អន្តរជាតិ
អាមេរិក នៅតែចង់ជួយដោះស្រាយទំនាស់ពាណិជ្ជកម្មរវាងកូរ៉េខាងត្បូងនិងជប៉ុន
× ក្រសួងការបរទេសអាមេរិកនៅថ្ងៃទី២៧ ខែសីហា និយាយថាទីក្រុងវ៉ាស៊ីនតោន នឹងធ្វើអ្វីគ្រប់យ៉ាង ដើម្បីជួយកូរ៉េខាងត្បូង និងជប៉ុនក្នុងការដោះស្រាយជម្លោះ បើទោះបីជាបរាជ័យក្នុងការចូលខ្លួនមកដោះស្រាយប៉ុន្មានលើកមកហើយក៏ដោយ។ ការអះអាងរបស់អាមេរិកបែបនេះ ស្របពេលដែលទំនាស់ពាណិជ្ជកម្មរវាងទីក្រុងតូក្យូ និងទីក្រុងសេអ៊ូលកាន់តែធ្ងន់ធ្ងរទៅៗ។
សាធារណរដ្ឋកូរ៉េ និងជប៉ុន ត្រូវតែដោះស្រាយបញ្ហាទាំងនេះ។ នេះជាការលើកឡើងអ្នកនាំពាក្យក្រសួងការបរទេសអាមេរិកអ្នកប្រាប់ទីភ្នាក់ងារសារព័ត៌មាន Yonhap ។ អ្នកនាំពាក្យដដែលបន្តថា ក្នុងនាមអាមេរិកជាមិត្ត និងជាសម្ព័ន្ធមិត្តរបស់កូរ៉េខាងត្បូង និងជប៉ុន អាមេរិកគាំទ្រឲ្យមានកិច្ចខិតខំប្រឹងប្រឹង ក្នុងការដោះស្រាយបញ្ហា។
ជាការពិតជម្លោះរវាងទីក្រុងសេអ៊ូល និងទីក្រុងតូក្យូ ធ្វើអោយអាមេរិកឈឺក្បាលយ៉ាងខ្លាំង ដោយសារវាធ្វើអោយសហប្រតិបត្តិការសន្តិសុខត្រីភាគីរងភាពផុយស្រួយ ស្របពេលត្រូវប្រឈមមុននឹងការគំរាមកំហែងពីកូរ៉េខាងជើង និងចិន។
ដោយប្រើប្រាស់ឈ្មោះកាត់ជាផ្លូវការរបស់សាធារណៈរដ្ឋប្រជាមានិតកូរ៉េចំៗ អ្នកនាំពាក្យក្រសួងការបរទេសអាមេរិកបានអះអាងថា៖« ក្នុងនាមជាសម្ព័ន្ធមិត្ត និងជាមិត្តរបស់ប្រទេសទាំងពីរ អាមេរិកជឿថាវាមានសារៈសំខាន់ណាស់ ដើម្បីប្រាកដថាអាចរក្សាទំនាក់ទំនងដ៏រឹងមាំ និងជិតស្និតរវាងប្រទេសទាំងបី។ ជាពិសេសគឺដើម្បីប្រឈមមុខនឹងការប្រកួតប្រជែងក្នុងតំបន់ ក្នុងនោះរួមមានកូរ៉េខាងជើង នៅក្នុងតំបន់ ឥណ្ឌូ-ប៉ាស៊ីហ្វិក និងនៅជុំវិញពិភពលោក»។
ទាក់ទងទៅនឹងបញ្ហានេះ ភាគីអាមេរិកនៅតែបន្តគាំទ្រឲ្យភាគីទាំងពីរនៅតែរក្សាការដោះស្រាយជម្លោះតាមរយៈកិច្ចចរចា និងសន្តិវិធី។
សូមបញ្ជាក់ថា កាលពីដើមខែកន្លងមកនេះ ជប៉ុនបានសម្រេចដកកូរ៉េខាងត្បូងចេញពីបញ្ជីដៃគូរពាណិជ្ជកម្មដែលគួរឲ្យទុកចិត្តបាន ហើយការសម្រេចចិត្តបែបនេះទៀតសោត ត្រូវចូលជាធរមាននៅថ្ងៃពុធ។ មែនទែនទៅភាពតានតឺងរវាងប្រទេសទាំងពីរ គឺឡើងខ្ពស់ទៅហើយ ដោយសារតែសាលក្រមរបស់កូរ៉េខាងត្បូង ដែលធ្វើឲ្យភាគីទាំងពីរឈានទៅដល់បញ្ចប់កិច្ចព្រមព្រៀងចែករំលែកព័ត៌មានយោធា។ យ៉ាងណាមិញ ទោះបីជាមានការផ្សះផ្សាពីអាមេរិកប៉ុន្មានលើកមកយ៉ាងណាក៏ដោយ ក៏វានៅតែអត់បានការដដែល៕
Tag:
អាមេរិក
កូរ៉េខាងត្បូង
ជប៉ុន
© រក្សាសិទ្ធិដោយ thmeythmey.com