អន្តរជាតិ
នយោបាយអន្តរជាតិ
ចិនយកពន្ធលើទំនិញអាមេរិក៧៥ពាន់លានដុល្លារ ឯអាមេរិកដំឡើងពន្ធមានស្រាប់
ប្រធានាធិបតីអាមេរិក ដូណាល់ ត្រាំ និងប្រធានាធិបតីចិន ស៊ី ជិនភីង នាជំនួបនៅជប៉ុន។ រូបភាព AFP
×![]()
ដោយ: តន ចាន់រិទ្ធារ៉ា
ជម្លោះពាណិជ្ជកម្មរវាងអាមេរិក និងចិន ហាក់មិនបានធូរស្រាលឡើយ តែរឹតតែតានតឹងទៅៗ។ នៅថ្ងៃទី២៣ ខែសីហា ទាំងអាមេរិក ទាំងចិន សុទ្ធតែបានប្រកាសដាក់ពន្ធលើទំនិញគូប្រជែងរបស់ខ្លួន។ ចិនប្រកាសដាក់ពន្ធលើទំនិញអាមេរិក ជាការឆ្លើយតបនឹងគម្រោងយកពន្ធរបស់អាមេរិកដែលប្រធានាធិបតី ដូណាល់ ត្រាំ ប្រកាសកាលពីដើមខែសីហានេះ។ លោក ត្រាំ ក៏ច្រឡោតតូង ហើយក៏ប្រកាសដំឡើងពន្ធលើទំនិញដែលខ្ពស់ស្រាប់ហើយនោះ ឲ្យកាន់តែខ្ពស់មួយកម្រិតទៀត។ 
សហរដ្ឋអាមេរិក និងចិន បន្តប្រឈមមុខសមរភូមិសង្គ្រាមពាណិជ្ជកម្មដែលមានអាយុលើសមួយឆ្នាំទៅហើយនោះ ដោយបានប្រកាសដាក់ពន្ធលើទំនិញតម្លៃរាប់ពាន់លានដុល្លារលើទំនិញគ្នាទៅវិញទៅមកនៅថ្ងៃទី២៣ ខែសីហា។ អាចថា ជារឿងគួរភ្ញាក់ផ្អើលបន្តិចដែរ ដែលមហាអំណាចសេដ្ឋកិច្ចពិភពលោកទាំងពីរ វាយគ្នាមួយធ្ងន់ម្នាក់ម្ដងបែបនេះ ខណៈមេដឹកនាំកំពូលបានជួបគ្នាដើម្បីបន្ថយស្ថានការណ៍ ឯមន្ត្រីចរចាក៏ត្រៀមជួបគ្នាដែរនោះ។
ចិនដែលប្រកាន់ជំហរចរចាជាជាងការប្រើធម៌ក្ដៅ បានប្រកាសដាក់ពន្ធចំនួន៧៥ពាន់លានដុល្លារលើទំនិញអាមេរិក។ ការយកពន្ធនេះ ជាការឆ្លើយតបនឹងផែនការយកពន្ធរបស់ក្រុងវ៉ាស៊ីនតោនដែលនឹងអនុវត្តនឹងខែកញ្ញាខាងមុខ។ បើតាមការិយាល័យពន្ធក្រុមប្រឹក្សារដ្ឋចិន ទំនិញអាមេរិកចំនួនជាងប្រាំពាន់មុខ នឹងស្ថិតក្រោមគម្រោងយកពន្ធនេះ ដែលត្រូវអនុវត្តជាពីរដំណាក់កាល គឺនៅថ្ងៃទី១ ខែកញ្ញា និងទី១៥ ខែធ្នូខាងមុខ។
ភ្លាមៗ ប្រធានាធិបតីអាមេរិក ដូណាល់ ត្រាំ ក៏ប្រកាសបង្កើនការយកពន្ធលើទំនិញចិនដែលមានតម្លៃដល់ទៅ៥៥០ពាន់លានដុល្លារ គឺទាំងទំនិញដែលត្រូវបានដំឡើងពន្ធនាំចូលកន្លងមក និងទំនិញដែលស្ថិតក្នុងបញ្ជីត្រូវដំឡើងនៅខែកញ្ញាខាងមុខ។ ដោយខឹងចិនជាខ្លាំងនោះ លោក ត្រាំ ប្រកាសថា ទំនិញចិនតម្លៃ២៥០ពាន់លានដុល្លារដែលរងពន្ធ២៥ភាគរយស្រេចហើយនោះ នឹងត្រូវដំឡើងទៅដល់៣០ភាគរយហើយចាប់អនុវត្តពីថ្ងៃទី១ ខែតុលាតទៅ។
ចំណែកឯទំនិញតម្លៃ៣០០ពាន់លានដុល្លារដែលនឹងត្រូវយកពន្ធ១០ភាគរយនៅថ្ងៃទី១ ខែកញ្ញាតទៅនោះ នឹងត្រូវដំឡើង៥ភាគរយទៀត ទៅជា១៥ភាគរយវិញ។ តាមរយៈ Twitter របស់ខ្លួន លោកត្រាំ និយាយថា ចិនមិនគួរដាក់ពន្ធលើទំនិញចិនតម្លៃ៧៥ពាន់លានដុល្លារឡើយ។
ជាមួយគ្នានេះ លោក ត្រាំ ក៏ប្រាប់ឲ្យក្រុមហ៊ុនអាមេរិកដែលរកស៊ីនៅចិន រើចេញភ្លាមទៅកាន់ទីតាំងថ្មី ដោយការបង្កើតការងារក្នុងទឹកដីអាមេរិកវិញ ក៏ជាជម្រើសមួយដែរ។ ប្រធានាធិបតីអាមេរិកដែលអនុវត្តនយោបាយ America First នេះ បញ្ជាក់ថា អាមេរិក មិនត្រូវការចិនឡើយ ហើយក៏នឹងកាន់តែប្រសើរឡើង បើគ្មានចិននោះ។ គេមិនច្បាស់ថា លោក ត្រាំ ពឹងលើអ្វីដែលផ្ដល់សិទ្ធិឲ្យលោកបញ្ជាក្រុមហ៊ុនឯកជនអាមេរិកនោះ។
Tag:
អាមេរិក
ចិន
ដូណាល់ ត្រាំ
សង្គ្រាមពាណិជ្ជកម្ម
© រក្សាសិទ្ធិដោយ thmeythmey.com
