ជាតិ
លោក គី វីរិន្ទ ឡើងជាប្រធានមន្ទីរសាធារណការខេត្តសៀមរាប ជំនួសលោក គឹម ប៉ុណ្ណា
× សៀមរាប៖ លោក គី វីរិន្ទ ឡើងជាប្រធានមន្ទីរសាធារណការ និងដឹកជញ្ជូនខេត្តសៀមរាបជំនួសលោក គឹម ប៉ុណ្ណា ដែលទទួលបានតួនាទីថ្មីនៅទីស្ដីការក្រសួងសាធារណការ។
ពិធីប្រកាសតែងតាំងប្រធានមន្ទីរសាធារណការថ្មីនេះ ត្រូវបានធ្វើឡើងនៅរសៀលថ្ងៃទី១៥ សីហា នៅសាលាខេត្តសៀមរាប ក្រោមវត្តមានរដ្ឋមន្ត្រីសាធារណការ លោក ស៊ុន ចាន់ថុល អភិបាលខេត្តសៀមរាប លោក ទៀ សីហា ព្រមទាំងថ្នាក់ដឹកនាំខេត្ត មន្ត្រីរាជការ សរុបប្រមាណ៣០០នាក់។
ក្នុងពិធីនោះ លោក គឹម ប៉ុណ្ណា អតីតប្រធានមន្ទីរ បានឡើងអានរបាយការណ៍ការងារសង្ខេបរបស់មន្ទីរ ដែលបានសម្រេចបានកន្លងមក និងបានលើកបញ្ហាប្រឈមមួយចំនួនដើម្បីឱ្យប្រធានមន្ទីរថ្មីបន្តអនុវត្ត។
ក្នុងការឡើងបេ្ដជ្ញាចិត្តទទួលភារកិច្ចថ្មី លោក គី វីរិន្ទ បានអរគុណដល់ថ្នាក់ដឹកនាំដែលបានផ្តល់តួនាទីជាប្រធានមន្ទីរសាធារណការខេត្តសៀមរាបដល់ខ្លួន និងបេ្ដជ្ញាបន្តធ្វើការលើវិស័យសាធារណការ និងអនុវត្តការងារតាមគោលការណ៍របស់ក្រសួងដែលបានដាក់ចេញ ដើម្បីរួមចំណែកអភិវឌ្ឍខេត្តសៀមរាប ក៏ដូចជាប្រទេសកម្ពុជា។
អភិបាលខេត្តសៀមរាប លោក ទៀ សីហា ក៏សម្ដែងការចូលរួមអបអរចំពោះប្រធានមន្ទីរសាធារណការថ្មីដែលត្រូវបានតែងតាំង ក៏ដូចជាប្រធានមន្ទីរចាស់ដែលទទួលភារកិច្ចថ្មីនៅក្រសួង។ ជាមួយគ្នានោះ លោកអភិបាលក៏បានកោតសរសើរពីការខិតខំរបស់ប្រធានមន្ទីរចាស់ លោក គឹម ប៉ុណ្ណា ដែលបានរួមចំណែកអភិវឌ្ឍវិស័យសាធារណការក្នុងខេត្តឱ្យមានការរីកចម្រើននាពេលកន្លងមក។ លោក ទៀ សីហា បន្ថែមថា វិស័យសាធារណការពិតជាមានសារសំខាន់ណាស់សម្រាប់ខេត្តសៀមរាប ដើម្បីទាក់ទាញភ្ញៀវទេសចរមកកម្សាន្តនៅខេត្តនេះបន្ថែមទៀត។
នាឱកាសនោះដែរ រដ្ឋមន្ត្រីសាធារណការ លោក ស៊ុន ចាន់ថុល បានចាត់ទុកការផ្លាស់ប្ដូរនេះថាជាការលើកកម្ពស់ការអភិវឌ្ឍវិស័យសាធារណការក្នុងប្រទេសកម្ពុជា និងជំរុញឱ្យប្រធានមន្ទីរថ្មីរៀបចំផែនការការងារ១០០ថ្ងៃដើម្បីអនុវត្ត ក៏ដូចជាបង្ហាញស្នាដៃការងារក្នុងតំណែងនិងភារកិច្ចថ្មីដែលថ្នាក់លើប្រគល់ជូន។ ក្រៅពីនោះ លោក ស៊ុន ចាន់ថុល បានផ្តាំទៅមន្ទីរទាំងអស់ ត្រូវដាក់ខ្លួនជាអ្នកបម្រើរាស្ដ្រ កុំធ្វើជាចៅហ្វាយរាស្ដ្រ។
គួរបញ្ជាក់ថា មុនឡើងជាប្រធានមន្ទីរសាធារណការនិងដឹកជញ្ជូនខេត្តសៀមរាប លោក គី វីរិន្ទ ជាប្រធានមន្ទីរសាធារណការខេត្តត្បូងឃ្មុំ អតីតប្រធានមន្ទីរសាធារណការខេត្តឧត្ដរមានជ័យ និងធ្លាប់ជាអនុប្រធានមន្ទីរសាធារណការខេត្តបាត់ដំបង៕
Tag:
ប្រធានមន្ទីរសាធារណការសៀមរាប
គឹម ប៉ុណ្ណា
គី វីរិន្ទ
ស៊ុន ចាន់ថុល
© រក្សាសិទ្ធិដោយ thmeythmey.com