ជាតិ
១៣ឆ្នាំក្រោយមក លោក មហាធៀ នឹងមកធ្វើបាឋកថាម្តងទៀតនៅសាកលវិទ្យាល័យភូមិន្ទភ្នំពេញ លោក Mahathir Mohamad នាកិច្ចប្រជុំត្រីកោណឥណ្ឌូណេស៊ី ម៉ាឡេស៊ី និងថៃ លើកទី១២ នៅក្រុងបាងកក កាលពីថ្ងៃទី២៣ ខែមិថុនា ឆ្នាំ២០១៩។ រូបថត AFP
× បណ្ឌិត មហាធៀ មហាម៉ាត់ នាយករដ្ឋមន្ត្រីម៉ាឡេស៊ី ដែលមានវ័យ៩៤ឆ្នាំ នឹងមកធ្វើបាឋកថាពិសេសនៅសាកលវិទ្យាល័យភូមិន្ទភ្នំពេញ (RUPP) នារសៀលថ្ងៃទី២ ខែកញ្ញា ឆ្នាំ២០១៩។ RUPP បានបញ្ជាក់ពីកម្មវិធីនេះនៅក្នុងទំព័រហ្វេសប៊ុកផ្លូវការរបស់ខ្លួន។
កាលពីខែសីហា កន្លងមក លោក Eldee Husaini Mohd Hashim ឯកអគ្គរាជទូតម៉ាឡេស៊ីប្រចាំនៅកម្ពុជា លើកឡើងពីគម្រោងធ្វើទស្សនកិច្ចរបស់លោកនាយករដ្ឋមន្ត្រី មហាធៀ មហាម៉ាត់។ ក្រៅពីជំនួបជាមួយថ្នាក់ដឹកនាំកំពូល លោក មហាធៀ នឹងធ្វើបាឋកថាពិសេសនៅ RUPP ប៉ុន្តែមិនទាន់មានការបញ្ជាក់ពីប្រធានបទដែលលោកនាយករដ្ឋមន្ត្រី ម៉ាឡេស៊ី ត្រូវថ្លែងនោះឡើយ។
សូមបញ្ជាក់ថា លោក មហាធៀ មហាម៉ាត់ ធ្លាប់ធ្វើមកបាឋកថាម្តងរួចហើយ នៅសាកលវិទ្យាល័យភូមិន្ទភ្នំពេញ កាលពីខែកុម្ភៈ ឆ្នាំ២០០៦ ក្រោមការអញ្ជើញរបស់ស្ថានទូតជប៉ុន ដែលកាលណោះលោកទើបចប់អាណត្តិនាយករដ្ឋមន្ត្រីបានជាង១ឆ្នាំ។
ក្រោយជំនួបជាមួយសម្តេចនាយករដ្ឋមន្ត្រី ហ៊ុន សែន និងសម្តេចក្រុមព្រះនរោត្តម រណឫទ្ធិ លោក មហាធៀ បានធ្វើបាឋកថា នៅមុខនិស្សិតខ្មែរក្រោមប្រធានបទ «ជោគជ័យនៃសេដ្ឋកិច្ចម៉ាឡេសុី ដោយយកគំរូតាមជប៉ុន»៕
© រក្សាសិទ្ធិដោយ thmeythmey.com