មីយ៉ាន់ម៉ានិងបង់ក្លាដែស ព្រមព្រៀងធ្វើមាតុភូមិនិវត្តន៍ក្រុមរ៉ូហ៊ីងយ៉ានៅសប្ដាហ៍ក្រោយ

អន្តរជាតិ

មីយ៉ាន់ម៉ានិងបង់ក្លាដែស ព្រមព្រៀងធ្វើមាតុភូមិនិវត្តន៍ក្រុមរ៉ូហ៊ីងយ៉ានៅសប្ដាហ៍ក្រោយ

16, Aug 2019 , 8:39 pm

រូបភាព

ប្រជាជនរ៉ូហ៊ីងយ៉ាដើរឆ្លងកាត់ស្ពាននៅជំរុំជនភៀសខ្លួន

ដោយ: ធៀន ភារិន្ទ

មីយ៉ាន់ម៉ា និងបង់ក្លាដែស នៅពីថ្ងៃទី១៥ ខែសីហា បានព្រមព្រៀងគ្នាចាប់ផ្តើមធ្វើមាតុភូមិនិវត្តន៍ជនរ៉ូហ៊ីងយ៉ាចូលក្នុងប្រទេសមីយ៉ាន់ម៉ាវិញនៅក្នុងសប្តាណ៍ក្រោយ។ ការព្រមព្រៀង ជាការចាប់ផ្ដើមដំណើរការវិលលត្រឡប់របស់ជនភាគតិចមួយក្រុមនេះ ក្រោយពេលប្រទេសទាំងពីរ បរាជ័យអនុវត្តកិច្ចព្រមពៀងច្រើនខែមកហើយ។

ជនភាគតិចរ៉ូហ៊ីងយ៉ាច្រើងជាង ៧០ម៉ឺននាក់ បានរត់ភៀសខ្លួនចេញពីរដ្ឋរ៉ាឃីន ទឹកដីមីយ៉ាន់ម៉ាទៅជ្រកកោននៅប្រទេសក្បែរខាងបង់ក្លាដែស បន្ទាប់ពីរដ្ឋាភិបាលទីក្រុងណៃពិដោ បានប្រើប្រាស់យោធាបង្ក្រាបទៅលើពួកគេយ៉ាងចាស់ដៃ។ អង្គការសហប្រជាជាតិបានថ្កោលទោសថា ទង្វើយោធាមីយ៉ាន់ម៉ាជាការប្រព្រឹត្តអំពើប្រល័យពូជសាសន៍។

លោក Myint Thu បានប្រាប់ទីភ្នាក់ងារសារព័ត៌មាន Reuters តាមទូរសព្ទថា ពួកយើងនឹងធ្វើមាតុភូមិនិវត្តន៍ជនរ៉ូហ៊ីងយ៉ាចំនួន៣៥៤០នាក់ក្នុងចំណោមអ្នកមានឈ្មោះក្នុងបញ្ជីចំនួន២២ពាន់នាក់ឲ្យត្រលប់មកវិញនៅថ្ងៃទី២២ ខែសីហាខាងមុខនេះ។ យ៉ាងណាមិញ អ្នកនាំពាក្យក្រសួងការបរទេសមីយ៉ាន់ម៉ារូបនេះថា ចំនួនអ្នកត្រឡប់មកមីយ៉ាន់ម៉ាវិញមានចំនួនតិចណាស់ ប៉ុន្តែគ្មាននរណាចាប់បង្ខំជនភាគតិចមូស្លីមទាំងអស់ឲ្យត្រលប់មកវិញដែរ។

បន្ថែមពីលើនេះទៅទៀត ទីភ្នាក់ងារជនភៀសខ្លួន UNHCR បាន Reuters ក្នុងសារអេឡិចត្រូនិកថា៖ «អង្គការUNHCR នឹងផ្តល់ព័ត៌មានពាក់ព័ន្ធ និងព័ត៌មានទុកចិត្តបានឲ្យជនភៀសខ្លួន ទៅលើលក្ខខណ្ឌនៅក្នុងប្រទេសមីយ៉ាន់ម៉ា ជាពិសេសទៅលើតំបន់ដែលជនភៀសខ្លួនត្រូវត្រលប់ទៅរស់នៅ»។

មែនទែនទៅ តំបន់នៅក្នុងរដ្ឋរ៉ាក់ឃីន ដែលរដ្ឋាភិបាលបានបង្ក្រាបលើការបះបោររបស់ប្រជាជនរ៉ូហ៊ីងយ៉ាង មិនសមប្រកបសម្រាប់ជនភៀសខ្លួនឡើយ។ នេះជាការបញ្ជាក់របស់អង្គការ UNHCR។

សូមបញ្ជាក់ថា មីយ៉ាន់ម៉ា និងបង់ក្លាដេស បានព្រមព្រៀងធ្វើមាតុភូមិនិវត្តប្រជាជនរ៉ូហ៊ីងយ៉ាម្តងហើយកាលពីខែវិច្ឆិកាឆ្នាំ២០១៨ តែត្រូវបរាជ័យ ដោយជនភៀសខ្លួនរ៉ូហ៊ីងយ៉ាងបដិសេធមិនព្រមត្រលប់មកវិញព្រោះបារម្ភអំពីបញ្ហាសុវត្ថិភាព៕