កីឡាជាតិ
ជាតិ
តើបឹងកេតអាចបង្អាក់ដំណើរ និងធ្វើឲ្យស្វាយរៀងស្គាល់បរាជ័យលើកដំបូងបានទេនៅថ្ងៃនេះ?
×
ការប្រកួតក្របខណ្ឌមិត្តហ្វូនខេមបូឌានលីគបានឈានដល់សប្តាហ៍ទី២១ ដោយនៅសៅរ៍ទី២៤ ខែសីហានេះ មានការប្រកួតចំនួន៤គូ ដែលរៀបចំនៅទីលានផ្សេងៗគ្នា។ ការប៉ះគ្នារវាងបឹងកេតជាមួយព្រះខ័នរាជស្វាយរៀង នៅកីឡដ្ឋានខេមបូឌាអ៊ែរវ៉េ នាវេលាម៉ោង៣:៣០នាទីរសៀល និងក្លាយជាការប្រកួតដ៏តានតឹងនិងជក់ចិត្តបំផុត។ បន្ថែមលើនេះ ក៏មានការប្រកួត៣គូទៀតផងដែរ។
ការប៉ះគ្នានៅថ្ងៃនេះ វាជាឱកាសសម្រាប់ក្រុមបឹងកេតក្នុងការបង្អាក់ដំណើរទៅមុខរបស់ព្រះខ័នរាជស្វាយរៀង ដែលកំពុងគ្រងកំពូលតារាងជាមួយកំណត់ត្រាមិនទាន់ស្គាល់ចាញ់។ បើបឹងកេតអាចប្រើភាពមានប្រៀបក្នុងនាមម្ចាស់ផ្ទះយកឈ្នះនៅថ្ងៃនេះ បឹងកេតនឹងក្លាយជាក្រុមទី១ ដែលធ្វើឲ្យព្រះខ័នរាជស្វាយរៀងស្គាល់បរាជ័យជាលើកដំបូង។ លើសពីនេះ វាជួយបង្កើនឱកាសសម្រាប់ពួកគេក្នុងការបន្តប្រជែងដណ្តើមជើងឯកនៅរដូវកាលនេះ។
ចំណែកព្រះខ័នរាជស្វាយរៀង ក៏មិនខុសពីបឹងកេតដែរ គឺពួកគេត្រូវការឈ្នះនៅថ្ងៃនេះ ដើម្បីរក្សាកំណត់ត្រាមិនស្គាល់ចាញ់និងរក្សាគម្លាតឲ្យកាន់តែឆ្ងាយពីគូប្រជែងក្នុងការឈានទៅលើកពាននៅរដូវកាលនេះ។ ដូច្នេះការជួបគ្នារវាងក្រុមទាំងពីរ នៅកីឡដ្ឋានខេមបូឌាអ៊ែរវ៉េងវេលាម៉ោង៣:៣០នាទីរសៀលនេះ នឹងក្លាយជាប្រកួតដ៏ស្វិតស្វាញបំផុត។ នាការប្រកួតជើងទី១នៅកីឡដ្ឋានខេត្តស្វាយរៀងក្រុមទាំងពីរបានបញ្ចប់ក្នុងលទ្ធផលស្មើ ២-២។ បច្ចុប្បន្នបឹងកេតស្ថិតនៅលេខរៀងទី៤មាន៤១ពិន្ទុ ខណៈស្វាយរៀងស្ថិតនៅកំពូលតារាងមាន៥២ពិន្ទុ។
នៅម៉ោង៣:៣០នាទីរសៀលនេះដែរ ក្រុមឈរបាតតារាងយុវជនអាយុក្រោម១៨ឆ្នាំបាទី ត្រូវបើកទ្វារកីឡដ្ឋានសាលាបាល់ទាត់ជាតិបាទីស្វាគមន៍វិសាខា។ ជ័យជម្នះជារឿងចាំបាច់សម្រាប់វិសាខា ព្រោះពួកគេត្រូវការឈ្នះនៅថ្ងៃនេះ ដើម្បីឡើងទៅឈរលេខ២បណ្តោះអាសន្ន ក៏ដូចបង្កើនឱកាសក្នុងការប្រជែងដណ្តើមជើងឯក។ បច្ចុប្បន្នក្រុមមានមូលដ្ឋាននៅភ្នំពេញមួយនេះ ស្ថិតនៅលេខរៀងទី៣មាន៤៤ពិន្ទុ ដែលមានគម្លាត៨ពិន្ទុពីក្រុមកំពូលតារាង។ កាលជើងទី១វិសាខាយកឈ្នះ U18 បាទីក្នុងលទ្ធផល ៥-១។
នៅម៉ោង៦ល្ងាច ក្រុមភ្នំពេញក្រោនត្រូវបើកទ្វារកីឡដ្ឋាន R.S.N ស្វាគមន៍សូលទីឡូអង្គរ ដើម្បីជម្រះបញ្ជីចាស់ ដែលពួកគេបានរងបរាជ័យ ១-០ នៅលើទឹកដីខេត្តសៀមរាប។ ទោះបីភ្នំពេញក្រោនអស់ឱកាសក្នុងការប្រជែងដណ្តើមជើងឯក តែពួកគេត្រូវការឈ្នះនៅថ្ងៃនេះ ដើម្បីបង្កើនឱកាសប្រជែងដណ្តើមជើងឯករង។ បច្ចុប្បន្នភ្នំពេញក្រោនស្ថិតនៅលេខរៀងទី៧មាន៣២ពិន្ទុ ខណៈសូលទីឡូអង្គរឈរលេខរៀងទី៩មាន២៣ពិន្ទុ។
នៅម៉ោង៦ល្ងាចនេះដែរ ក្រុមក្រសួងការពារជាតិបើកទ្វារកីឡដ្ឋានស្តាតចាស់សងសឹកគីរីវង់សុខសែន ដែលពួកគេបានចាញ់ ៤-១ នៅជើងទី១។ ក្រៅពីដើម្បីជម្រះបញ្ជីចាស់ ជ័យជម្នះជារឿងចាំបាច់សម្រាប់ក្រសួងការពារជាតិ ព្រោះបើពួកគេចាញ់នៅថ្ងៃនេះ នោះឱកាសប្រជែងដណ្តើមជើងឯករបស់ពួកគេ អាចនឹងបាត់បង់។ បច្ចុប្បន្នក្រសួងការពារជាតិស្ថិតនៅលេខរៀងទី៦មាន៣៥ពិន្ទុ៕
Tag:
ព្រះខ័នរាជស្វាយរៀង
បឹងកេត
Cambodian League 2019
© រក្សាសិទ្ធិដោយ thmeythmey.com