អន្តរជាតិ
នាយករដ្ឋមន្ត្រីប៉ាគីស្ថាន ពិចារណាបិទដែនអាកាសមិនឲ្យយន្តហោះឥណ្ឌាហោះកាត់
×
ដោយ៖ ឈួន ឈីវអ៊ីង
នាយករដ្ឋមន្ត្រីប៉ាគីស្ថាន លោក អ៊ីមរ៉ាន ខាន់ (Imran Khan) កំពុងពិចារណាបិទដែនអាកាសទាំងស្រុងសម្រាប់ការហោះហើរដោយយន្តហោះឥណ្ឌាឥណ្ឌា និងគិតគូរផ្តាច់ពាណិជ្ជកម្មឥណ្ឌាទៅកាន់អាហ្វហ្គានីស្ថានដែលកាត់តាមប៉ាគីស្ថាននោះ ជាស្ថាពរ។ នេះបើតាមសម្តីរបស់រដ្ឋមន្ត្រីវិទ្យាសាស្ត្រនិងបច្ចេកវិទ្យាប៉ាគីស្ថាន Fawad Chaudhry ។
រដ្ឋមន្ត្រីវិទ្យាសាស្ត្រនិងបច្ចេកវិទ្យាប៉ាគីស្ថាន Fawad Chaudhry បានសរសេរលើ Twitter នៅថ្ងៃទី២៧ ខែសីហា ថា នាយករដ្ឋមន្រី្ត អ៊ីមរ៉ាន់ ខាន់ កំពុងពិចារណាលើការបិទដែនអាកាសទៅប្រទេសឥណ្ឌាជាស្ថាពរ និងហាមឃាត់ការប្រើដីប៉ាគីស្ថាន ជាផ្លូវពាណិជ្ជកម្មរបស់ឥណ្ឌាទៅកាន់អាហ្វហ្គានីស្ថាន ត្រូវបានស្នើឡើងក្នុងកិច្ចជំនួបរវាងរដ្ឋមន្ត្រី និងការគិតគូរពីលក្ខខណ្ឌច្បាប់ កំពុងស្ថិតនៅក្រោមការពិចារណាមុនចាប់ផ្ដើមអនុវត្ត។
យ៉ាងណាមិញ រដ្ឋមន្ត្រីប៉ាគីស្ថានរូបនេះ មិនបានបញ្ចេញមូលហេតុដែលប៉ាគីស្ថានពិចារណាប្រឆាំង នឹងរាជរដ្ឋាភិបាលរបស់នាយករដ្ឋមន្ត្រីឥណ្ឌា នារិន្ទ្រា ម៉ូឌី ឡើយ។ បើតាមការចុះផ្សាយរបស់ទីភ្នាក់ងារព័ត៌មាន Reuters ។
ប៉ាគីស្ថាន ទើបតែបើកដែនអាកាសរបស់ខ្លួនឡើងវិញនៅពាក់កណ្តាលខែកក្កដា បន្ទាប់ពីការបិទអស់រយៈពេលជិត ៤ខែ តាំងពីខែកុម្ភៈ ក្រោយពីការវាយប្រហារ រវាងកងទ័ពប៉ាគីស្ថាន ជាមួយកងទ័ពឥណ្ឌាលើជម្លោះកាស្មៀរ។ ជាច្រើនខែដែលស្ថិតក្រោមការដាក់កម្រិត ការហោះហើរជាច្រើន បង្ខំចិត្តហោះហើរតាមផ្លូវវាងឆ្ងាយ ដែលចំណាយអស់រាប់លានដុល្លារ។
ប៉ាគីស្ថាន និងឥណ្ឌា បានវាយប្រហារតាមអាកាសនៅលើទឹកដីរបស់គ្នារៀងៗខ្លួន ខណៈដែលយន្តហោះចម្បាំងប្រទេសទាំងពីរ ក៏បានតទល់គ្នានៅតំបន់កាស្មៀរដែលមានជម្លោះ។ ក្នុងនោះ យន្តហោះចម្បាំងឥណ្ឌាមួយគ្រឿងត្រូវបានបាញ់ទម្លាក់ដោយយោធាប៉ាគីស្ថានផងដែរ៕
© រក្សាសិទ្ធិដោយ thmeythmey.com