ប្រតិបត្តិករទេសចរណ៍ខេត្តសៀមរាបយកថ្ងៃសម្រាកធ្វើយុទ្ធនាការរើសសំរាមក្នុងទីក្រុង

ជាតិ

សង្គមជាតិ

ប្រតិបត្តិករទេសចរណ៍ខេត្តសៀមរាបយកថ្ងៃសម្រាកធ្វើយុទ្ធនាការរើសសំរាមក្នុងទីក្រុង

25, Aug 2019 , 9:30 pm

រូបភាព

ដោយ: ថ្មីៗ

សៀមរាប៖ ក្រុមប្រតិបត្តិករទេសចរណ៍ក្នុងខេត្តសៀមរាប បានសហការគ្នាចូលរួមធ្វើយុទ្ធនាការរើសសំរាមក្នុងក្រុង ក្នុងបំណងដើម្បីលើកកម្ពស់សោភណ្ឌភាពក្រុង ក៏ដូចជាបំផុសចលនាទីក្រុងស្អាត។ ក្រុមប្រតិបត្តិករដែលមកពីតាមបណ្ដាសណ្ឋាគារ និងក្រុមការងាររបស់អាកាសយានដ្ឋានអន្ដរជាតិសៀមរាប បានចំណាយពេលថ្ងៃសម្រាករបស់ខ្លួន ធ្វើយុទ្ធនាការដ៏មានសារសំខាន់មួយនេះដែលជាចំណែកដ៏មានប្រយោជន៍ក្នុងកិច្ចការសង្គមជាតិ។

លោក តែម ចន្ថា តំណាងសណ្ឋាគារ ណេឆើរារីសត សៀមរាប (Natura Resort Siem Reap) បានឱ្យដឹងថា កម្មវិធីសម្អាតបរិស្ថាននៅព្រឹកថ្ងៃទី២៥ សីហា គឺធ្វើឡើងនៅតាមបណ្ដោយផ្លូវមុខព្រលានយន្តហោះអន្ដរជាតិសៀមរាប និងតាមប្រឡាយអូរជុំវិញ ចាប់ពីមុខព្រលានយន្តហោះរហូតដល់រង្វង់មូលជ័យវរ្ម័នទី៧ និងពីមុខព្រលានដល់មុខភោជនីយដ្ឋាននាងពៅ (ផ្លូវឆ្ពោះទៅមុខអង្គរវត្ត)។ កម្មវិធីដែលមានអ្នកចូលរួមប្រមាណ៥០០នាក់ដែលជាប្រតិបត្តិករទេសចរណ៍ និងបុគ្គលិកក្រុមហ៊ុនរើសសំរាម GAEA ក្នុងបំណងដើម្បីសុខុមាលភាពប្រជាពលរដ្ឋ សោភណ្ឌភាពទីក្រុងសៀមរាបឱ្យស័ក្ដិសមជាគោលដៅទេសចរណ៍ និងជាទីក្រុងទេសចរណ៍វប្បធម៌ដ៏ល្បីល្បាញរបស់កម្ពុជា។

គួរបញ្ជាក់ថា ក្នុងបំណងដើម្បីទីក្រុងសៀមរាបក្លាយជាទីក្រុងស្អាត និងមានភាពបៃតង កន្លងមកទាំងអាជ្ញាធរនិងប្រជាពលរដ្ឋ បានបង្ហាញការចូលរួមជាសកម្មភាពតាមរយៈការរើសសំរាម និងបំផុសឱ្យប្រជាពលរដ្ឋចេះទុកដាក់សំរាមឱ្យបានត្រឹមត្រូវ តួយ៉ាងករណីអ្នករកស៊ីនៅសង្កាត់សាលាកំរើកក្រុងសៀមរាប ពួកគេយល់ថា នៅពេលបរិស្ថានស្អាត ការរកស៊ីទទួលពួកគេក៏ទទួលបានភ្ញៀវច្រើនផងដែរ។ បន្ថែមពីនោះ ពួកគេបានព្យាយាមប្រើប្រាស់សម្ភារជំនួសឡើងវិញ ដោយកាត់បន្ថយការបំពុលបរិស្ថានផងដែរ៕