កីឡាអន្តរជាតិ
អន្តរជាតិ
Sarri សម្រាកព្យាបាលជំងឺរលាកសួតនៅមន្ទីរពេទ្យ ខណៈលោកញៀនបារី
× អ្នកចាត់ការទូទៅក្រុម Juventus លោក Maurizio Sarri កំពុងស្ថិតក្នុងមន្ទីរពេទ្យដើម្បីទទួលការព្យាបាលជំងឺរលាកសួត។
អតីតគ្រូ Chelsea វ័យ ៦០ ឆ្នាំរូបនេះបានចំណាយពេលមួយព្រឹក នៅជាមួយក្លិបយក្សអ៊ីតាលីប៉ុណ្ណោះ នៅថ្ងៃទី១៩ ខែសីហា បន្ទាប់ពីខកខានដឹកនាំការប្រកួតមិត្តភាព កាលពីចុងសប្តាហ៍ទល់នឹងក្រុម Triestina ។
ដំបូងឡើយគេគិតថា លោក Sarri ដែលខកខានដឹកនាំការប្រកួតមិត្តភាពនេះ ដោយសារមានបញ្ហាផ្ដាសាយ។ ប៉ុន្តែក្រោយពីអ្នកចាត់ការសញ្ជាតិអ៊ីតាលីដែលចូលចិត្តជក់បារីរូបនេះ មានអាការកាន់តែមិនស្រួលនោះ លោកក៏ទទួលការពិនិត្យបន្ថែមទៀត ដោយរកឃើញថាមានជំងឺរលាកសួត។ លោក Sarri បានចាប់ផ្តើមព្យាបាលជំងឺនេះហើយ។ នេះបើតាមក្លិប Juventus។
ក្រុមរហស្សនាមសេះបង្កង់ និងត្រូវធ្វើដំណើរទៅជួបម្ចាស់ផ្ទះ Parma សម្រាប់ការប្រកួតបើកឆាកក្របខណ្ឌលីគកំពូលអ៊ីតាលី Serie A នៅចុងសប្តាហ៍នេះ ខណៈវត្តមានរបស់លោក Sarri ក្នុងការដឹកនាំក្រុមដំបូងរដូវកាលនេះ នៅមិនទាន់ច្បាស់នៅឡើយទេ។
អតីតអ្នកចាត់ការ Napoli បានចូលរួមជាមួយក្រុមតោខៀវ កាលពីខែកក្កដា ឆ្នាំ ២០១៨ ដោយជួយក្រុមមានមូលដ្ឋានក្នុងក្រុងឡុងដ៏នេះ ឈ្នះពានរង្វាន់ Europa League សម្រាប់រដូវកាលដំបូងរបស់លោក។
បើទោះជួយ Chelsea ឈ្នះពានលំដាប់ទីពីរអឺរ៉ុប និងបានកៅអី Champions League ក្តី ប៉ុន្តែលោក Sarri នៅតែចាកចេញពី Stamford Bridge ដើម្បីទៅជំនួសកៅអីលោក Massimiliano Allegri ក្នុងនាមជាអ្នកចាត់ការទូទៅ Juventus កាលពីខែមិថុនា កន្លងទៅ៕
Tag:
Maurizio Sarri
Juventus
© រក្សាសិទ្ធិដោយ thmeythmey.com