ជាតិ
ជ័យលាភីច្នៃម៉ូតអ្នកនាង ស សាន៖ ទោះពិការភាព តែយើងត្រូវប្រឹងធ្វើ ដើម្បីឱ្យគេឃើញពីសក្ដានុពលយើង
×![]()
ភ្នំពេញ៖ អ្នកនាង ស សាន ជាបេក្ខជនមួយរូប ក្នុងចំណោមបេក្ខជនទាំង៥រូប ដែលបានឈ្នះការប្រកួតរចនាម៉ូតសម្លៀកបំពាក់ខ្មែរ បែបលោកខាងលិច១១ឈុត ទៅចូលរួមពិព័រណ៍ពាណិជ្ជកម្មដ៍ធំមួយ(Bazaar Berlin) នៅទីក្រុងបែរឡាំង ប្រទេសអាល្លឺម៉ង់ ពីថ្ងៃទី៦ ដល់ថ្ងៃទី១០ ខែវិច្ឆិកាខាងមុខ។ នារីពិការជើងខាងស្តាំតាំងពីកំណើតរូបនេះ ចាត់ទុកជ័យជម្នះនៃការប្រកួតច្នៃម៉ូតនេះ គឺជាសារមួយដែលបង្ហាញឱ្យមជ្ឈដ្ឋានទូទៅ កុំមើលរំលងពីសក្កានុពលផ្សេងៗរបស់អ្នកពិការ។
ស្ថិតនៅក្នុងចំណោមបេក្ខជនជាច្រើននាក់ ដែលកំពុងរង់ចាំលទ្ធផលនោះ អ្នកនាង ស សាន គឺជាបេក្ខជនចុងក្រោយគេដែលគណៈកម្មការប្រកាសឈ្មោះជាប់ ក្នុងការប្រកួតរចនាម៉ូតសម្លៀកបំពាក់ដោយប្រើប្រាស់វត្ថុធាតុដើមក្នុងស្រុក និងមានគំនិតច្នៃម៉ូតសម្លៀកបំពាក់ផ្ទាល់ខ្លួន ដែលមិនចម្លងពីគំនិត ឬម៉ូតរបស់អ្នកដទៃ កាលពីថ្ងៃ១១សីហា ឆ្នាំ២០១៩ ។ អ្នកនាង ស សាន នឹងត្រូវយកសម្លៀកបំពាក់ខ្មែរ ដែលខ្លួនបានរចនាម៉ូតបែបលោកខាងលិចនេះ ទៅបង្ហាញនៅក្នុងពិព័រណ៍ដ៏ធំមួយ នៅប្រទេសអាល្លឺម៉ង នៅខែវិច្ឆិកាខាងមុខ។
រូបមុខគេ អ្នកនាង ស សាន ឈ្នះការប្រកួតម៉ូតសម្លៀកបំពាក់បែបអឺរ៉ុបច្នៃពីផលិតផលក្នុងស្រុក ជាមួយបេក្ខជន៤រូបទៀត កាលពីថ្ងៃទី១១ សីហា ឆ្នាំ២០១៩។
តាមពិតទៅស្ត្រីពិការភាពវ័យ២៥ឆ្នាំរូបនេះ ទទួលបានអាហារូបករណ៍សិក្សារយៈពេលមួយឆ្នាំពេញលើការច្នៃម៉ូតសម្លៀកបំពាក់បែបអឺរ៉ុប ក្នុងមជ្ឈមណ្ឌលរចនាបែបទំនើប(Modern Ethnic Design Center)នៅកម្ពុជា មុននឹងជាប់ចំណាត់ថ្នាក់លេខ៥នេះ។ សម្រាប់អ្នកនាង ស សាន ការអត់ធ្មត់ និងកំណត់យកជំនាញមួយឱ្យច្បាស់លាស់ ទើបវាអាចធ្វើឱ្យស្នាដៃខ្លួនលេចចេញជារូបរាងឡើង ហើយត្រូវបានគេទទួលស្គាល់។
អ្នកនាង ស សាន ដែលបញ្ចប់ការសិក្សាក្នុងកម្រិតបរិញ្ញាបត្រលើជំនាញព័ត៌មានវិទ្យា និងកំពុងបម្រើការងារក្នុងក្រសួងសង្គមកិច្ច អតីតយុទ្ធជន និងយុវនីតិសម្បទាន បានបញ្ជាក់ដូច្នេះថា៖«អ្វីដែលកាន់តែជំរុញ និងលើកទឹកខ្ញុំកាន់តែខ្លាំង គឺការលើកកម្ពស់ផលិតផលខ្មែរ ឱ្យទីផ្សារអឺរ៉ុបទទួលស្គាល់ថា ខ្មែរយើងមានផលិតផលត្បាញដោយដៃជាច្រើនដែលពួកគេមិនធ្លាប់ដឹងពីមុនមក»។
បើតាមនារីសម្បុរស សក់ត្រង់ពណ៌ខ្មៅលើចង្កេះ ដោយធ្វើដំណើរទៅណាមកណាត្រូវមានឈើច្រត់ សម្រាប់សម្រួលដល់ការបម្លាស់ទីរូបនេះ ការប្រកួតប្រជែងពិតប្រាកដមួយដោយទទួលបានជ័យជម្នះនេះ គឺជាសារមួយទៅដល់អ្នកពិការដទៃទៀត ឱ្យមានឆន្ទៈ តស៊ូ និងខិតខំរៀនសូត្រ ហើយកុំតូចចិត្តនូវអ្វីដែលខ្លួនមិនមានដូចគេ ឬខុសពីគេ។
ជាកូនទី២ក្នុងចំណោមបងប្អូន៦នាក់ ក្នុងគ្រួសារមួយដែលមានជីវភាពរស់នៅសមរម្យ នៅក្នុងសង្កាត់កោះដាច់ ខណ្ឌជ្រោយចង្វារ រាជធានីភ្នំពេញរូបនេះ បាននិយាយដូច្នេះថា៖ «មិនថាអ្នកពិការ ឬមិនពិការទេ គឺសុទ្ធសឹងតែមានសក្ដានុពល ឬភាពខ្លាំងរៀងៗខ្លួន។ គ្រាន់តែអ្នកពិការ ត្រូវទាមទារការខិតខំ និងប្រឹងប្រែងឱ្យខ្លាំងជាងអ្នកមានកាយសម្បទាពេញលេញ ដើម្បីបង្ហាញសមត្ថភាពរបស់យើងឱ្យគេមើលឃើញពីសក្ដានុពលយើងមាន ដែលមានកាយសម្បទាពេញលេញចំនួន មិនមានដូចយើង។ ហើយនៅពេល យើងបានទទួលបានជោគជ័យ ដោយប្រកបនូវភាពត្រឹមត្រូវ នោះគឺគ្មាននរណាមើលងាយយើង ឬថាឱ្យយើងជាមនុស្សគ្មានបានការ ឬជាបន្ទុកគេឡើយ»។
ជ័យលាភីលេខ៥ នៃការប្រកួតប្រជែងរចនាម៉ូតសម្លៀកបំពាក់រូបនេះ បានលើកទឹកចិត្តដល់អ្នកពិការភាពគ្រប់រូប កុំឱ្យផ្ដេកផ្ដួលលើពិការភាពខ្លួន និងកុំគិតថាខ្លួនឯងជាបន្ទុករបស់នរណាម្នាក់ ប៉ុន្តែត្រូវគិតនឹងស្វែងរកចំណុចខ្លាំងរបស់ខ្លួនឯងវិញ ដើម្បីធ្វើអ្វីមួយ ដែលជាប្រយោជន៍ដល់អ្នកនៅជុំវិញខ្លួន និងសហគមន៍របស់ខ្លួន។ ក្រៅពីលើកទឹកចិត្តនេះអ្នកនាង ស សាន ក៏បានចូលរួមចំណែកលើកស្ទួយជីវភាពរស់នៅរបស់ក្រុមអ្នកងាយរងគ្រោះ ដូចជាក្រុមអ្នកស្រលាញ់ភេទដូចគ្នា ក្រុមអ្នកពិការ ក្រុមអតីតស្ត្រីបម្រើសេវាកម្មកម្សាន្តនានាផងដែរ តាមរយៈការទទួលទិញផលិតផលខ្មែរពីពួកគេ យកទៅលក់បន្ត៕
Tag:
ពិការ
ច្នៃម៉ូត
សម្លៀកបំពាក់
ស សាន
© រក្សាសិទ្ធិដោយ thmeythmey.com
