លោក ខៀវ សុភ័គ៖ កម្ពុជាមិនអាចសម្រួលឱ្យលោក អាឡិច ចូលមកឡើយ

ជាតិ

សង្គមជាតិ

លោក ខៀវ សុភ័គ៖ កម្ពុជាមិនអាចសម្រួលឱ្យលោក អាឡិច ចូលមកឡើយ

25, Aug 2019 , 6:59 pm

រូបភាព

ដោយ: ភួង វ៉ាន់ថា

នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ បាននិយាយថា សកម្មជនបរិស្ថាន ជនជាតិអេស្ប៉ាញ លោក អាឡិច (Alejandro Gonzalez Davidson) មិនអាចវិលចូលមកកម្ពុជាវិញបានទេ ព្រោះកម្ពុជាមិនមានច្បាប់លុបឈ្មោះជនបរទេសចេញពីបញ្ជីខ្មៅឡើយ។

អ្នកនាំពាក្យក្រសួងមហាផ្ទៃរូបនេះបានពន្យល់ថា ច្បាប់អន្តោប្រវេសន៍របស់កម្ពុជាបានចែងថា ជនបរទេស ដែលត្រូវបានបណ្តេញចេញពីប្រទេសកម្ពុជា ដោយក្រសួងប្រហាផ្ទៃហើយ គឺមិនអាចបានលប់ឈ្មោះចេញនោះទេ។ បើតាមលោក សុភ័គ កម្ពុជាគ្មានច្បាប់លុបឈ្មោះចេញពីបញ្ជីខ្មៅ ដើម្បីសម្រួលឱ្យអ្នកណាម្នាក់ចូលមកកម្ពុជាឡើយ។

លោកបានមានប្រសាសន៍ថា៖« ច្បាប់អន្តោប្រវេសន៍ ជនណាដែលត្រូវបានរដ្ឋមន្ត្រីក្រសួងមហាផ្ទៃបណ្ដេញចេញហើយ មិនអាចវិលមកកម្ពុជាវិញនោះទេ»។

លោក អាឡិច ត្រូវបានតុលាការខេត្តកោះកុងសម្រេចទម្លាក់បទចោទប្រកាន់ ដែលពាក់ព័ន្ធនឹងអំពើសមគំនិត កាលពីថ្ងៃទី២២ សីហា ឆ្នាំ២០១៩។

គួររម្លឹកថា លោក អាឡិច ដែលជាស្ថាបនិកនៃអង្គការចលនាមាតាធម្មជាតិ ត្រូវបានតុលាការខេត្តកោះកុងចោទពីបទសមគំនិតក្នុងបទគំរាមកំហែងធ្វើឲ្យខូចខាតដោយភ្ជាប់នូវបញ្ជាអ្វីមួយ ដែលប្រព្រឹត្តនៅភូមិអណ្ដូងទឹក ឃុំអណ្ដូងទឹក ស្រុកបុទុមសាគរ ខេត្តកោះកុង កាលពីអំឡុងខែកក្កដា ឆ្នាំ២០១៥។ កាលពីខែកុម្ភៈ ឆ្នាំ២០១៥ សកម្មជនបរិស្ថានជនបរទេស ដែលការពារតំបន់អារ៉ែងរូបនេះ ត្រូវបានអាជ្ញាធរ បញ្ជូនចេញពីកម្ពុជា៕