កម្ពុជានឹងរៀបចំមហោស្រពអូប៉េរ៉ាអន្តរជាតិលើកដំបូង ក្នុងតំបន់អង្គរ នៅឆ្នាំ២០២០

ជាតិ

សង្គមជាតិ

កម្ពុជានឹងរៀបចំមហោស្រពអូប៉េរ៉ាអន្តរជាតិលើកដំបូង ក្នុងតំបន់អង្គរ នៅឆ្នាំ២០២០

26, Aug 2019 , 7:59 am

រូបភាព

រូបពីហ្វេសប៊ុកក្រសួងទេសចរណ៍

ដោយ: ថ្មីៗ

ភ្នំពេញ៖ កម្ពុជានឹងរៀបចំមហោស្រពអូប៉េរ៉ាអន្តរជាតិលើកដំបូង ក្នុងតំបន់អង្គរ ដើម្បីអបអរសាទរខួប២៥ឆ្នាំ នៃការបង្កើតអាជ្ញាធរជាតិអប្សរា នៅថ្ងៃទី១៩-២៣ ខែកុម្ភៈ ឆ្នាំ២០២០ ខាងមុខ។

លោក ថោង ខុន រដ្ឋមន្ត្រីក្រសួងទេសចរណ៍ បាននិយាយថា ព្រឹត្តិការណ៍នេះ នឺងជួយជំរុញការផ្សព្វផ្សាយគោលដៅទេសចរណ៍តំបន់ខេត្តសៀមរាប-អង្គរ ទៅកាន់ពិភពលោកបន្ថែមទៀត ស្របតាមគោលការណ៍ក្រសួង។

រដ្ឋមន្ត្រីទេសចរណ៍ និយាយដូច្នេះថា៖« ព្រឹត្តិការណ៍នេះ នឹងក្លាយជាផលិតផលទេសចរណ៍វប្បធម៌ ជួយផ្សព្វផ្សាយដល់សម្បត្តិវប្បធម៌ អរិយធម៌ និងសិល្បៈដ៏សម្បូរបែប អច្ឆរិយភាពនៃអង្គរ និងគោលដៅ ទេសចរណ៍សៀមរាបអង្គរដល់ទេសចរអន្តរជាតិ ពិសេសទេសចរអឺរ៉ុប» ។

កម្ពុជារៀបចំមហោស្រពអូប៉េរ៉ាអន្តរជាតិលើកដំបូងក្នុងតំបន់អង្គរនេះ ក្រោមកិច្ចសហការរៀបចំរវាងក្រសួងវប្បធម៌ និងវិចិត្រសិល្បៈ ក្រសួងទេសចរណ៍ អាជ្ញាធរជាតិអប្សរា ជាមួយមហោស្រពអូប៉េរ៉ា Mozard at Angkor។

ព្រឹត្តិការណ៍មហោស្រពអន្តរជាតិនេះ នឹងត្រូវបើកជាផ្លូវការក្រោមព្រះរាជាធិបតីដ៏ខ្ពង់ខ្ពស់របស់ព្រះករុណា ព្រះបាទ សម្តេច ព្រះបរមនាថ នរោត្ដម សីហមុនី ព្រះមហាក្សត្រ។ ក្នុងនោះក៏នឹងមានសិល្បករ-សិល្បការិនីមកពីជុំវិញពិភពលោក និងក្រុមសិល្បៈកម្ពុជាសរុបប្រមាណជាង ៧០នាក់ ដែលរៀបចំនៅក្នុងទម្រង់ជាការសម្ដែងទស្សនីយភាព Mozart។

គួរបញ្ចាក់ផងដែរថា ទស្សនីយភាពមហោស្រពនេះ ជាបុរេព្រឹត្តិការណ៍ដ៏សំខាន់ ដើម្បីរឹតចំណងមិត្តភាព និងការផ្លាស់ប្តូរវប្បធម៌រវាងកម្ពុជា និងអឺរ៉ុប ដែលនៅក្នុងឆ្នាំ២០២០ ខាងមុខនេះ កម្ពុជាមានមោទកភាពធ្វើជាម្ចាស់ផ្ទះនៃកិច្ចប្រជុំកំពូលអាស៊ី-អឺរ៉ុប (ASEM 2020)៕

ដោយ៖ ឃុន សម្ផស្ស