ជនជាតិភាគតិចរ៉ូហ៊ីងយ៉ានាំគ្នាប្រារព្ធខួប២ឆ្នាំនៃការចាកចេញពីមីយ៉ាន់ម៉ាដោយបង្ខំ

អន្តរជាតិ

នយោបាយអន្តរជាតិ

ជនជាតិភាគតិចរ៉ូហ៊ីងយ៉ានាំគ្នាប្រារព្ធខួប២ឆ្នាំនៃការចាកចេញពីមីយ៉ាន់ម៉ាដោយបង្ខំ

26, Aug 2019 , 4:11 pm

រូបភាព

ដោយ: ធៀន ភារិន្ទ

កាលពីថ្ងៃទី២៥ ខែសីហា ជនជាតិភាគតិចរ៉ូហ៊ីងយ៉ាប្រមាណជាង ១ម៉ឺននាក់ បានជួបជុំនៅក្នុងជំរុំជនភៀសខ្លួន នៅប្រទេសបង់ក្លាដែស បន្ទាប់ពីពួកគេបានចាកចេញពីប្រទេសរយៈពេល២ឆ្នាំ ដោយសារតែការបង្ក្រាបយ៉ាងព្រៃផ្សៃពីសំណាក់យោធាមីយ៉ាន់ម៉ា។

នារយៈពេល២ឆ្នាំកន្លងមកនេះ ជនជាតិរ៉ូហ៊ីងយ៉ា យ៉ាងហោចណាស់៧៥ម៉ឺននាក់ បានរត់ចេញពីប្រទេសមីយ៉ាន់ម៉ា ដោយសារតែការបង្ក្រាបពីសំណាក់យោធាភូមា។ ខណៈពេលថ្មីៗនេះ មានកិច្ចព្រមព្រៀងធ្វើមាតុភូមិនិវត្តន៍ចូលក្នុងប្រទេសវិញរវាង បង់ក្លាដែស និងមីយ៉ាន់ម៉ា ប៉ុន្តែគ្មានជនជាតិរ៉ូហ៊ីងយ៉ាម្នាក់ណាហ៊ានត្រលប់មកវិញឡើយ។ ជាពិសេសគឺ ជនជាតិភាគតិចរ៉ូហ៊ីងយ៉ាអំពាវនាវឲ្យរដ្ឋាភិបាលមីយ៉ាន់ម៉ាទទួលស្គាល់ខ្លួនថាជាប្រជាពលរដ្ឋ។

យ៉ាងណាមិញ ជនជាតិភាគតិចមួយនេះបានជួបប្រជុំគ្នាប្រមាណជា១ ម៉ឺននាក់ ដោយហៅថ្ងៃទី២៥ សីហា ថា «ថ្ងៃចងចាំនៃអំពើប្រល័យពូជសាសន៍»។

មកដល់សព្វថ្ងៃនេះប្រជាជនប្រហែល១លាននាក់បានចេញចេញពីរដ្ឋរ៉ាក់ឃីន ហើយភាគច្រើនគឺរស់នៅក្នុងជំរុំជនភៀសខ្លួន មានផ្ទុកមនុស្សយ៉ាងតិចណាស់ច្រើនជាង កន្លះលាននាក់ក្នុងប្រទេសប៉ង់ក្លាដែស។ ចំណែកប្រជាជនដែលមិនបានចេញពីរដ្ឋរ៉ាក់ឃីន មានតិចជាងកន្លះលាននាក់តែប៉ុណ្ណោះ ហើយពួកគេចោទរដ្ឋាភិបាលទីក្រុងណៃពិដោថា មានការបង្ក្រាបជាប្រព័ន្ធ។

មែនទែនទៅ រដ្ឋាភិបាលទីក្រុង ដាក្កា ក៏ឈឺក្បាលមិនតិចដែរ ដោយសារជនភៀសខ្លួនរ៉ូហ៊ីងយ៉ា ព្រោះការដាក់សម្ពាធនយោបាយក្នុងស្រុកទៅលើ លោកស្រីនាយករដ្ឋមន្ត្រី Sheikh Hasina និងការបាត់បង់ការអត់ធ្មត់របស់ប្រជាជនបង់ក្លាដែសលើជនជាតិរ៉ូហ៊ីងយ៉ា។

ជាការពិត តាមរយៈអ្នកជំនាញជឿថា មានតែចិនតែមួយគត់ ដែលអាចដាក់សម្ពាធអោយរដ្ឋាភិបាលទីក្រុងណៃពិដោទទួលជនភៀសខ្លួនបាន បើមិននោះទេ លទ្ធិឥស្លាមជ្រុលនិយម នឹងជះឥទ្ធិពលពេញជំរុំជនភៀសខ្លួន ដោយសារតែភាពលំបាក និងភាពក្រីក្រខ្លាំងពេក។

សូមបញ្ជាក់ថា កាលពីថ្ងៃទី២៥ ខែសីហា ឆ្នាំ២០១៧ ក្រុមរ៉ូហ៊ីងយ៉ា បានធ្វើការវាយប្រហារទៅលើប៉ុស្តិ៍ប៉ូលីស ដោយបង្កអោយមានមនុស្សស្លាប់៤ ឬ៥នាក់។ យ៉ាងណាមិញសម្រាប់វិធានការឆ្លើយតបពីរដ្ឋាភិបាលវិញគឺ ចាប់ខ្លួនក្រុមឧទ្ទាម ដុតភូមិ សម្លាប់ និងរំលោភបំពានលើជនស៊ីវិលជាដើម។ នេះបើតាមការស៊ើបអង្កេតរបស់អង្គការសហប្រជាជាតិ បន្ទាប់ពីមានការបង្ក្រាបយ៉ាងព្រៃផ្សៃពីសំណាក់រដ្ឋាភិបាលទីក្រុងណៃពិដោ។

រ៉ូហ៊ីងយ៉ា ភាគច្រើនរស់នៅក្នុងរដ្ឋរ៉ាឃីន ហើយមានភាសា និងវប្បធម៌ផ្ទាល់ខ្លួន។ ជនជាតិមួយនេះរស់នៅមីយ៉ាន់ម៉ាជាច្រើនជំនាន់មកហើយ តែរដ្ឋាភិបាលមិនទទួលស្គាល់ពួកគេថាជាប្រជាជនឡើយ៕