អន្តរជាតិ
ចិន មិនស្ទាក់ស្ទើរនឹងជួយប្រទេសកោះប៉ាស៊ីហ្វិកដែលអាចលិចលង់ព្រោះប្រែប្រួលអាកាសធាតុ
×![]()
រដ្ឋាភិបាលក្រុងប៉េកាំង បានទទួលយកក្តីបារម្ភរបស់បណ្តាប្រទេសកំពុងអភិវឌ្ឍ ជាពិសេសប្រទេសកោះប៉ាស៊ីហ្វិកពាក់ព័ន្ធនឹងបញ្ហាបម្រែបម្រួលអាកាសធាតុ ដែលកំពុងតែរងការគំរាមកំហែងពួកគេពីការលិចលង់។ ក្រុងប៉េកាំង ក៏បានទទូចឲ្យប្រទេសអភិវឌ្ឍន៍ ចូលរួមចំណែកស្រោចស្រង់បណ្តាប្រទេសដែលកំពុងតែប្រឈមនឹងបញ្ហានេះប្រកបដោយការទទួលខុសត្រូវខ្ពស់ផងដែរ។
តាមវេទិកាដៃគូកិច្ចសន្ទនាស្តីពីបម្រែបម្រួលអាកាសក្នុងរដ្ឋធានី ហ្វ៊ូណាហ្វ៊ូទីនៃរដ្ឋកោះទូវ៉ាលូ បេសកជនចិន លោក Wang Xuefeng នៅថ្ងៃ១៦ សីហា បានលើកឡើងថា ប្រទេសកំពុងតែអភិវឌ្ឍទាំងអស់ បានរងការគំរាមកំហែងយ៉ាងខ្លាំងពីការកើនឡើងនៃកម្តៅផែនដី ជាពិសេសនោះ កោះប៉ាស៊ីហ្វិក និងប្រទេសកោះតូចៗផ្សេងទៀត ដែលតម្រូវឲ្យមានការចូលរួមស្រោចស្រង់ពីសហគមន៍អន្តរជាតិ។ នេះបើយោងតាមការចុះផ្សាយរបស់ភ្នាក់ងារព័ត៌មានចិន Xinhua។
លោក Wang បានអះអាងថា រដ្ឋាភិបាលចិន បានខិតខំប្រឹងប្រែងក្នុងការដោះស្រាយជាមួយនឹងបញ្ហាបម្រែបម្រួល ដោយមិនមែន ព្រោះតែតម្រូវការសម្រាប់ការអភិវឌ្ឍប្រកបដោយនិរន្តរភាពរបស់ចិនប៉ុណ្ណោះនោះទេ ក៏ប៉ុន្តែក៏ព្រោះតែដើម្បីបង្ហាញពីស្មារតីទទួលខុសត្រូវនៃសហគមន៍អន្តរជាតិ ដែលមានអនាគតរួមគ្នាក្នុងនាមជាមនុស្សជាតិ។
លោក គូសបញ្ជាក់ថា ក្នុងនាមជាប្រទេសកំពុងអភិវឌ្ឍធំបំផុតរបស់ពិភពលោក ចិន តែងតែយកចិត្តទុកដាក់ខ្លាំងលើក្តីបារម្ភ និងសេចក្តីត្រូវការរបស់បណ្តាប្រទេសកោះតូចៗក្នុងការប្រយុទ្ធប្រឆាំងនឹងបញ្ហាបម្រែបម្រួលអាកាសធាតុ។
តាមលោក Wang រដ្ឋាភិបាលចិន ជឿជាក់ថា ដើម្បីមានដោះស្រាយលើបម្រែបម្រួលអាកាសធាតុកាន់តែល្អប្រសើរ ភាគីពាក់ព័ន្ធទាំងអស់ត្រូវតែពង្រឹងការអនុវត្តក្របខណ្ឌអនុសញ្ញាស្តីពីបម្រែបម្រួលអាកាសធាតុរបស់អង្គការសហប្រជាជាតិ និងការអនុវត្តឲ្យបានពេញលេញ និងប្រសិទ្ធភាពរបស់កិច្ចព្រមព្រៀងក្រុងប៉ារីស។
សម្រាប់ចិន ប្រទេសអភិវឌ្ឍ ក៏គួរតែប្រកាន់ខ្ជាប់កាតព្វកិច្ចរបស់ពួកគេ ដែលបានបញ្ញត្តិនៅក្នុងអនុសញ្ញា និងកិច្ចព្រមព្រៀង រាប់បញ្ចូលទាំងការផ្តល់ការគាំទ្រគ្រប់គ្រាន់ទាំងផ្នែកហិរញ្ញវត្ថុ បច្ចេកវិទ្យា និងការកសាងសមត្ថភាពទៅកាន់ប្រទេសតូច ក៏ដូចជាប្រទេសកំពុងអភិវឌ្ឍ ដើម្បីជួយដល់ប្រទេសទន់ខ្សោយទាំងនេះ បង្កើនសមត្ថភាពក្នុងការប្រយុទ្ធប្រឆាំងនឹងបម្រែបម្រួលអាកាសធាតុ។
ដោយមិនត្រឹមតែនិយាយពីគោលការណ៍ប៉ុណ្ណោះនោះទេ តំណាងជាន់ខ្ពស់របស់ចិនរូបនេះ បានលើកឡើងពីសមិទ្ធផលរបស់ចិនកន្លងមកក្នុងការជួយដល់ប្រទេសដែលកំពុងតែប្រឈមនឹងការគំរាមកំហែង។ លោកថា ប៉ុន្មានឆ្នាំមកនេះ ចិន បានផ្តល់ជំនួយតាមលទ្ធភាពរបស់ខ្លួនដល់ប្រទេសកោះប៉ាស៊ីហ្វិក តាមរយៈកិច្ចសហប្រតិបត្តិការ ត្បូង-ត្បូង ( South-South Cooperation) ដើម្បីកសាងសមត្ថភាពសមត្ថភាពប្រយុទ្ធប្រឆាំងនឹងបម្រែបម្រួលអាកាសធាតុ៕
Tag:
ចិន
បម្រែបម្រួលអាកាសធាតុ
© រក្សាសិទ្ធិដោយ thmeythmey.com
