អន្តរជាតិ
បុគ្គលិកជនជាតិចិនម្នាក់ ឈ្មោះថា Simon Cheng ដែលបម្រើការនៅស្ថានកុងស៊ុលចក្រភពអង់គ្លេសប្រចាំទីក្រុង ហុងកុង
×![]()
បុគ្គលិកជនជាតិចិនម្នាក់ ឈ្មោះថា Simon Cheng ដែលបម្រើការនៅស្ថានកុងស៊ុលចក្រភពអង់គ្លេសប្រចាំទីក្រុង ហុងកុង ត្រូវបានឃុំខ្លួនក្នុងទីក្រុង Shenzhen ព្រំដែនចិនដីគោកក្នុងករណីល្មើសច្បាប់។ នេះបើយោងតាមការបញ្ជាក់របស់ក្រសួងការបរទេសចិន នៅថ្ងៃពុធទី ២១ សីហា ។
ថ្លែងនៅក្នុងសន្និសីទព័ត៌មាន នារដ្ឋធានី ប៉េកាំង អ្នកនាំពាក្យក្រសួងការបរទេសចិន Geng Shuang បាននិយាយថា លោក Cheng ត្រូវបានឃុំខ្លួនអស់រយៈពេល១៥ថ្ងៃមកហើយ ដោយកម្លាំងប៉ូលិសទីក្រុង Shenzhen ក្រោយពីបំពានច្បាប់គ្រប់គ្រងសន្តិសុខសាធារណៈ ។ តាមការចុះផ្សាយរបស់ទីភ្នាក់ងារព័ត៌មាន AFP លោក Geng សង្កត់ធ្ងន់ថា លោក Cheng ជាជនជាតិចិនម្នាក់ ហេតុដូច្នេះ រឿងនេះជាកិច្ចការផ្ទៃក្នុងរបស់ចិនទាំងស្រុង។
ចក្រភពអង់គ្លេស បានបញ្ជាក់ឲ្យដឹងថា ខ្លួនមានកង្វល់ជាខ្លាំងជុំវិញរបាយការណ៍ ដែលបានចុះផ្សាយថា បុគ្គលិកម្នាក់ដែលបម្រើការនៅស្ថានកុងស៊ុលខ្លួនប្រចាំទីក្រុងហុងកុង ត្រូវបានឃុំខ្លួន។ ទាក់ទងនឹងការលើកឡើងរបស់រដ្ឋាភិបាលក្រុងឡុងដ៍បែបនេះ ក្រសួងការបរទេសចិន តាមរយៈលោក Geng បានបញ្ជាក់ថា រដ្ឋាភិបាលក្រុងប៉េកាំង មិនពេញចិត្តចំពោះសម្តី និងទង្វើរបស់អង់គ្លេសលើរឿងហុងកុងឡើយ។ ទន្ទឹមនឹងនេះ ចិនក៏ស្នើសុំឲ្យអង់គ្លេស បញ្ឈប់ការលើកឡើងដោយខ្វះទំនួលខុសត្រូវដូចនេះបន្តទៀត ហើយក៏ឈប់លូកលាន់កិច្ចការផ្ទៃក្នុងរបស់ហុងកុង និងចិនតទៅទៀតផងដែរ។
តាមរយៈកិច្ចសម្ភាសជាមួយមិត្តស្រី និងគ្រួសារលោក ដែលបានចុះផ្សាយលើវេបសាយហុងកុង HK01 លោក Simon Cheng ពុំឃើញត្រឡប់ទៅធ្វើការចាប់តាំងពីថ្ងៃទី ៩ ខែសីហា ក្រោយពីធ្វើដំណើរទៅកាន់ទីក្រុង Shenzhen ។ គ្រួសាររបស់លោក Cheng បានបញ្ជាក់ពីការបាត់ខ្លួនរបស់លោកលើបណ្តាញសង្គម ហ្វេសប៊ុក កាលពីយប់ថ្ងៃអង្គារ ទី ២០ ខែសីហា ដោយនិយាយថា លោកបានធ្វើដំណើរពីហុងកុងទៅកាន់ទីក្រុង Shenzhen កាលពីថ្ងៃព្រឹកថ្ងៃទី ៨ ខែសីហា សម្រាប់ទស្សនកិច្ចធុរកិច្ចមួយ៕
Tag:
ចិន
ហុងកុង
ចក្រភពអង់គ្លេស
ស្ថានកុងស៊ុល
© រក្សាសិទ្ធិដោយ thmeythmey.com
