ភរិយា​លោក លី សៀន​ឡុង ការពារ​ស្វាមី​ជុំវិញ​រឿង​ទទួល​ប្រាក់បៀវត្សច្រើន​លើស​មេដឹកនាំ​ដទៃ​
អន្តរជាតិ
ភរិយា​លោក លី សៀន​ឡុង ការពារ​ស្វាមី​ជុំវិញ​រឿង​ទទួល​ប្រាក់បៀវត្សច្រើន​លើស​មេដឹកនាំ​ដទៃ​
22, Aug 2019 , 7:19 pm        
រូបភាព
លោកនាយករដ្ឋមន្ត្រីសិង្ហបុរី លី សៀនឡុង និងភរិយាលោក គឺលោកស្រី Ho Ching (ប្រភពរុប៖ FB លោកលី)
លោកនាយករដ្ឋមន្ត្រីសិង្ហបុរី លី សៀនឡុង និងភរិយាលោក គឺលោកស្រី Ho Ching (ប្រភពរុប៖ FB លោកលី)
​លោកស្រី Ho Ching ដែលជា​ភរិយា​លោកនាយក​រដ្ឋមន្ត្រី​សិង្ហ​បុរី លី​សៀន​ឡុង បាន​ប្រើប្រាស់​បណ្តាញ​សង្គម​ហ្វេ​ស​ប៊ុ​ក សរសេរ​ការពារ​ប្រាក់បៀវត្ស​ស្វាមី​លោកស្រី ដែលមាន​ចំនួន​ច្រើន​ហួសហេតុ​ដល់​ទៅ​៧​ខ្ទង់​។

 
​អត្ថបទ​ចំណងជើង​ថា «​ហេតុអ្វី​ប្រាក់បៀវត្ស​នាយករដ្ឋមន្ត្រី​សិង្ហ​បុរី​ខ្ពស់​ខ្លាំង​បែបនេះ​?»  ដែល​ចុះផ្សាយ​ដោយ​គេហទំព័រ Blog ក្នុងស្រុក​មួយ ឈ្មោះថា Seedly បាន​ប្រៀបធៀប​ប្រាក់ខែ​របស់លោក លី សៀន​ឡុង ទៅនឹង​ប្រធានាធិបតី​អាមេរិក ដូ​ណា​ល់ ត្រាំ​, ប្រធាន​ប្រតិបត្តិ​ទ​តំបន់​រដ្ឋបាល​ពិសេស​ហុងកុង លោកស្រី ការី ឡាំ និង​មេដឹកនាំ​ផ្សេងទៀត​។ 
 
​ឆ្លើយតប​នឹង​អត្ថបទ​នេះ លោកស្រី Ho Ching បាន​សរសេរ​នៅ​ថ្ងៃទី​២១ ខែសីហា​ថា ប្រព័ន្ធ​បើកប្រាក់​បៀវត្ស​នៅ​សិង្ហ​បុរី មាន​លក្ខណៈ​គួរ​ឲ្យ​កត់សម្គាល់ ព្រោះថា​វា​ពុំមាន​អត្ថប្រយោជន៍​អ្វី​ផ្សេងទៀត​ក្នុងអំឡុងពេល​កាន់អំណាច ឬ​ក្រោយ​ចប់​អាណត្តិ ព្រមទាំង​គ្មាន​ប្រាក់​សោធន​និវត្តន៍​ផងដែរ​។ 
 
​លោកស្រី សរសេរ​បែបនេះ​៖ «​ក្នុងប្រទេស​ជាច្រើន ពួកគេ នឹងមាន​អត្ថប្រយោជន៍​ច្រើន​ផ្សេងទៀត អំឡុង​កាន់តំណែង ដូចជា មាន​អ្នកបម្រើ និង​ជាងកាត់សក់​ផ្ទាល់ខ្លួន​, ការធ្វើដំណើរ​ដោយ​ឥតគិតថ្លៃ​តាមរយៈ​អាកាសចរណ៍​ជាតិ ឬ​សូម្បីតែ​វិស្សមកាល​ជា​លក្ខណៈ​គ្រួសារ​ថែមទៀត​ផង ហើយ​សម្រាប់​សហរដ្ឋអាមេរិក ក៏​នឹង​រាប់បញ្ចូល​អត្ថប្រយោជន៍​មួយចំនួន ក្រោយ​ចប់​អាណត្តិ​ផងដែរ​»​។ 
 
​មាន​តួនាទី​ជា​នាយក​ប្រតិបត្តិ​ក្រុមហ៊ុន​វិនិយោគ​រដ្ឋ Temasek Holdings Ltd ផង​នោះ លោកស្រី Ho បានបញ្ជាក់​ទៀតថា មន្ត្រី​ដែល​បម្រើការ​ក្នុង​សេវា​សង្គម និង​សាធារណៈ ត្រូវការ​ចំណេះ ជំនួញ និង​ការតាំង​ចិត្ត​ខ្ពស់ ក្រៅពី​គុណសម្បត្តិ​ផ្សេងៗ​ទៀត​។ ត្រង់ចំណុច​នេះ លោកស្រី សង្កត់ធ្ងន់ថា ដោយសារ​ការ​មានគុណ​សម្បត្តិ​ល្អប្រសើរ​ទាំងនេះ រដ្ឋាភិបាល ពុំ​ត្រូវការ​កេងចំណេញ​កម្លាំង​ញើស​ឈាម​ពួកគេ ដោយ​ផ្តល់​ប្រាក់បៀវត្ស​តិចតួច​ដល់​ពួកគេ​ឡើយ​។ 
 
 
​សូមបញ្ជាក់ថា តាមរយៈ​វេ​ប​សាយ​របស់​រដ្ឋាភិបាល​សិង្ហ​បុរី ប្រាក់បៀវត្ស​ប្រចាំឆ្នាំ​របស់លោក លី សៀន​ឡុង ស្មើនឹង​ជាង ១,៥៨​លាន​ដុល្លារ (​ជាង​១៣​ម៉ឺន​ដុល្លារ ក្នុង​មួយខែ​)​។ កន្លងទៅ បុរី​រដ្ឋ​សិង្ហ​បុរី បាន​អះអាងថា ប្រាក់បៀវត្ស​ថ្នាក់​រដ្ឋមន្ត្រី​ខ្ទង់លាន​ដុល្លារ​បែបនេះ បាន​ជួយ​បង្ការ​ការ​ប្រ​ពឹ​ត្ត​អំពើពុករលួយ ព្រមទាំង​ទាក់ទាញ និង​រក្សាទុក​មនុស្ស​មា​ន​ទេពកោសល្យ​ក្នុង​ក្របខណ្ឌ​រដ្ឋ​ផងដែរ​៕


Tag:
 សិង្ហ​បុរី​
  លី​សៀន​ឡុង​
  ប្រាក់ខែ
© រក្សាសិទ្ធិដោយ thmeythmey.com