អន្តរជាតិ
ប៉េរូ៖ បុរាណវិទូ បានរកឃើញរណ្ដៅសាកសពក្មេងជាង២០០នាក់ រូបភាព AFP
×
ដោយ៖ ងួន សុភាវត្តី
បុរាណវិទូនៅប៉េរូ បាននិយាយថាសាកសពក្មេង២២៧នាក់ ត្រូវបានរកឃើញនៅក្រោមដី ដែលសាកសពទាំងនេះត្រូវបានគេជឿថា ជាគ្រឿងបូជាក្នុងពិធីបូជាយញ្ញនៃវប្បធម៌ជនជាតិChimu។ បើយោងតាមបុរាណវិទូ នេះគឺជាការបូជាក្មេងច្រើនបំផុតដែលពួកគេបានរកឃើញ។
អ្នកបុរាណវិទូបានចាប់ផ្តើមជីករកសាកសពទាំងនេះតាំងពីឆ្នាំមុនមកម្លេះនៅតំបន់ឆ្នេរទេសចរណ៍ Huanchaco ដែលនៅខាងជើងនៃរដ្ឋធានីលីម៉ា។ យោងតាមប្រធានបុរាណវិទូលោក Feren Castillo បានប្រាប់ទីស្នាក់ងារព័ត៌មាន AFP នៅថ្ងៃទី២៧ ខែសីហាថា នេះជាកន្លែងដែលធំបំផុតដែលសាកសពក្មេងជាច្រើននាក់ត្រូវបានរកឃើញ។
លោក Castillo បានបន្តថា ក្មេងអាយុចន្លោះពី៤ទៅ១៤ឆ្នាំត្រូវបានចាប់យកទៅបូជាក្នុងពិធីបុណ្យសាសនាមួយដើម្បីឧទ្ទិសថ្វាយដល់ព្រះក្នុងវប្បធម៌ Chimu នេះ។ ពួកគេត្រូវបានបូជាក្នុងបាតុភូត El Nino។ បើតាមបុរាណវិទូរូបនេះ ប្រហែលជានៅមានសាកសពមួយចំនួនទៀតដែលអាចនឹងរកឃើញបន្ថែម។
សាកសពដែលបានរកឃើញទាំងនេះគឺសុទ្ធតែបែរមុខរកសមុទ្រ ហើយសាកសពខ្លះទៀតគឺនៅមានសក់និងស្បែកនៅជាប់ខ្លួននៅឡើយ។ តំបន់ Huanchaco គឺជាកន្លែងដែលបានកប់សាកសពក្មេងជាច្រើននៅចន្លោះពេលឆ្នាំ1200 និង 1400។ នេះជាពេលដែលវប្បធម៌ Chimu ឈានដល់ចំណុចកំពូល។
ក្រុមអ្នកបុរាណវិទូបានរកឃើញសាកសពដំបូងនៅទីក្រុង Pampa la Cruz ក្នុងខែមិថុនា ឆ្នាំ២០១៨។ បន្ទាប់ពីនោះ គេក៏បានរកឃើញសាកសព៥៦នាក់បន្ថែមទៀត។ នៅទីក្រុង Huanchaquito ដែលនៅជិតទីក្រុង Pampa la Cruz បុរាណវិទូក៏បានរកឃើញសាកសពក្មេង១៤០នាក់និងសត្វ llamas ជាង២០០ក្បាលផ្សេងទៀត ដែលប្រទះឃើញកាលពីខែមេសា ឆ្នាំ២០១៨។
គួររំលឹកដែរថា អរិយធម៌ Chimu នេះត្រូវបានលិចបាត់ទៅវិញនៅឆ្នាំ១៤៧៥ដោយសារការចូលលុកលុយរបស់អាណាចក្រ Inca ៕
© រក្សាសិទ្ធិដោយ thmeythmey.com