លោក ផៃ ស៊ីផាន៖ បើយើងរំឭកកិច្ចព្រមព្រៀងទីក្រុងប៉ារីស ដូចជាបើកដៃឱ្យបរទេសត្រួតត្រាយើង

ជាតិ

លោក ផៃ ស៊ីផាន៖ បើយើងរំឭកកិច្ចព្រមព្រៀងទីក្រុងប៉ារីស ដូចជាបើកដៃឱ្យបរទេសត្រួតត្រាយើង

16, Aug 2019 , 10:19 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ ការគោរពកិច្ចព្រមព្រៀងទីក្រុងប៉ារីស គឺជាការបើកដៃឱ្យបរទេសជ្រៀតជ្រែកចូលកិច្ចការផ្ទៃក្នុងកម្ពុជាប៉ុណ្ណោះ។ នេះជាការលើកឡើងរបស់អ្នកនាំពាក្យរដ្ឋាភិបាល តបទៅនឹងមតិសាធារណៈជន ដែលរិះគន់ថា ការលុបថ្ងៃទិវារំឭកខួបកិច្ចព្រមព្រៀងទីក្រុងប៉ារីស ២៣ តុលា និងថ្ងៃទិវាសិទ្ធិមនុស្ស ១០ ធ្នូ ចេញពីថ្ងៃឈប់សម្រាកប្រចាំឆ្នាំ បង្ហាញពីបំណងរឹតត្បិតសិទ្ធិសេរីភាពរបស់ពលរដ្ឋ។

អ្នកនាំពាក្យរដ្ឋាភិបាល លោក ផៃ ស៊ីផាន បាននិយាយថា ការលុបថ្ងៃឈប់សម្រាកប្រចាំឆ្នាំមួយចំនួន មកសល់ត្រឹម២២ថ្ងៃនេះ គឺក្នុងគោលបំណងសម្រួលដល់ការរកស៊ីរបស់វិនិយោគិន និងទាក់ទាញការវិនិយោគបន្ថែមពីបរទេសប៉ុណ្ណោះ។ ដូច្នេះការលុបថ្ងៃឈប់សម្រាកប្រចាំឆ្នាំ ដែលរួមមានទិវារំឭកខួបកិច្ចព្រមព្រៀងទីក្រុងប៉ារីស ២៣ តុលា និងថ្ងៃទិវាសិទ្ធិមនុស្ស ១០ ធ្នូ ផងនោះ ត្រូវបានលោក ផៃ ស៊ីផាន អះអាងថា រដ្ឋាភិបាលគ្មានបំណងរឹតត្បិតសិទ្ធិសេរីភាពរបស់ពលរដ្ឋនោះទេ។

**audo1**

អះអាងបែបនេះហើយ លោក ផៃ ស៊ីផាន បាននិយាយបែបផ្លែផ្កាវិញថា ការរំឭក ឬឱ្យតម្លៃលើកិច្ចព្រមព្រៀងទីក្រុងប៉ារីសខ្លាំងនោះ វាគឺជាការបើកដៃចំហរឱ្យបរទេសជ្រៀតជ្រែកចូលកិច្ចការផ្ទៃក្នុងកម្ពុជាប៉ុណ្ណោះ។ ថ្លែងក្នុងសន្និសីទកាសែត ស្តីពី«ស្ថានភាពទឹកជំនន់» និង«ការកាត់បន្ថយថ្ងៃឈប់សម្រាកប្រចាំឆ្នាំ» កាលពីថ្ងៃទី១៥ សីហា អ្នកនាំពាក្យរដ្ឋាភិបាលរូបនេះ បាននិយាយដូច្នេះថា៖«ចង់ជម្រាបជូនសកម្មជនទាំងឡាយ ក៏ដូចជាអង្គការក្រៅរដ្ឋាភិបាល គាត់យក ឬប្រើប្រាស់ទិវាកិច្ចព្រមព្រៀងសន្តិភាព គឺជាអំពាវនាវហៅបរទេសមកជ្រៀតជ្រែកនៅក្នុងអធិបតេយ្យភាពរបស់កម្ពុជាប៉ុណ្ណោះ គ្មានអ្វីក្រៅពីហ្នឹង។ គាត់ចង់យកបរទេសមក ដើម្បីពង្រឹងអំណាចរបស់គាត់តែប៉ុណ្ណឹងឯង។ ប៉ុន្តែការប្រឹងប្រែងរបស់រដ្ឋាភិបាល គឺចង់ពង្រឹងអំណាចមហាជនរបស់យើង ក្នុងកិច្ចសម្រេចជោគវាសនារបស់លោក។ ដូច្នេះចំណុចពីរនេះ យើងគិតខុសគ្នា គឺយើងអត់ឱ្យតម្លៃលើបរទេសនោះទេ»។

កន្លងមកលោក ស៊ឹង សែនករុណា មន្ត្រីស៊ើបអង្កេតជាន់ខ្ពស់នៃសមាគមសិទ្ធិមនុស្សអាដហុក បាននិយាយថា កម្ពុជាកំពុងតែដើរផ្ទុយពីគោលការណ៍សិទ្ធិមនុស្ស និងប្រជាធិបតេត្យ ខណៈកម្ពុជា ក៏ជារដ្ឋនៃសមាជិកនៃអង្គការសហប្រជាជាតិ ដែលព្រមទទួលយកសច្ចាប័ណ្ណលើអនុសញ្ញាផ្សេងៗផងដែរ។ ក្នុងន័យនេះលោក ករុណា សំដៅលើការលុបចោលថ្ងៃកិច្ចព្រមព្រៀងទីក្រុងប៉ារីស ២៣ តុលា ដែលលោកយល់ឃើញថា រដ្ឋាភិបាលហាក់បង្ហាញពីជំហរគ្មានឆន្ទៈ លើកកម្ពស់សិទ្ធិមុស្ស និងប្រជាធិបតេយ្យក្នុងសង្គមបន្តទៀត។

ថ្លែងប្រាប់សារព័ត៌មានថ្មីៗ មន្ត្រីជាន់ខ្ពស់សមាគមអាដហុករូបនេះ បាននិយាយដូច្នេះថា៖«យើងមានការបារម្ភ និងសោកស្ដាយណាស់ ដោយមិនដឹងថា តើកម្ពុជាយើងទៅមុខទៀតបន្តដើរលើផ្លូវបែបណាឱ្យបានច្បាស់លាស់នោះទេ។ ទាំងខ្ញុំ និងសកម្មជនសិទ្ធិមនុស្សផ្សេងៗទៀត កំពុងមានការព្រួយបារម្ភ និងកំពុងយកចិត្តទុកដាក់តាមដានទៅលើការគោរពសិទ្ធិមនុស្សនៅក្នុងប្រទេសកម្ពុជា»។

លោក អំ សំអាត នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ បាននិយាយថា កម្ពុជាមានភាពល្អប្រសើរដូចសព្វថ្ងៃនេះ គឺដោយសារមានកិច្ចព្រមព្រៀងសន្តិភាពទីក្រុងប៉ារីស ២៣ តុលា ដែលធ្វើឲ្យខ្មែរគ្រប់ភាគីត្រូវរ៉ូវគ្នា និងបញ្ចប់សង្គ្រាមស៊ីវិល។

អត្ថបទទាក់ទង

អស់ពីកម្ពុជា នៅតែ២ប្រទេសប៉ុណ្ណោះដែលយក «ទិវាសិទ្ធិមនុស្សអន្តរជាតិ» ជាថ្ងៃឈប់សម្រាក

ទិវាសិទ្ធិមនុស្សលែងជាថ្ងៃឈប់សម្រាក តែមិនហាមប្រារព្ធឡើយ ទោះយ៉ាងណា NGO នៅតែបារម្ភ

អ្នកសេដ្ឋកិច្ច ថាកម្ពុជានឹងកើនចំណូលជាតិ ប្រសិនបើកាត់បន្ថយថ្ងៃឈប់សម្រាក តែសហជីពថា កម្មករខាតប្រយោជន៍

តែយ៉ាងណាលោក ផៃ ស៊ីផាន អះអាងថា កម្ពុជាមិនចាំបាច់អ្វីត្រូវគោរព ឬរំឭកកិច្ចព្រមព្រៀងសន្តិភាពនៃទីក្រុងប៉ារីសរហូតនោះទេ ព្រោះខ្លឹមសារនៃកិច្ចព្រមព្រៀងនេះ ត្រូវបានដាក់បញ្ចូលក្នុងរដ្ឋធម្មនុញ្ញកម្ពុជាអស់ទៅហើយ។ «បើយើងរំឭកកិច្ចព្រមព្រៀងសន្តិភាពទីក្រុងប៉ារីស បានសេចក្តីថា ជាការបើកចំហរអញ្ជើញបរទេសមកត្រួតត្រាយើង។ នេះចំពោះរូបខ្ញុំផ្ទាល់។ ក៏ប៉ុន្តែបើយើងរំឭកនូវទិវារដ្ឋធម្មនុញ្ញរបស់កម្ពុជា យើងអាចជជែកគ្នាបានថា តើធ្វើយ៉ាងម៉េចដើម្បីឱ្យប្រទេសយើងជឿនលឿនតទៅទៀត? រក្សាសន្តិភាព ស្ថិរភាពឱ្យបានមាំតទៅទៀត។

ហើយយើងធ្វើយ៉ាងម៉េចឱ្យមានច្បាប់មួយ ដែលការពារប្រយោជន៍របស់ប្រជាពលរដ្ឋកម្ពុជា ឱ្យផុតចាកពីការជិះជាន់ពីមន្ត្រីអាក្រក់»។ នេះជាការបញ្ជាក់របស់អ្នកនាំពាក្យរដ្ឋាភិបាល ដែលបានបន្ថែមថា កិច្ចព្រមព្រៀងទីក្រុងប៉ារីស គ្រាន់តែជារូបភាពអន្តរកាលមួយ ដែលជួយសម្របសម្រួលឱ្យពលរដ្ឋខ្មែរឈប់ឈ្លោះគ្នាប៉ុណ្ណោះ ប៉ុន្តែការឯកភាពជាតិជាផ្លូវការនោះ វាស្ថិតនៅក្រោមរដ្ឋធម្មនុញ្ញកម្ពុជា។

ទាក់ទងថ្ងៃឈប់សម្រាកទាំងនេះ លោក ប៊ូ ជុំសេរី អនុប្រធាននៃគណៈកម្មធិការជាតិរៀបចំបុណ្យជាតិនិងអន្តរជាតិ បានពន្យល់ថា ការប្រារព្ធទិវានានា នៅថ្ងៃសំខាន់នេះ គឺនៅតែប្រព្រឹត្តទៅជាធម្មតា ប៉ុន្តែគ្រាន់តែមិនមានការឈប់សម្រាកជាផ្លូវការដូចកន្លងមកប៉ុណ្ណោះ។ បើតាមលោក សេរី មូលហេតុដែលកម្ពុជាកាត់បន្ថយថ្ងៃឈប់សម្រាកនេះ ដើម្បីកុំឱ្យប៉ៈពាល់ដល់ចង្វាក់ការងារររកស៊ី របស់វិនិយោគិននៅកម្ពុជា៕