ជាតិ
តំបន់ការពារទេសភាពអន្លង់ព្រីង ត្រូវបានទទួលស្គាល់ជាតំបន់នៃបណ្តាញផ្លូវហោះហើរសត្វស្លាបអាស៊ីខាងកើត-អូស្ត្រាលី រូបភាពីទំព័រហ្វេសប៊ុក BirdLife International Cambodia Programme
× ភ្នំពេញ៖ តំបន់ការពារទេសភាពអន្លង់ព្រីង ត្រូវបានទទួលស្គាល់ជាតំបន់ នៃបណ្តាញផ្លូវហោះហើរសត្វស្លាបអាស៊ីខាងកើត-អូស្ត្រាលី ដោយខាធិការដ្ឋានកិច្ចសហប្រតិបត្តិការអន្តរជាតិ នៃភាពជាដៃគូផ្លូវហោះហើរសត្វស្លាបអាស៊ីខាងកើត-អូស្ត្រាលី កាលពីថ្ងៃទី៧ សីហា។ នេះបើតាមសេចក្តីជូនដំណឹងរបស់អង្គការជីវិតសត្វស្លាបអន្តរជាតិ។
លោក ស្រី ស៊ុនលាង ប្រធាននាយកដ្ឋានអភិរក្សតំបន់ដីសើមទឹកសាបនៃអគ្គនាយកដ្ឋានរដ្ឋបាលការពារ និងអភិរក្សធម្មជាតិក្រសួងបរិស្ថាន បានបញ្ជាក់ក្នុងសេចក្តីជូនដំណឹងថា ការអភិរក្សសត្វស្លាបទេសន្តរប្រវេសន៍ គឺទាមទារឱ្យមានការចូលរួមការពារតំបន់ដីសើមសំខាន់ៗ ដែលជាជម្រកពងកូន ទីសំចត និងទីតាំងរកចំណី ពីបណ្តាប្រទេសទាំងអស់ក្នុងផ្លូវហោះហើររបស់ពួកវា។
រូបភាពីទំព័រហ្វេសប៊ុក BirdLife International Cambodia Programme
លោក ប៊ូ វរសក្ស នាយកអង្គការជីវិតសត្វស្លាបអន្តរជាតិ បានបញ្ជាក់ប្រាប់សារព័ត៌មានថ្មីៗតាមទូរស័ព្ទថា ការទទួលស្គាល់នេះ នឹងជួយជំរុញកំណើនភ្ញៀវទេសចរជាតិ និងអន្តរជាតិ ឲ្យទៅទស្សនាតំបន់នេះ ជាពិសេសគឺបង្កើនចំណូលក្នុងសហគមន៍។ ទន្ទឹមនឹងនេះ លោក ប៊ូ វរសក្ស បានជំរុញឲ្យបណ្ដាញអង្គការ និងអាជ្ញាធរពាក់ព័ន្ធ ចូលរួមអភិរក្សតំបន់ការពារទេសភាពអន្លង់ព្រីង និងប្រើប្រាស់ធនធានតំបន់ដីសើមនេះ ប្រកបដោយនិរន្តរភាព។
សូមជម្រាបថា តំបន់ការពារទេសភាពអន្លង់ព្រីង មានទំហំ២១៧ហិកតា ស្ថិតនៅស្រុកកំពង់ត្រាច ខេត្តកំពត បង្កើតឡើង កាលពីថ្ងៃទី៩ សីហា ឆ្នាំ២០១៦។ តំបន់នេះ មានសត្វស្លាបប្រមាណ១០០ប្រភេទ ហើយក៏ជាប្រភពចំណីសម្រាប់សត្វស្លាបទេសន្តរប្រវេសន៍ជាច្រើនផងដែរ ពិសេសសត្វក្រៀល សត្វខ្វែកសមុទ្រស្លាបឆ្នូតស ទាព្រៃក្បាលឆ្នូតសជាដើម។ នៅអំឡុងខែធ្នូ សត្វស្លាបបានហើរទៅតំបន់អន្លង់ព្រីង ដើម្បីរកចំណី ហើយនៅដើមខែឧសភា សត្វស្លាបទេសន្តរប្រវេសន៍ទាំងនោះ នឹងផ្លាស់ទីទៅកាន់ទីតាំងពងកូន ដើម្បីបន្តពូជ។
រូបភាពីទំព័រហ្វេសប៊ុក BirdLife International Cambodia Programme
ផ្លូវហោះហើរសត្វស្លាប គឺជាពាក្យដែលប្រើសម្រាប់បង្ហាញពីតំបន់ភូមិសាស្ត្រមួយ ដែលសត្វស្លាបទេសន្តរប្រវេសន៍ជាច្រើនផ្លាស់ទី ពីជម្រកពងកូន ទៅទីសំចត និងទីតាំងស្វែករកចំណីក្នុងរដូវពេលជាក់លាក់មួយជាប្រចាំឆ្នាំរបស់ពួកវា។ បច្ចុប្បន្ននៅលើពិភពលោកមានផ្លូវហោះហើរចំនួន ៩ ហើយប្រទេសកម្ពុជា មានទីតាំងស្ថិតនៅក្នុងផ្លូវហោះហើរអាស៊ីខាងកើត-អូស្ត្រាលី និងបានចូលជាសមាជិក នៃកិច្ចសហប្រតិបត្តិការអន្តរជាតិ នៃភាពជាដៃគូផ្លូវហោះហើរសត្វស្លាបអាស៊ីខាងកើត-អូស្ត្រាលី ចាប់តាំងពីឆ្នាំ២០០៧មកម្ល៉េះ។
សមាជិករបស់កិច្ចសហប្រតិបត្តិការអន្តរជាតិនៃភាពជាដៃគូផ្លូវហោះហើរសត្វស្លាបអាស៊ីខាងកើត-អូស្ត្រាលី គឺមានកាតព្វកិច្ចក្នុងការដាក់តំបន់ដីសើម ដែលមានសារៈសំខាន់ដល់សត្វស្លាបទេសន្តរប្រវេសន៍ ជាតំបន់នៃបណ្តាញផ្លូវហោះហើរសត្វស្លាបអាស៊ី ខាងកើត-អូស្ត្រាលី។ តំបន់ទាំងនោះ ត្រូវបានជ្រើសរើសដោយវិនិច្ឆ័យទៅលើសារៈសំខាន់ នៃកត្តាជីវៈចម្រុះ និងមុខងារអេកូឡូស៊ី ជាពិសេសផ្តល់ជាទីជម្រកដ៏សំខាន់ ដល់សត្វស្លាបទេសន្តរប្រវេសន៍ ក្នុងវដ្តជីវិតរបស់ពួកវា។ បច្ចុប្បន្នតំបន់ដីសើមសំខាន់ៗ ដែលបានដាក់បញ្ចូលជាតំបន់នៃបណ្តាញផ្លូវហោះហើរសត្វស្លាបអាស៊ីខាងកើត-អូស្ត្រាលី មានចំនួន ១៤៤ កន្លែង ដែលបង្កើតបានជាបណ្តាញដ៏ធំមួយក្នុង ការអភិរក្សសត្វស្លាបទេសន្តរប្រវេសន៍ និងទីជម្រករបស់ពួកវា៕
Tag:
កំពត
អន្លង់ព្រីង
សត្វស្លាប
© រក្សាសិទ្ធិដោយ thmeythmey.com