ជាតិ
ក្រុមហ៊ុនល្បីៗ៤០ នឹងផ្ដល់លុយជាងមួយពាន់លានដុល្លារដើម្បីកាត់បន្ថយសំណល់ប្លាស្ទិកនៅអាស៊ីអាគ្នេយ៍
រូបថតពី Alliance To End Plastic Waste
×![]()
ដោយ: តន ចាន់រិទ្ធារ៉ា
បាងកក៖ ក្រុមហ៊ុនល្បីឈ្មោះលើពិភពលោកចំនួន៤០ បានសន្យារួមវិភាគទានទឹកប្រាក់ចំនួនជាងមួយពាន់លានដុល្លារ ជាមួយនឹងគោលដៅវិនិយោគទឹកប្រាក់ជាច្រើនទៀតដើម្បីដោះស្រាយបញ្ហាសំណល់បាស្ទិកនៅអាស៊ីអាគ្នេយ៍។ ការប្ដេជ្ញាចិត្តរបស់ក្រុមហ៊ុនមកពីអាស៊ី អាមេរិក អាហ្វ្រិក និងអឺរ៉ុបនេះ ធ្វើឡើងស្របពេលដែលបញ្ហាកាកសំណល់បាស្ទិក ជាក្លាយជារឿងឈឺក្បាលមួយសម្រាប់ប្រទេសក្នុងតំបន់ និងសាកលលោកផងដែរ។ 
ក្រុមហ៊ុនធំៗលើពិភពលោកមកខ្សែសង្វាក់ផលិតកម្មចម្រុះគ្នា រួមទាំងក្រុមហ៊ុនផលិតសារធាតុគីមី និងប្លាស្ទិកផងនោះ នៅថ្ងៃទី២៧ ខែសីហា បានបើកវេទិកា «សម្ព័ន្ធភាពដើម្បីលុបបំបាត់សំណល់ប្លាស្ទិក (AEPW)» ជាលើកដំបូងនៅទីក្រុងបាងកក ប្រទេសថៃរបស់អាស៊ីអាគ្នេយ៍ ។ AEPW តំណាងឲ្យក្រុមហ៊ុនចំនួន ៤០ ដែលមានមូលដ្ឋាននៅទ្វីបអាមេរិក, អឺរ៉ុប, អាហ្វ្រិក, មជ្ឈិមបូព៌ា, និងអាស៊ី ។ ក្នុងចំណោមនេះ ក្រុមហ៊ុនជាច្រើន បានរកស៊ីនៅក្នុងតំបន់អាស៊ីអាគ្នេយ៍។
នាវេទិកាដំបូងរបស់ខ្លួន សម្ព័ន្ធភាពអន្តរជាតិនេះ បានសន្យាផ្ដល់មូលនិធិជិតមួយពាន់លានដុល្លារអាមេរិក រួមជាមួយនឹងគោលដៅវិនិយោគទឹកប្រាក់១,៥ពាន់លានដុល្លារ ក្នុងរយៈពេល ៥ឆ្នាំបន្ទាប់ ដើម្បីស្វែងរកដំណោះស្រាយក្នុងការកាត់បន្ថយ និងគ្រប់គ្រងសំណល់ប្លាស្ទិក ក៏ដូចជាជំរុញការបង្កើតដំណោះស្រាយនៅក្រោយពេលប្រើប្រាស់ ។ គោលដៅសំខាន់របស់ AEPW គឺតំបន់អាស៊ីអាគ្នេយ៍ ដែលមានតម្រូវការច្រើនលើការដោះស្រាយបញ្ហាសំណល់មួយនេះ។
លោក Jim Seward តំណាងសម្ព័ន្ធ AEPW និយាយថា បញ្ហាសំណល់ប្លាស្ទិក គឺជាបញ្ហាពិភពលោក ហើយពេលនេះ គឺជាពេលវេលាដែលត្រូវធ្វើសកម្មភាពហើយ ។ ដើម្បីដោះស្រាយបញ្ហាសំណល់ប្លាស្ទិកនេះឲ្យជោគជ័យ តំណាង AEPW រូបនេះ កិច្ចសហប្រតិបត្តិការ និងកិច្ចប្រឹងប្រែងដែលមានការសម្របសម្រួលមួយ មកពីគ្រប់វិស័យទាំងអស់ ដើម្បីសម្រេចបានលទ្ធផលនិងជោគជ័យដែលមាននិរន្តរភាព។
លោក Cholanat Yanaranop អនុប្រធានប្រតិបត្តិក្រុមហ៊ុន SCG ដែលរៀបចំវេទិកាខាងលើ លើកឡើងពីបរិមាណសំណល់ប្លាស្ទិកក្នុងសមុទ្រចំនួន៦០ភាគរយ ដែលមានប្រភពចេញមកពីប្រទេសចំនួន ៥ នៅក្នុងអាស៊ីអាគ្នេយ៍។ មន្ត្រីជាន់ខ្ពស់ក្រុមហ៊ុនេកជនដ៏ធំរបស់ថៃមួយបន្តថា នេះគឺជាបញ្ហាប្រភពដ៏ធ្ងន់ធ្ងររបស់ពិភពលោក ដែលទាមទារឲ្យមានការធ្វើសកម្មភាពបន្ទាន់ និងការដឹកនាំរឹងមាំសម្រាប់សកម្មភាពនេះ។
អំឡុងពេលវេទិកាដដែលនេះ សម្ព័ន្ធ AEPW បានដាក់ចេញគំនិតផ្ដួចផ្ដើមដើម្បីជួយលុបបំបាត់សំណល់ប្លាស្ទិកនេះដូចជា ការបង្កើតភាពជាដៃគូជាមួយទីក្រុងនានា ដើម្បីអភិវឌ្ឍប្រព័ន្ធគ្រប់គ្រងសំណល់ចម្រុះ នៅតាមទីក្រុងធំៗ ដែលពុំទាន់មានហេដ្ឋារចនាសម្ព័ន្ធត្រឹមត្រូវ។ លើសពីនោះ ការជំរុញបច្ចេកវិទ្យា គំរូធុរកិច្ច និងសហគ្រិន ដើម្បីទប់ស្កាត់សំណល់ប្លាស្ទិកហូរទៅក្នុងសមុទ្រ ក៏ជាដំណោះស្រាយមួយដែរ ខណៈការបង្កើតប្រព័ន្ធទិន្នន័យសេរី ដើម្បីផ្ដល់ព័ត៌មានមានតម្លៃអំពីប្រភព ទីកន្លែង និងទម្រង់នៃសំណល់ប្លាស្ទិក នឹងជួយគាំទ្រដល់គម្រោងគ្រប់គ្រងសំណល់ប្រភេទនេះ។
ក្រុមហ៊ុនល្បីឈ្មោះរបស់ពិភពលោកដូចជា ExxonMobil, Mitsubishi Chemical Holdings, Shell, SCG Chemicals, Sumitomo Chemical, PepsiCo និង Sinopec ជាសមាជិកនៃសម្ព័ន្ធក្រុមហ៊ុនឯកជនមួយនេះ៕
Tag:
ថៃ
អាស៊ាន
AEPW
© រក្សាសិទ្ធិដោយ thmeythmey.com
