ក្លិបបាល់ទាត់បឹងកេតបង្កើតមូលនិធិសម្បុរសធម៌ ដើម្បីប្រមូលថវិកាជួយជនក្រីក្រ កុមារកំព្រា និងជនរងគ្រោះដោយបាតុភូតធម្មជាតិ។ តាមពិតមូលនិធិនេះបានបង្កើតឡើងតាំងពីឆ្នាំ២០១៨ គ្រាន់តែមិនបើកទូលាយឲ្យសប្បុរសនិងមហាជនចូលរួម។ គោលបំណងធំរបស់មូលនិធិនេះ គឺចង់ផ្សារភ្ជាប់សកម្មភាពមនុស្សធម៌ជាមួយបាល់ទាត់ និងផ្តល់ឱកាសដល់សិក្សានុសិស្សនៅតាមតំបន់ដាច់ស្រយាលបានលេងបាល់ទាត់ជាដើម។
ក្រៅពីរួមចំណែកអភិវឌ្ឍន៍វិស័យកីឡាបាល់ទាត់ ការចូលរួមចំណែកក្នុងសកម្មភាពមនុស្សធម៌ គឺជាគោលបំណងសំខាន់មួយផងដែរសម្រាប់ក្លិបបាល់ទាត់បឹងកេត។ ដោយចង់រួមចំណែកក្នុងសកម្មភាពសង្គម ក្លិបបឹងកេតកាលពីពេលថ្មីៗ បានបង្កើតមូលនិធិសប្បុរសធម៌មួយឡើង ដើម្បីប្រមូលថវិកាជួយជនក្រីក្រ កុមារកំព្រា និងជនរងគ្រោះដោយសារគ្រោះធម្មជាតិ និងបញ្ហាផ្សេងៗ។
មូលនិធិនេះបើកទូលាយក្នុងការចូលរួមសម្រាប់សប្បុរសជន និងមហាជនទូទៅ ដែលមានបំណងចង់ចូលរួមចំណែកសកម្មភាពមនុស្សធម៌។ ក្នុងន័យនេះ អ្នកគាំទ្រដែលមកទស្សនារាល់ការប្រកួតក្លិបបឹងកេតធ្វើម្ចាស់ផ្ទះ មិនត្រឹមតែបានរួមចំណែកជួយលើកទឹកចិត្តកីឡាករ និងអភិវឌ្ឍន៍វិស័យកីឡាបាល់ទាត់ប៉ុណ្ណោះទេ ថែមទាំងបានចូលរួមចំណែកក្នុងអំពើមនុស្សធម៌ទៀតផង។
លោកស្រី ពុធ ធីតា និងស្វាមីពេលបរិច្ចាគថវិកាចូលវិភាគទានសប្បុរសធម៌របស់បឹងកេត
ជាក់ស្តែងក្នុងជំនួបរវាងក្រុមបឹងកេតជាមួយវិសាខាក្នុងពានរង្វាន់ក្របខណ្ឌមិត្តហ្វូនខេមបូឌានលីគ កាលពីថ្ងៃទី១៧ សីហា នៅកីឡដ្ឋានខេមបូឌាអ៊ែរវ៉េ ក្លិបបឹងកេតបានរៀបចំកម្មវិធីភាគទានសប្បុរសធម៌ ដើម្បីរៃអង្គាសថវិកាពីទស្សនិកជនដែលមកទស្សនាការប្រកួតផ្ទាល់នៅទីនោះ។
ក្នុងឱកាសនោះលោកស្រី ពុធ ធីតា ប្រធានក្លិបបឹងកេតបានលើកឡើងថា៖«ដោយសារកីឡដ្ឋានរបស់យើង នៅមិនទាន់រួចរាល់ជាផ្លូវការ ហើយយើងក៏មិនទាន់លក់សំបុត្រចូលទស្សនាផងនោះ ដូច្នេះយើងក៏បានបង្កើតនូវការដាក់ប្រអប់មូលនិធិសប្បុរសធម៌ជំនួសវិញ។ ដូច្នេះអ្នកគាំទ្រអាចចូលរួមទស្សនាដោយសេរីហើយ ថែមទាំងអាចចូលរួមថវិកាក្នុងមូលនិធិសប្បុរសធម៌យើង»។
បើតាមលោក បែ មករា អ្នកចាត់ការទូទៅក្លិបបឹងកេត មូលនិធិខាងលើបានបង្កើតឡើងតាំងពីឆ្នាំ២០១៨ ពោលគឺតាំងពីលោកស្រី ពុធ ធីតា ចូលមកដឹកនាំ។ ប៉ុន្តែសកម្មភាពរៃអង្គាសថវិកានៅពេលនោះមិនទាន់បើកទូលាយដូចបច្ចុប្បន្ននោះទេ ដោយថវិកាភាគទានភាគច្រើនបានពីការបរិច្ចាគរបស់ប្រធាន និងសមាជិកប្រតិបត្តិរបស់ក្លិប។
នៅឆ្នាំ២០១៨ មូលនិធិនេះបានទិញសម្ភារ និងគ្រឿងបរិក្ខាមួយចំនួនដាក់មន្ទីរពេទ្យកុមារជាតិ និងជួយដល់ក្មេងៗ ដែលកំពុងសម្រាកព្យាបាលនៅទីនោះ។ បន្ទាប់មកបានជួយដល់ជនរងគ្រោះដោយសារគ្រោះទឹកជំនន់ចំនួន២០០គ្រួសារដែលស្ថិតនៅក្នុងភូមិព្រែកតូច ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ។
នៅឆ្នាំ២០១៩ មូលនិធិសប្បុរសធម៌របស់ក្លិបបឹងកេតនឹងចុះទៅកាន់សាលារៀននៅតាមដាច់ស្រយាល ដើម្បីចែកសម្ភារសិក្សាដូចជាសៀវភៅ ប៊ិច ខ្មៅដៃ និងសម្ភារសិក្សាផ្សេងៗដល់សិស្សានុសិស្ស។ ក្នុងអំឡុងពេលចុះចែកសម្ភារនោះដែរ ក្លិបបឹងកេតនឹងរៀបចំកម្មវិធីចែករំលែកបទពិសោធបាល់ទាត់ ដល់យុវជន យុវនារី ក៏ដូចជាផ្តល់ឱកាសឲ្យពួកគេបានបង្ហាញសមត្ថភាពនិងលេងបាល់ទាត់ជាមួយកីឡាករកំពុងប្រកបអាជីពនៅបឹងកេត។ ប៉ុន្តែមកទល់ពេលនេះក្លិបបឹងកេតមិនទាន់រកឃើញទីតាំងដែលត្រូវចុះទៅនៅឡើយទេ៕