន្ទរកថារបស់លោកនាថ្ងៃទី១៨ ខែសីហា ក្នុងពិធីជួបជុំថ្នាក់ជាតិ(National Day Rally) នឹងលើកឡើងពីបម្រែបម្រួលអាកាសធាតុ និងរបៀបដែលសិង្ហបុរីទទួលខុសត្រូវលើបញ្ហាមួយនេះ។ 
បម្រែបម្រួលអាកាសធាតុ ពិសេសការឡើងកម្ដៅផែនដី ជាប្រធានបទសំខាន់ក្នុងសុន្ទរកថាប្រចាំ២០១៩ របស់នាយករដ្ឋមន្ត្រីសិង្ហបុរី លី សៀនឡុង ។ ដោយស្រង់របាយការណ៍តាមប្រព័ន្ធអនឡាញដែលផ្សាយដោយសារព័ត៌មាន BBC លោក លី បាននិយាយថា វាជាករណីអាក្រក់បំផុត ដែលកម្តៅនៅសិង្ហបុរីក្នុងខែកក្កដា នឹងកើនឡើងពី ២៧,៨អង្សា ដល់៣១,១ អង្សាក្នុងឆ្នាំ ២១០០ ខាងមុខ។
តាមរយៈការបង្ហោះនៅលើគណនី Facebook ផ្ទាល់ខ្លួន លោកនាយករដ្ឋមន្ត្រីនិយាយថា៖ «នេះគឺជាកម្រិតអាកាសធាតុជាមធ្យមប្រចាំខែ។ កម្រិតអតិប្បរមានៃសីតុណ្ហភាព គឺវាខ្ពស់ខ្លាំងណាស់។ ថ្ងៃនេះពួកយើងរងកម្តៅនៅពេលថ្ងៃដល់ ៣២អង្សា ឬរហូតដល់ ៣៤អង្សាឯណោះ។ ដូនេះរហូតដល់ឆ្នាំ ២១០០ វានឹងកើនដល់៣៧អង្សា»។
លោក លី សៀនឡុង បានបន្ថែមទៀតថា សិង្ហបុរីត្រូវតែយកចិត្តទុកដាក់លើបញ្ហានេះ ព្រោះជាប្រទេសដីទាប សិង្ហបុរីប្រឈមមុខខ្លាំងនឹងការលិចលង់នៅពេលកម្រិតទឹកសមុទ្រកើនឡើង។ ដូច្នេះហើយ លោកនឹងលើកយកបញ្ហានេះទៅនិយាយក្នុងសុន្ទរកថាប្រចាំឆ្នាំតែម្ដង។
ចំណែករដ្ឋមន្ត្រីធនធានទឹក និងបរិស្ថាន Masagos Zulkifli និយាយនៅវេទិកាដៃគូសម្រាប់បរិស្ថានក្នុងឆ្នាំ ២០១៩ ថា ការដោះស្រាយបញ្ហាអាកាសធាតុត្រូវតែជាបញ្ហាចំបង និងជាការគំរាមកំហែងគួរអោយបារម្ភសម្រាប់សិង្ហបុរី ។ សិង្ហបុរី ត្រូវតែចាប់ផ្តើមពីឥឡូវនេះ បើមិនចង់ជួបការគំរាមកំហែងដ៏ធំបំផុតទេនោះ៕
Tag:
សិង្ហបុរី
© រក្សាសិទ្ធិដោយ thmeythmey.com
