កីឡាជាតិ
ជាតិ
លោក កែវ រ៉េមី៖ អត្តពលិកខ្មែរឈ្នះមេដាយមាសពិភពលោក ជាសុបិនដែលក្លាយជាការពិត
× លោក កែវ រ៉េមី ប្រធានសហព័ន្ធកីឡាតេក្វាន់ដូ ITF កម្ពុជា និងជាប្រតិភូដឹកនាំក្រុមកីឡាករកម្ពុជាទៅចូលរួមប្រកួតជើងឯកពិភពលោកនៅទីក្រុង Plovdiv ប្រទេសប៊ុលហ្គារី បានសម្រេចគោលបំណង ដែលចង់ឮភ្លេងជាតិ និងទង់ជាតិបង្ហូតឡើងក្នុងព្រឹត្តិការណ៍កម្រិតពិភពលោករបស់ខ្លួនហើយ។ ក្តីស្រមៃរបស់ លោក អាចក្លាយជាពិតទៅបាន បន្ទាប់ពីកីឡាករ ប៉ាល់ ជីវ័ន បានឈ្នះមេដាយមាសលើវិញ្ញាសាសម្តែងមេគុនខ្សែក្រវាត់ខ្មៅ៥ដាន់ កាលពីថ្ងៃទី២៦ ខែសីហា។
ទីបំផុតកីឡាករតេក្វាន់ដូ ITF ឆ្នើមរបស់កម្ពុជា ប៉ាល់ ជីវ័ន បានធ្វើឲ្យក្តីរបស់លោក កែវ រ៉េមី ដែលចង់ឮភ្លេងជាតិ និងទង់ជាតិកម្ពុជាបន្លឺនិងបង្ហូតឡើងនៅមុខប្រតិភូកីឡាមកពីប្រទេសផ្សេងៗ ក្នុងព្រឹត្តិការណ៍ប្រកួតជើងឯកពិភពលោក World ITF Taekwon-do Championship នៅទីក្រុង Plovdiv ប្រទេសប៊ុលហ្គារី បានសម្រេចហើយ។
កីឡាករ ប៉ាល់ ជីវ័ន និងលោក កែវ រ៉េមី ប្រធានសហព័ន្ធកីឡាតេក្វាន់ដូ ITF កម្ពុជា។ រូបថត លោក គី សុខលីម
លោក កែវ រ៉េមី ដែលទើបត្រូវបានតែងតាំងឲ្យធ្វើជាអនុប្រធានសហព័ន្ធកីឡាតេក្វាន់ដូ ITF ពិភពលោក បានបង្ហោះសារលើសង្គមហ្វេសប៊ុកនៅថ្ងៃទី២៧ ខែសីហា នេះ យ៉ាងដូច្នេះថា៖«អ្វីដែលខ្ញុំស្រមៃគឺបានសម្រេចហើយ ទាំងទង់ជាតិ និងភ្លេងជាតិត្រូវបានបន្លឺឡើងក្នុងកម្រិតពិភពលោក។ ជ័យោ! កម្ពុជា»។
ប្រធានគណៈកម្មការសិទ្ធិមនុស្សកម្ពុជារូបនេះ បានបង្ហាញការភ្ញាក់ផ្អើលយ៉ាងខ្លាំង ដោយមិននឹកស្មានថា លោកត្រូវបានអង្គមហាសន្និបាទរបស់សហព័ន្ធកីឡាតេក្វាន់ដូ ITF ពិភពលោក គាំទ្រឲ្យធ្វើជាអនុប្រធានសហព័ន្ធកីឡាតេក្វាន់ដូ ITF ពិភពលោក។ ក្តីរំពឹងរបស់លោក គឺត្រឹមជាសមាជិកគណៈកម្មការនាយកប្រតិបត្តិតែប៉ុណ្ណោះ។ តួនាទីអនុប្រធានសហព័ន្ធ ត្រូវបានប្រកាសក្នុងមហាលើកទី២១ កាលពីថ្ងៃទី២៥ ខែសីហា។
ក្នុងបទសម្ភាសជាមួយសារព័ត៌មានថ្មីៗកាលពីពេលកន្លងទៅ ប្រធានសហព័ន្ធកីឡាតេក្វាន់ដូ ITF កម្ពុជារូបនេះ បានបង្ហាញក្តីរំពឹងថា លោកចង់ឃើញបទភ្លេងជាតិ និងទង់ជាតិកម្ពុជា ត្រូវបានបន្លឺនិងបង្ហូតឡើងជាលើកដំបូងក្នុងព្រឹត្តិការណ៍លំដាប់ពិភពលោកខាងលើ។ នៅពេលនោះដែរ លោក ហាក់មានភាពជឿជាក់ខ្ពស់លើសមត្ថភាពកីឡាករកម្ពុជាថា នឹងទទួលបានលទ្ធផលល្អក្នុងការប្រកួតដែលមានកីឡាករមកពី៦៩ប្រទេសចូលរួមនេះ។
កីឡាករ ប៉ាល់ ជីវ័ន បានឈ្នះមេដាយមាសលើវិញ្ញាសាសម្តែងមេគុនខ្សែក្រវាត់ខ្មៅ៥ដាន់ ពីការប្រកួតជើងឯកពិភពលោក World ITF Taekwon-do Championship នៅទីក្រុង Plovdiv ប្រទេសប៊ុលហ្គារី កាលពីថ្ងៃទី២៦ ខែសីហា។ ជីវ័ន បានយកឈ្នះកីឡាករអាហ្សង់ទីន Dorado Gabriel ហើយបន្តទម្លាក់កីឡាករជម្រើសបារាំងដើមកំណើតវៀតណាម Nguyen Truc នៅវគ្គពាក់កណ្តាលផ្តាច់ព្រ័ត្រ មុននឹងក្លាយជាម្ចាស់មេដាយមាស ក្រោយជ័យជម្នះលើកីឡាករឆ្នើមព័រតូរីកូ Datiz Luis៕
សម្រាប់ការចូលរួមប្រកួតជើងឯកពិភពលោកនៅប្រទេសប៊ុលហ្គារី ដោយទទួលបានការឧបត្ថម្ភពីក្រុមហ៊ុនខ្មែរប៊ែវើរីជីស (Khmer Beverages) ក្រសួងអប់រំ យុវជន និងកីឡា និងគណៈកម្មាធិការជាតិរៀបចំការប្រកួតកីឡាស៊ីហ្គេមឆ្នាំ២០២៣(CAMSOC)។
Tag:
តេក្វាន់ដូ ITF
កែវ រ៉េមី
World ITF Taekwon-do Championship
© រក្សាសិទ្ធិដោយ thmeythmey.com