ជាតិ
ក្រសួងទេសចរណ៍រៀបចំសន្និសីទអន្តរជាតិលើកទី១ស្តីពីទេសចរណ៍អាហារកម្ពុជា រូបភាពពីក្រសួងទេសចរណ៍
× ក្រសួងទេសចរណ៍ រៀបចំសន្និសីទអន្តរជាតិលើកទី១ ស្តីពីទេសចរណ៍ម្ហូបអាហារកម្ពុជា (The First International Conference on Cambodia Gastronomy and Food Tourism) ដើម្បីលើកកម្ពស់គុណតម្លៃប្រពៃណី និងបេតិកភណ្ឌសម្រាប់ការអភិវឌ្ឍទេសចរណ៍ប្រកបដោយចីរភាព។ លើសពីនេះ គឺក្នុងគោលដៅផ្សព្វផ្សាយពីសក្តានុពលទេសចរណ៍ម្ហូបអាហារ និងផលិតផលខ្មែរ ឲ្យក្លាយជាផលិតផលទេសចរណ៍ប្រកបដោយភាពទាក់ទាញ។ នេះបើតាមសេចក្ដីជូនដំណឹងរបស់ក្រសួងទេសចរណ៍នៅថ្ងៃទី១៩សីហា។
ការរៀបចំនេះ បានសហការជាមួយអង្គការទេសចរណ៍ពិភពលោក (UNWTO) ធ្វើឡើងក្នុងថ្ងៃទី២១ សីហា ឆ្នាំ២០១៩ នេះនៅសណ្ឋាគារសុខាភ្នំពេញ ដែលជាព្រឹត្តិការណ៍ទេសចរណ៍ម្ហូបអាហារអន្តរជាតិដ៏ធំលើកដំបូងនៅកម្ពុជា។
ក្រសួងទេសចរណ៍បានបញ្ជាក់ឲ្យដឹងថា សន្និសីទអន្តរជាតិលើកទី១នេះ នឹងចូលរួមលើកកម្ពស់ម្ហូបអាហារ និងផលិតផលខ្មែរ ដែលបង្ហាញពីវប្បធម៌ និងអត្តសញ្ញាណជាតិ ទៅកាន់ពិភពលោកឲ្យបានទូលំទូលាយ ស្របតាមបរិបទអាស៊ាន និងពិភពលោក ក៏ដូចជាស្របតាមការដាក់ចុះយុទ្ធនាការ «នំបញ្ចុកសន្តិភាព» ដោយសម្តេចតេជោ ហ៊ុន សែន។
កម្មវិធីនេះ នឹងមានការចូលរួមពីវាគ្មិនជាតិ-អន្តរជាតិ តំណាងអង្គការទេសចរណ៍ពិភពលោក (UNWTO) ប្រទេសសមាជិកអាស៊ាន ព្រមទាំងមានការចូលរួមពីស្ថាប័នរដ្ឋ ឯកជន សិស្ស និស្សិត និងមានការតាំងបង្ហាញផលិតផលខ្មែរមកពីបណ្តារាជធានី-ខេត្តនានា៕
© រក្សាសិទ្ធិដោយ thmeythmey.com