ភ្នំពេញ៖ ភាពយន្ត«តន្ត្រីជីវិត» ដែលបង្ហាញ៣សម័យកាល គឺសម័យមុនសង្គ្រាម សម័យប៉ុលពត និងសម័យក្រោយសង្គ្រាម បានជាប់ក្នុងជម្រើសតំណាងឱ្យកម្ពុជា ដើម្បីទៅប្រកួតប្រជែងពានរង្វាន់អូស្ការលើកទី៩២។ ភាពយន្តនេះ និពន្ធ និងដឹកនាំដោយអ្នកស្រី ខេលី សូ រួមទាំងលោក សុខ វិសាល ដែលជាដៃគូដឹកនាំ។
«តន្ត្រីជីវិត» គឺជារឿងជំនាន់ក្រោយដ៏មានឥទ្ធិពលមួយ ដោយនិយាយពី ស្នេហា សង្គ្រាម និងទំនាក់ទំនងគ្រួសារ អមជាមូយបទចម្រៀង«ចម្ប៉ាបាត់ដំបង» ដែលជាចម្រៀងដ៏ល្បីល្បាញ ច្រៀង និងនិពន្ធដោយអធិរាជសំឡេងមាស ស៊ីន ស៊ីសាមុត។ ក្នុងសាច់រឿងបានបង្ហាញពីជីវិតប្រជាជនកម្ពុជា ក្នុង៣សម័យកាលផ្សេងគ្នា ដែលត្រូវបានផ្លាស់ប្ដូរដោយសាររបបខ្មែរក្រហម។
សាច់រឿងក្នុងភាពយន្តនេះ ដកស្រង់ចេញពីដំណើរជីវិតរបស់ប្រជាជនកម្ពុជា ដែលបានឆ្លងកាត់សម័យសង្គ្រាម រួមទាំងការចងចាំរបស់ពួកគេ។«តន្ត្រីជីវិត» ឆ្លុះបញ្ចាំងឱ្យឃើញពីសេចក្ដីរីករាយ និងក្ដីសង្ឃឹម នៅចំណុចផ្ដើមនៃរឿង។ ចំណែកផ្នែកកណ្ដាល បង្ហាញពីភាពក្រៀមក្រំនិងទុក្ខសោក ហើយទីបញ្ចប់ និយាយពីភាពតស៊ូ និងប្តេជ្ញាចិត្ត ឆ្ពោះទៅមុខរបស់ប្រជាជនខ្មែរ ដោយមិនបំភ្លេចពីអ្វី ដែលបានកើតឡើងក្នុងអតីតកាល។
គណៈកម្មាធិការអូស្ការកម្ពុជា
អ្នកស្រី ខេលី សូ អ្នកនិពន្ធ និងដឹកនាំរឿង«តន្ត្រីជីវិត» បាននិយាយថា ទោះបីតន្ត្រីបានឆ្លងកាត់ឧបសគ្គច្រើនយ៉ាងណាក្ដី ប៉ុន្តែតន្ត្រីនៅតែអាចផ្សារភ្ជាប់ជាមួយមនុស្សឡើងវិញបាន។ អ្នកស្រីបញ្ជាក់បន្ថែមថា៖«រឿងរ៉ាវរបស់ប្រជាជនកម្ពុជា មិនគួរត្រូវបានកំណត់ ត្រឹមតែវាលពិឃាត នៃរបបខ្មែរក្រហមប៉ុណ្ណោះទេ»។
ចំណែកលោក សុខ វិសាល ដែលជាដៃគូដឹកនាំរឿង ក៏បានលើកឡើងថា តន្ត្រីតែងមានតួនាទីយ៉ាងសំខាន់ក្នុងសង្គមកម្ពុជា។ លោកថាភាពយន្តនេះ ពិតជានិយាយពីអំពីព្រលឹងរបស់ប្រជាជនខ្មែរ ដែលបានឆ្លងកាត់ពេលវេលាអស់រយៈពេល៤០ឆ្នាំ កន្លងមក។ លោកបញ្ជាក់ដូច្នេះ៖«គ្រប់គ្នា និយាយថា តន្ត្រីគឺជាព្រលឹងរបស់កម្ពុជា។ ហើយខ្ញុំគិតថា ភាពយន្តនេះ ពិតជា
និយាយពីព្រលឹងរបស់ប្រជាជនខ្មែរ។ «តន្ត្រីជីវិត» ដូចជាបទចម្រៀងមួយបទ ដែលនិយាយពីអ្វីដែលប្រជាជនកម្ពុជា បានឆ្លងកាត់ ទាំងសេចក្ដីរីករាយ ទុក្ខសោក និងក្ដីសង្ឃឹម»។
សម្រាប់អ្នកស្រី Marian Arthur ប្រធាន COSC ឆ្នាំនេះ មានលក្ខណៈជាប្រវត្តិសាស្ត្រ សម្រាប់សមាជិកគណៈកម្មាធិការជ្រើសរើសភាពយន្ត ដើម្បីតំណាងកម្ពុជា យកទៅប្រកួតពានរង្វាន់អូស្ការ។ ដោយភាពយន្ត២រឿង ត្រូវបានបោះឆ្នោត ជារឿងដែលសក្ដិសម ក្នុងការតំណាងឱ្យកម្ពុជា ដើម្បីប្រកួតប្រជែងគឺ«តន្ត្រីជីវិត»និពន្ធនិងដឹកនាំដោយអ្នកស្រី ខេលី សូ និងលោក វិសាលនិងរឿង«បោកចំបាប់» ដឹកនាំដោយលោក ម៉ានីស សាមា។
អ្នកស្រីបញ្ជាក់បន្ថែមដូច្នេះ៖«យើងទទួលស្គាល់ថា ភាពយន្តទាំងទាំង២នេះ មានភាពសក្តិសមដើម្បីតំណាងឱ្យប្រទសកម្ពុជា ប៉ុន្តែយើងអាចបញ្ជូលបាន ត្រឹមតែភាពយន្តចំនួន១ តែប៉ុណ្ណោះ»។
ជារៀងរាល់ឆ្នាំ ពានរង្វាន់អូស្ការ ត្រូវបានរៀបចំឡើងដោយ Academy of Motion Picture Arts & Sciences នៅហូលីវូដ។ ប្រទេសនីមួយៗ អាចបញ្ជូនភាពយន្តបានតែមួយ សម្រាប់ភាពយន្ត ដែលមានលក្ខណៈអន្តរជាតិល្អបំផុត ហើយមានតែស្ថានប័ន ដែលទទួលបានការអនុញ្ញាតប៉ុណ្ណោះ ទើបអាចជ្រើសរើស ការដាក់ស្នើខ្សែភាពយន្តបាន។
ដើម្បីឱ្យភាពយន្តមានលក្ខណៈសម្បត្តិគ្រប់គ្រាន់ តម្រូវការដ៏ចាំបាច់មួយ ក្នុងចំណោមតម្រូវការផ្សេងៗទៀត គឺភាពយន្តនីមួយៗ ត្រូវតែបានចាក់បញ្ជាំងក្នុងប្រទេសកម្ពុជា នៅចន្លោះថ្ងៃទី១តុលា ដល់ថ្ងៃទី៣០ ខែកក្កដា នៃឆ្នាំនីមួយៗ។ ពិធីប្រគល់ពានរង្វាន់អូស្ការ គ្រោងធ្វើនៅថ្ងៃអាទិត្យ ទី៩ ខែកម្ភៈ ឆ្នាំ២០២០ និងមានការផ្សាយផ្ទាល់នៅប្រទេសកម្ពុជា នាព្រឹកថ្ងៃចន្ទទី១០ខែកុម្ភៈឆ្នាំ២០២០៕