អន្តរជាតិ
កប៉ាល់ «ទីតានិច» កំពុងពុកផុយខ្លាំងនៅបាតសមុទ្រអាត្លង់ទិច
× កប៉ាល់ដឹកអ្នកដំណើរដ៏ល្បីមួយដែលមានឈ្មោះថា Titanic បានបង្ហាញពីការពុកផុយយ៉ាងខ្លាំងជាបណ្តើរៗ ក្រោយពីវត្តមានជាង១០០ឆ្នាំនៅខាងក្រោមទឹកសមុទ្រដ៏ប្រៃមក។ កប៉ាល់នេះ បានលិចទៅក្នុងជម្រៅសមុទ្រដ៏ត្រជាក់នៃមហាសមុទ្រអាត្លង់ទិចកាលពីឆ្នាំ១៩១២។
ក្រោយពីព្រឹត្តិការណ៍មហន្តរាយនោះមក មានបេសកម្មនាវាមុជទឹកចំនួន៥លើក បានទៅពិនិត្យខ្មោចកប៉ាល់មួយនេះ ដែលស្ថិតនៅជម្រៅ៣៨០០ម៉ែត្រក្នុងទឹកសមុទ្រ ។ បេសកកម្មទាំងនេះត្រូវបានដឹកនាំដោយក្រុមអ្នកស្រាវជ្រាវជម្រៅសមុទ្រអន្តរជាតិ។
គេហទំព័រ BBC កាលពីថ្ងៃទី២២ ខែកក្កដា បានបង្ហាញថា ទោះបីជាផ្នែកខ្លះនៃកប៉ាល់ទីតានិចនៅមានសោភ័ណភាពល្អក្តី ផ្នែកមួយចំនួនទៀត កំពុងរលាយបាត់ទៅក្នុងទឹកសមុទ្រ។ លោក Parks Stephenson អ្នកប្រវត្តិវិទូនៃកប៉ាល់ទីតានិចម្នាក់ បានបង្ហាញពីអារម្មណ៍ភ្ញាក់ផ្អើល នៅពេលលោកបានឃើញរូបភាពនៃខ្មោចកប៉ាល់នេះសាជាថ្មី ជាមួយនឹងការខូតខាតកាន់តែខ្លាំងជាមុន។
ផ្នែកខាងក្រៅសម្រាប់អ្នកដំណើរ បន្ទប់ធ្វើការរបស់អ្នកគ្រប់គ្រងនាវា និងសម្ភារជាច្រើនទៀត កំពុងពុកផុយជាបណ្តើរៗ។ លោក Parks អះអាងបែបនេះ ដោយបន្ថែមថា ចរន្តទឹកសមុទ្រខាងក្នុង ជាតិប្រៃ និងបាក់តេរីដែលប្រើប្រាស់លោហៈជាអាហារជាអ្នកដែលកំពុងពន្លើនសកម្មភាពទាំងនេះឡើង។
ទីតាំងចុងក្រោយរបស់កប៉ាល់មួយនេះគឺប្រមាណ ៦៦០គីឡូម៉ែត្រពីឆ្នេរនៃទីក្រុង Newfoundland ប្រទេសកាណាដា នៅពេលដែលកប៉ាល់នេះបានធ្វើដំណើរទៅបុកផ្ទាំងទឹកកកអណ្តែតតាមសមុទ្រដ៏ធំមួយ នៅពេលកំពុងបើកបរពីទីក្រុង Southampton ទៅកាន់ New York។ ក្នុងចំណោមជីវិតទាំង២២០០នាក់ ១៥០០នាក់មិនបានត្រលប់មកដីគោកវិញនោះទេ។
នាវាមុជទឹកដែលគេប្រើប្រាស់នេះ មានប្រវែង៤,៦ម៉ែត្រ ជាមួយនឹងកម្ពស់៣,៧ម៉ែត្រ គ្មានមនុស្សបើកបរខាងក្នុង។ នាវាមុជទឹកនេះ នឹងត្រូវទៅពិនិត្យមើលផ្នែកទាំងពីរនៃកប៉ាល់ ដែលបានបាក់ជាពីរកំណាត់ នឹងមានទីតាំងប្រមាណជា៦០០ម៉ែត្រពីកំណាត់មួយ ទៅកំណាត់មួយទៀត។
គួរឲ្យបញ្ជាក់ផងដែរថា ទីតាំងលិចរបស់កប៉ាល់ទីតានិចត្រូវបានគេរកឃើញនៅក្នុងឆ្នាំ១៩៨៥ និងការចុះទៅពិនិត្យផ្ទាល់ដំបូងគឺនៅក្នុងឆ្នាំ១៩៨៦។ ក្នុងឆ្នាំ១៩៩៥ លោក James Cameron ដែលជាអ្នកដឹកនាំរឿង «ទីតានិច» បានចុះទៅមើលផ្ទាល់ និងរឿងថតប្លង់មួយចំនួនដែលប្រើប្រាស់ក្នុងភាពយន្ត។ ក្នុងឆ្នាំ២០១២ តំបន់ទីតានិចត្រូវបានក្លាយជាទីតាំងអភិរក្សនៃអង្គការយូណេស្កូ៕
© រក្សាសិទ្ធិដោយ thmeythmey.com