សង្គមអន្តរជាតិ
អន្តរជាតិ
Angelina Jolie ជូនកូនប្រុស Maddox ចូលរៀនសាកលវិទ្យាល័យមួយនៅកូរ៉េ
× វត្តមានរបស់អ្នកម្តាយ ជារឿងដ៏សំខាន់សម្រាប់ជំរុញកូនឲ្យប្រឹងរៀន។ តារាភាពយន្តជនជាតិអាមេរិក លោកស្រី Angelina Jolie បានជូនកូនប្រុស Maddox ដែលមានដើមកំណើតខ្មែរ ទៅបន្តការសិក្សាថ្នាក់ឧត្តមសិក្សានៅប្រទេសកូរ៉េខាងត្បូង។
ក្នុងវីដេអូមួយ ដែលបានបង្ហោះលើបណ្តាញសង្គម កាលពីថ្ងៃពុធទី ២១ សីហា បង្ហាញថា កំពូលតារាសម្តែងដែលឈ្នះពានរង្វាន់ Oscar លោកស្រី Jolie បានបង្ហាញខ្លួននៅសាកលវិទ្យាល័យ Yonsei ក្នុងទីក្រុង សេអ៊ូល ប្រទេសកូរ៉េខាងត្បូង ជាមួយនឹងកូនប្រុស Maddox ។
វត្តមានរបស់លោកស្រី Jolia គឺដើម្បីជូនយុវជន Maddox ដែលបច្ចុប្បន្នមានអាយុ ១៨ឆ្នាំ ទៅបន្តការសិក្សាមុខជំនាញជីវគីមីសាស្ត្រ (Biochemistry) នៅសាលានេះ ។ ទង្វើនេះ ជាការផ្តល់កម្លាំងចិត្តដល់កូនប្រុស ព្រោះថាវាជាថ្ងៃទីមួយរបស់ Maddox នៅសាកលវិទ្យាល័យ Yonsei ។ តាមរយៈវីដេអូ តារាសម្តែងវ័យ ៤៤ឆ្នាំរូបនេះ បាននិយាយថា៖ «ខ្ញុំចាកចេញថ្ងៃនេះ ព្រោះថាវាជាថ្ងៃដែលខ្ញុំទុក Maddox ឲ្យនៅសិក្សាក្នុងសាកលវិទ្យាល័យនេះ»។
យ៉ាងណាមិញ ការទុកកូនប្រុស Maddox បន្តការសិក្សាតែឯងក្នុងទីក្រុងសេអ៊ូល ខណៈលោកស្រី ត្រលប់ទៅកាន់អាមេរិក ពុំមែនជារឿងងាយស្រួលឡើយសម្រាប់អ្នកម្តាយរូបនេះ។ ទោះជាបែបនេះ ក្នុងកិច្ចសម្ភាសមួយជាមួយទស្សនាវដ្តីអាមេរិក In Touch Weekly នាពេលកន្លងទៅ តារាសម្តែងដែលមានសញ្ជាតិកម្ពុជាដែរនោះ បានលើកឡើងថា លោកស្រី មានមោទកភាពចំពោះ Maddox ។
«ខ្ញុំព្យាយាមទប់ទឹកភ្នែកមិនឲ្យហូរចុះមក»។ លោកស្រី Jolie និយាយបែបនេះ ដោយងាកទៅសំឡឹងមុខកូនប្រុស Maddox ដែលលោកស្រីបានទទួលចិញ្ចឹម កាលពីឆ្នាំ ២០០២។ កាលនោះ ក្មេងប្រុសរូបនេះ ទើបមានអាយុជិត ៧ ខែប៉ុណ្ណោះ។ ក្រៅពី Maddox លោកស្រី មានកូនៗ ប្រាំនាក់ផ្សេងទៀត៕
Tag:
Angelina Jolie
Maddox
© រក្សាសិទ្ធិដោយ thmeythmey.com