អាស៊ាននិងអាមេរិក នឹងរៀបចំសមយុទ្ធយោធាជើងទឹកលើកដំបូងនៅខែក្រោយ

អន្តរជាតិ

នយោបាយអន្តរជាតិ

អាស៊ាននិងអាមេរិក នឹងរៀបចំសមយុទ្ធយោធាជើងទឹកលើកដំបូងនៅខែក្រោយ

25, Aug 2019 , 8:59 am

រូបភាព

សមយុទ្ធយោធានៅទឹកដីថៃនាពេលកន្លងមក។ រូបភាព US Navy

ដោយ: ថ្មីៗ

អាស៊ាន និងអាមេរិកនឹងរួមគ្នាធ្វើសមយុទ្ធយោធាជើងទឹកជាលើកដំបូង នៅឈូងសមុទ្រថៃនៅខែកញ្ញាខាងមុខ។ នេះបើតាមប្រភពព័ត៌មានអាស៊ានដែលផ្សាយដោយទីភ្នាក់ងារព័ត៌មានជប៉ុន Kyodo ។ សមយុទ្ធនេះ ធ្វើឡើងក្រោយចិន និងអាស៊ានបានរៀបចំសមយុទ្ធជើងទឹករួមគ្នាផងដែរ។

ការធ្វើសមយុទ្ធយោធាជើងទឹករវាងប្រទេសសមាជិកអាស៊ាន ជាមួយយោធាអាមេរិក នឹងមានរយៈពេល៥ថ្ងៃដែលផ្ដើមពីថ្ងៃទី២ ខែកញ្ញា។ ក្នុងនោះ នាវាចម្បាំងចំនួន៨គ្រឿង នឹងចូលរួមក្នុងលំហាត់រួមគ្នាលើកដំបូងនេះ ដោយមានអមយន្តហោះច្រើនគ្រឿងទៀត។

ទីភ្នាក់ងារព័ត៌មាន Kyodo ដែលស្រង់ប្រភពពីអាស៊ានផ្សយថា សមយុទ្ធនេះនឹងចាប់ផ្តើមចេញពីមូលដ្ឋានកងទ័ពជើងទឹក Sattahip ក្នុងប្រទេសថៃ ហើយបន្តធ្វើនៅប្រទេសវៀតណាមក្នុងខេត្ត Ca Mau ទៀត។

សមយុទ្ធយោធាអាស៊ាន និងអាមេរិកជាលើកដំបូងនេះ មានគោលបំណងចង់រក្សាតុល្យភាពរវាងអាមេរិក និងចិនក្នុងតំបន់អាស៊ីអាគ្នេយ៍។ មហាអំណាចទាំងពីរនេះ បានប្រជែងឥទ្ធិពលយ៉ាងខ្លាំងនៅក្នុងតំបន់នេះ ជាពិសេសគឹនៅតំបន់សមុទ្រចិនខាងត្បូង។

កាលពីឆ្នាំមុន ចិន និងអាស៊ានក៏បានធ្វើសមយុទ្ធយោធាជើងទឹករួមគ្នារួចមកហើយយ។ សមយុទ្ធចិន-អាស៊ាន ប្រព្រឹត្តធ្វើឡើងនៅខែតុលា នៅខេត្ត គ័ងទុង ដោយសមាជិកអាស៊ានទាំងអស់សុទ្ធតែមានវត្តមាន។

ចំណែកសមយុទ្ធជាមួយអាមេរិកវិញ ប្រភពមួយនិយាយថា គ្រប់ប្រទេសនៅអាស៊ាននឹងចូលរួមក្នុងការធ្វើសមយុទ្ធនេះ ដែលរៀបចំឡើងដោយកងទ័ពជើងទឹកអាមេរិក និងថៃផងដែរ។

ដើម្បីអនុវត្តសមយុទ្ធនេះ ក្រុមកាងារចម្រុះមួយនឹងត្រូវបានបង្កើតឡើងដោយមានស្នាក់ការលើនាវាយាមល្បាតរបស់ថៃដែលដឹកនាំដោយមន្ត្រីកងទ័ពជើងទឹកជាន់ខ្ពស់ថៃ រួមជាមួយអាមេរិកនិងយោធាជើងទឹកប្រទេសសមាជិកអាស៊ានផ្សេងទៀត។

ក្រុមនាវា Destroyer Squadron 7 ដែលជាផ្នែកមួយនៃកងនាវាចរណ៍ទី៧ កងទ័ពជើងទឹកអាមេរិក នឹងចូលរួមក្នុងសមយុទ្ធនេះ៕

ដោយ៖ ងួន សុភាវត្តី