អន្តរជាតិ
អាមេរិកនិងជប៉ុនខកចិត្ត ក្រោយកូរ៉េខាងត្បូងបញ្ចប់កិច្ចព្រមព្រៀងចែកព័ត៌មានសម្ងាត់
× ខកចិត្តផង បារម្ភផង។ នេះជាអារម្មណ៍របស់សហរដ្ឋអាមេរិក និងជប៉ុន ក្រោយកូរ៉េខាងត្បូងប្រកាសបញ្ចប់កិច្ចព្រមព្រៀងចែករំលែកព័ត៌មានសម្ងាត់ជាមួយជប៉ុន។ កូរ៉េខាងត្បូង ដើរចេញពីកិច្ចព្រមព្រៀងយោធានេះ ដើម្បីជាការឆ្លើយតបនឹងវិធានការរឹតត្បិតរបស់ជប៉ុននាពេលកន្លងមក។ នៅថ្ងៃទី២២ ខែសីហា ទាំងក្រសួងការបរទេសអាមេរិក ទាំងមន្ទីរបញ្ចកោណ សុទ្ធតែអំពាវនាវឲ្យសម្ព័ន្ធមិត្តតំបន់អាស៊ីជជែកគ្នាដើម្បីដោះស្រាយបញ្ហា ខណៈបញ្ហាប្រឈមរួមគ្នានៅនឹងមុខនៅឡើយ។
កូរ៉េខាងត្បូង នៅថ្ងៃទី២២ ខែសីហា បានប្រកាសពីការសម្រេចចិត្តរបស់ខ្លួនក្នុងការបញ្ចប់កិច្ចព្រមព្រៀងសន្តិសុខទូទៅស្ដីពីព័ត៌មានយោធា (GSOMIA) ជាមួយជប៉ុន។ កិច្ចព្រមព្រៀងចែករំលែកព័ត៌មានយោធានេះ ត្រូវបានកូរ៉េខាងត្បូង យកធ្វើជាអាវុធដើម្បីគំរាមជប៉ុនដែលចាត់វិធានការរឹតត្បិតការនាំចេញរបស់ខ្លួន តែមិនអាចធ្វើឲ្យជប៉ុនមិនបន្ទន់ឥរិយាបថបាន។ ចុងក្រោយកូរ៉េខាងត្បូង ក៏ធ្វើតាមការគំរាម ហើយបញ្ចប់កិច្ចព្រមព្រៀងនេះតែម្ដង។
ភ្លាមៗក្រោយកូរ៉េខាងត្បូងប្រកាសការសម្រេចចិត្តរបស់ខ្លួន ជប៉ុនឯណោះក៏ចេញមុខប្រឆាំងតូងតែម្ដង។ រដ្ឋមន្ត្រីការបរទេសជប៉ុន តារ៉ូ កូណូ បានបញ្ជាក់ក្នុងសេចក្ដីថ្លែងការណ៍ថ្ងៃទី២២ ខែសីហា ថា ការសម្រេចចិត្តរបស់សេអ៊ូល ជារឿងគួរឲ្យសោកស្ដាយបំផុត ហើយមិនមានការគិតគូរគ្រប់ជ្រុងជ្រោយពីស្ថានការណ៍សន្តិសុខក្នុងតំបន់។ លោកបន្តថា តូក្យូ មិនអាចទទួលយកការសម្រេចចិត្តនេះបានឡើយ ដ្បិតការចែករំលែកព័ត៌មានយោធា និងរឿងពាណិជ្ជកម្ម ជាបញ្ហាពីរដាច់ស្រឡះ។
ជារឿងកម្រ អាមេរិកក៏បង្ហាញការមិនពេញចិត្តជាសាធារណៈទៅនឹងការសម្រេចចិត្តរបស់កូរ៉េខាងត្បូង ដែលជាសម្ព័ន្ធមិត្តចាក់ទឹកមិនលិចនៅអាស៊ីផងដែរ។ រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ និយាយថា អាមេរិកខកចិត្តជាខ្លាំងចំពោះការសម្រេចចិត្តរបស់កូរ៉េខាងត្បូង តែចង់ឲ្យសម្ព័ន្ធមិត្តទាំងពីរបន្តដោះស្រាយបញ្ហាដោយការជជែកគ្នា។ ដោយឡែក អ្នកនាំពាក្យក្រសួងការបរទេសអាមេរិកប្រាប់ទីភ្នាក់ងារព័ត៌មាន Yonhap ថា អាមេរិកប្រាប់សេអ៊ូលម្ដងហើយម្ដងទៀតពីផលប៉ះអវិជ្ជមាននៃការសម្រេចចិត្តបែបនេះ។
មន្ទីរបញ្ចកោណរបស់អាមេរិក ក៏ចេញមករិះគន់រដ្ឋាភិបាលប្រធានាធិបតី មូន ចេអ៊ីន ផងដែរ។ ក្នុងសេចក្ដីប្រកាសរបស់អ្នកនាំពាក្យខ្លួន ក្រសួងការពារជាតិអាមេរិកបង្ហាញក្ដីបារម្ភ និងការខកចិត្តចំពោះវិធានការរបស់រដ្ឋបាលលោក មូន ដែលមិនបន្តសុពលភាពកិច្ចព្រមព្រៀងជាមួយជប៉ុន។ អាមេរិកចង់ឃើញទំនាក់ទំនងផ្នែកសន្តិសុខ និងការពារជាតិត្រូវបានរឹតបន្តឹង ទោះកូរ៉េខាងត្បូង និងជប៉ុនទាស់គ្នារឿងអ្វីក៏ដោយចុះ។
ការសម្រេចចិត្តបញ្ចប់កិច្ចព្រមព្រៀងចែករំលែកព័ត៌មានយោធានេះ នឹងធ្វើឲ្យទំនាស់ពាណិជ្ជកម្មរវាងសម្ព័ន្ធមិត្តអាមេរិកទាំងពីរដែលផ្ដើមចេញពីសាលក្រមតុលាការកូរ៉េខាងត្បូង ផុងកាន់តែជ្រៅ។ ប្រទេសទាំងពីរ ក៏បានដកឈ្មោះគ្នាទៅមកពីបញ្ជីដៃគូគួរឲ្យទុកចិត្តបានផងដែរ។ ប្រមុខការទូតកូរ៉េខាងត្បូង និងជប៉ុន ក៏ធ្លាប់ជួបគ្នាពីរដងដែរ ប៉ុន្តែមិនអាចដោះស្រាយបញ្ហាបានឡើយ ខណៈអាមេរិកក៏ធ្លាប់អន្តរាគមន៍ដែរ តែអត់បានការដដែល។
ទោះមិនមែនជាភាគីនៃកិច្ចព្រមព្រៀងក្ដី អាមេរិកក៏ទទួលបានការចែករំលែកព័ត៌មានក្រោមក្របខណ្ឌកិច្ចសហប្រតិបត្តិការត្រីភាគីផងដែរ។ អាមេរិកចាត់ទុកកិច្ចព្រមព្រៀងនេះ ជារឿងសំខាន់ ព្រោះជួយផ្ដល់ព័ត៌មានទាក់ទងការគំរាមកំហែងរបស់កូរ៉េខាងជើង និងបញ្ហាឯទៀតនៅអាស៊ីបូព៌ា។ អស់កិច្ចព្រមព្រៀងចែករំលែកព័ត៌មាននេះទៅ អាមេរិកទំនងពិបាកប្រមូលព័ត៌មានស៊ីជម្រៅដើម្បីរៀបចំផែនការទប់ទល់ការគំរាមកំហែងនានា៕
Tag:
អាមេរិក
ជប៉ុន
កូរ៉េខាងត្បូង
© រក្សាសិទ្ធិដោយ thmeythmey.com