ឥណ្ឌូណេស៊ីចង់ឲ្យអង់គ្លេសមានជំហរច្បាស់លាស់ជាមួយអាស៊ាន ខណៈអង់គ្លេសកំពុងរកច្រកចេញពីសហភាពអឺរ៉ុប

អន្តរជាតិ

នយោបាយអន្តរជាតិ

ឥណ្ឌូណេស៊ីចង់ឲ្យអង់គ្លេសមានជំហរច្បាស់លាស់ជាមួយអាស៊ាន ខណៈអង់គ្លេសកំពុងរកច្រកចេញពីសហភាពអឺរ៉ុប

25, Aug 2019 , 7:39 pm

រូបភាព

ឯកអគ្គរដ្ឋទូតឥណ្ឌូណេស៊ីប្រចាំអង់គ្លេសលោក Rizal Sukma (រូបភាព៖ The Jakarta Post)

ដោយ:

រដ្ឋាភិបាលឥណ្ឌូណេស៊ី ចង់ឲ្យរដ្ឋាភិបាលអង់គ្លេសបង្ហាញពីភាពច្បាស់លាស់នៃផែនការយុទ្ធសាស្ត្ររបស់ខ្លួនមកកាន់តំបន់អាស៊ីអាគ្នេយ៍ ជាពិសេសនោះអាស៊ានតែម្តង។ ឥណ្ឌូណេស៊ី ដែលជាស្ថាបនិកមួយរបស់អាស៊ាន ចង់បានបែបនេះ ដើម្បីជាផ្នែកមួយ នៃមូលដ្ឋានសម្រាប់ការពង្រឹងការកសាងគោលនយោបាយការបរទេសឲ្យកាន់តែស៊ីជម្រៅ និងរឹងមាំជាងមុន។

ពីវេទិកាកិច្ចសន្ទនារវាងឥណ្ឌូណេស៊ី-អង់គ្លេស ដែលរៀបចំដោយមជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិ អគ្គរដ្ឋទូតឥណ្ឌូណេស៊ីប្រចាំអង់គ្លេស លោក Rizal Sukma បានលើកឡើងថា អង់គ្លេស ត្រូវតែផ្តល់ព័ត៌មានបន្ថែមស្តីពីយុទ្ធសាស្ត្រ និងគោលដៅរបស់ខ្លួនក្នុងការទំនាក់ទំនងជាមួយអាស៊ាន ខណៈផែនការចាកចេញពីសហភាពអឺរ៉ុប នៅតែមិនទាន់មានភាពច្បាស់លាស់។

តាមការចុះផ្សាយជាប្រភេទអត្ថបទពិសេសរបស់ The Jakarta Post នៅថ្ងៃ២២ សីហា លោកអគ្គរដ្ឋទូតរូបនេះ បានគូសបញ្ជាក់ថា រយៈពេលប៉ុន្មានឆ្នាំកន្លងមកនេះ ទំនាក់ទំនងអាស៊ាន និងអង់គ្លេស បានមានការលូតលាស់គួរកត់សម្គាល់ ក៏ប៉ុន្តែ អង់គ្លេស ហាក់មិនមានសកម្មភាពបន្ថែមទៀតសោះដើម្បីជាមូលដ្ឋានក្នុងការពង្រឹងទំនាក់ទំនងឲ្យកាន់តែមានលក្ខណៈគ្រប់ជ្រុងជ្រោយ។

ជាមួយគ្នានេះ តាមប្រភពព័ត៌មានដដែលនេះ នាយកប្រតិបត្តិមជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិ លោក Philips Vermonte បានផ្តល់អនុសាសន៍ថា អង់គ្លេសគួរចាប់ផ្តើមផ្តល់អាទិភាព និងធ្វើយុទ្ធសាស្ត្រភ្ជាប់ជាមួយនឹងអាស៊ាន ក្រោយដោះស្រាយបញ្ហានៃការចាកចេញពីសហភាពអឺរ៉ុបជាផ្លូវការ។

លោក Philips អះអាងថា ស្របពេលដែលបរិបទសកលមានការផ្លាស់ប្តូរ រួមទាំងការប្រឈមគ្នារវាងមហាអំណាចពីរគឺអាមេរិក និងចិន ការពង្រឹងទំនាក់ទំនងជាមួយនឹងអាស៊ាន គឺជាគោលនយោបាយការបរទេសដ៏មានសារៈសំខាន់ណាស់សម្រាប់អង់គ្លេស។ លោក គូសបញ្ជាក់ថា អង់គ្លេសមានសក្តានុពលជាច្រើនដើម្បីភ្ជាប់ផ្សារខ្លួនជាមួយតំបន់អាស៊ីអាគ្នេយ៍តាមរយៈការផ្សារភ្ជាប់លើវិស័យធុរកិច្ច ក៏ដូចជាប្រវត្តិសាស្ត្រ និងសេដ្ឋកិច្ចជាដើម។

គួរជម្រាបផងដែរថា សហភាពអឺរ៉ុប គឺជាកិច្ចសន្ទនាមួយរបស់អាស៊ាន ក្នុងចំណោមដៃគូសន្ទនាសរុបទាំង១០ រួមមាន អូស្ត្រាលី កាណាដា ចិន ឥណ្ឌា ជប៉ុន ណូវែលសេឡង់ កូរ៉េខាងត្បូង រុស្ស៊ី និងសហរដ្ឋអាមេរិក។ កន្លងមក ទំនាក់ទំនងអង់គ្លេស ជាមួយនឹងអាស៊ាន ត្រូវបានធ្វើឡើងក្រោមក្របខណ្ឌ និងតាមរយៈសហភាពអឺរ៉ុប៕