សម្ដេច ហ៊ុន សែន ចរចាតាមទូរសព្ទជាមួយនាយករដ្ឋមន្ត្រីឡាវ ពីរឿងកងទ័ពនៅតំបន់ព្រំដែន

ជាតិ

នយោបាយជាតិ

សម្ដេច ហ៊ុន សែន ចរចាតាមទូរសព្ទជាមួយនាយករដ្ឋមន្ត្រីឡាវ ពីរឿងកងទ័ពនៅតំបន់ព្រំដែន

24, Aug 2019 , 2:14 pm

រូបភាព

នាយករដ្ឋមន្ត្រីកម្ពុជា-ឡាវ ធ្វើសន្និសីទកាសែតជាមួយគ្នា នៅថ្ងៃទី៥ ខែធ្នូ ឆ្នាំ២០១៨។ រូបពីទំព័រហ្វេសប៊ុករបស់សម្តេច ហ៊ុន សែន

ដោយ: ថ្មីៗ

ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បានចរចាជាមួយនាយករដ្ឋមន្ត្រីឡាវ តាមទូរសព្ទ ដោយស្នើសុំឱ្យរក្សាភាពស្ងៀមស្ងាត់នៅតំបន់ព្រំដែនស្ថិតនៅមុំបី ក្នុងស្រុកជាំក្សាន្ត ខេត្តព្រះវិហារ។

តាមរយៈការចរចាគ្នានោះសម្ដេច ហ៊ុន សែន បានស្នើឱ្យភាគីឡាវ ដកកងទ័ពចេញពីតំបន់មុំបីនោះ ហើយកម្ពុជាក៏ដកកម្លាំងចេញដូចគ្នាដែរ ដើម្បីទុកពេលចរចាបន្តទៀត។ បើតាមប្រមុខរដ្ឋាភិបាលកម្ពុជា ស្ថានភាពនៅតំបន់ព្រំដែននោះ គ្មានភាពតានតឹងឡើយ។

តាមរយៈការចុះផ្សាយរបស់សារព័ត៌មាន Fresh News ដែលបានស្រង់សម្តីលោកនាយករដ្ឋមន្ត្រីយ៉ាងដូច្នេះថា៖««នៅព្រឹកមិញវេលាម៉ោង៩ ខ្ញុំបានជួបផ្ទាល់ទូរស័ព្ទ ជាមួយនាយករដ្ឋមន្ត្រី ឯកឧត្តម ថងលូន ស៊ីស៊ូលីត ដោយមានការចរចាល្អ និយាយជាមួយគ្នាដោយរីករាយ ហើយសម្រេចឲ្យកងទ័ព នៃប្រទេសទាំង២ ដកចេញពីតំបន់មុំបី ដែលមិនទាន់ដោះស្រាយចប់ និងបន្តជួបចរចាគ្នាទៀត ហើយរហូតមកដល់ពេលនេះ មិនមានភាពតានតឹងនោះទេ ដោយកងទ័ពរបស់យើងទាំង២ នៅជាមួយគ្នា ស៊ីបាយជាមួយគ្នា ។ដូច្នេះសូមប្រជាពលរដ្ឋ របស់យើងទាំងអស់ កុំមានការបារម្ភឲ្យសោះ»។

កងទ័ពឡាវបាននាំគ្នាចូលមកកាន់កាប់ទឹកដីខ្មែរក្នុងចំនុចទន្លេរពៅនេះ ក្នុងតំបន់មុំបីនៃ ស្រុកឆែប ខេត្តព្រះវិហារ តាំងពីថ្ងៃទី១៤ ខែសីហាមកម្ល៉េះ ដោយពួកគេសំអាងថា តំបន់នោះជាទឹកដីរបស់គេ។ នេះបើតាមអ្នកនាំពាក្យកងទ័ពជើងគោក លោក ម៉ៅ ផល្លារ ដែលបានប្រាប់សារព័ត៌មានថ្មីៗបន្ថែមថា ភាគីកម្ពុជា និងឡាវ កំពុងដោះស្រាយបញ្ហានេះ៕