ដោយ៖ ងួន សុភាវត្តី
ដំរីអាស៊ីមួយក្បាលមានវ័យ ៧០ ឆ្នាំត្រូវបានគេដកចេញពីការដើរក្បួនដង្ហែព្រះពុទ្ធសាសនា នៅប្រទេសស្រីលង្កា បន្ទាប់ពីរូបថតសត្វដំរីមួយនេះ ត្រូវបានគេចែកចាយបន្តគ្នា និង បានបង្កឱ្យមានប្រតិកម្មខ្លាំងតាមបណ្តាញអ៊ិនធឺណិតផង។
ដំរីញីមួយក្បាល មានរាងកាយស្គមស្គាំងនៅសល់តែស្បែកដណ្តប់ឆ្អឹង ឈ្មោះថាTikiri ត្រូវបានគេរៀបចំដាក់ឲ្យដើរក្នុងក្បួនដង្ហែ Esala Perahera ដែលជាក្បួនព្យុហយាត្រា រយៈពេល ១០ ថ្ងៃនៅទីក្រុង Kandy ។
ពិធីបុណ្យនេះ គ្រប់គ្រងដោយព្រះវិហារ«Temple of the Tooth» ដែលជាព្រះវិហារគោរពបូជាព្រះពុទ្ធសាសនាខ្លាំងបំផុត នៅស្រីលង្កា។ ដំរី Tikiri ត្រូវបានគេដកពីក្បួនដង្ហែនេះ កាលពីថ្ងៃអង្គារ បន្ទាប់ពីមានការចែកចាយរូបភាពដំរីដ៏កម្សត់នេះ ពាសពេញបណ្តាញអ៊ិនធឺណិត។
រូបភាពពីរត្រូវបានគេបង្ហោះដោយរូបទីមួយបង្ហាញរូបរាងយ៉ាងស្រស់ស្អាត Tikiri ដែលគ្រងឈុតដ៏មានតម្លៃពេញរាងកាយ សម្រាប់ការដើរព្យុហយាត្រា ខណៈដែលរូបភាពមួយទៀត បង្ហាញពីរូបភាពដ៏ស្គមស្គាំងរបស់ដំរី ក្រោយដោះឈុតទាំងនោះចេញ។
ឆ្អឹងជំនីរ ឆ្អឹងត្រគាក និងឆ្អឹងខ្នង ដណ្តប់ដោយស្បែកយារធ្លាក់ របស់ Tikiri ត្រូវបានមើលឃើញយ៉ាងច្បាស់ នៅក្នុងរូបថតចុងក្រោយ ដែលត្រូវបានគេបង្ហោះនៅលើទំព័រហ្វេសប៊ុកស្ថាបនិកមូលនិធិសង្គ្រោះសត្វដំរី (Save Elephant Foundation) ។
« Tikiri ចូលរួមក្នុងការដង្ហែក្បួន តាំងពីរសៀលរហូតដល់យប់ជ្រៅ រៀងរាល់យប់រយៈពេល ១០ យប់ជាប់គ្នា ចំពេលមានសំឡេងផ្ទុះកាំជ្រួច និងផ្សែង។ គ្មាននរណាម្នាក់ បានឃើញរាងកាយរបស់នាង និងសភាពទន់ខ្សោយរបស់នាងទេ ដោយសារតែសម្លៀកបំពាក់របស់នាង។ គ្មាននរណាម្នាក់ឃើញទឹកភ្នែកនៅក្នុងភ្នែករបស់នាងទេ គ្មាននរណាម្នាក់ មើលឃើញការលំបាករបស់នាង ក្នុងការបោះជំហានទៅមុខ»។ អ្នកស្រី Sangdeaun Lek Chailert បានសរសេរដូច្នេះ។
លោកស្រី Chailert បានជំរុញឱ្យអ្នកតាមដាន ផ្ញើសារអេឡិចត្រូនិក ទៅកាន់នាយករដ្ឋមន្ត្រីស្រីលង្កា លោក Ranil Wickremesinghe ក្នុងក្តីសង្ឃឹមថា លោកនឹងអន្តរាគមន៍លើករណីដំរី Tikiriនេះ ។
លោកស្រី Chailert ក៏បានបង្ហោះសារមួយ នៅថ្ងៃច័ន្ទនេះថា៖« ថ្ងៃនេះ គឺជាទិវាដំរីពិភពលោក យើងមិនអាចនាំយកសន្តិភាពទៅឲ្យដំរីបានទេ ប្រសិនបើយើងនៅតែគិតថា រូបភាពនេះអាចទទួលយកបាន» ។
យ៉ាងណាក៏ដោយ លោក Pradeep Nilanga Dela ប្រធានផ្នែកថែរក្សាព្រះវិហារខាងលើ បានអះអាងថា ម្ចាស់របស់ Tikiri បានសម្រេចដកនាង ចេញការដើរក្បួនព្យុហយាត្រានេះ ដោយសារមានប្រតិកម្មខ្លាំងពីមហាជន។ ចំណែក Tikiri កំពុងត្រូវបានព្យាបាលហើយ។ នេះបើតាមការផ្សាយរបស់ទីភ្នាក់ងារព័ត៌មាន AFP។
ជុំវិញបញ្ហានេះម្ចាស់ដំរី Tikiri បាននិយាយថា ខ្លួនសម្រេចដាក់សត្វទាំងនោះ ទៅក្នុងក្បួនដង្ហែដោយហេតុផលសាសនា។ បុរសដែលមិនបញ្ចេញអត្តសញ្ញាណនោះ បាននិយាយថា Tikiri បានដើរក្បួនដង្ហែទាំងនេះ ចាប់តាំងពីនាងមានអាយុទើប ៥ ឆ្នាំមកម្ល៉េះ។
ប៉ុន្តែ Tikiri បានធ្លាក់ខ្លួនឈឺក្រពះ រយៈពេល ៦ ខែមកហើយ ហើយបុរសជាម្ចាស់បានអះអាងថា កន្លងមក លោកក៏បានចំណាយប្រាក់ចំនួន ៩,០០០ ដុល្លារ ដើម្បីចំណាយលើថ្នាំព្យាបាលជំងឺក្រពះរបស់ Tikiri ដែរ៕