ព្រះរាជអាជ្ញាម៉ាឡេស៊ី បានចោទប្រកាន់អតីតនាយករដ្ឋមន្ត្រីម៉ាឡេស៊ី ណាជីប រ៉ាហ្សាក់ថា បានរំលោភអំណាច បិទបាំងរឿងលួចលុយរាប់លានដុល្លារពីមូលនិធិរដ្ឋ 1MDB ហើយលោកក៏បានយកលុយទាំងនោះដើម្បីបម្រើផលប្រយោជន៍ផ្ទាល់ខ្លួន។
នៅថ្ងៃពុធទី ២៨ សីហា ដែលជាថ្ងៃបើកសវនាការក្នុងរឿងអាស្រូវហិរញ្ញវត្ថុកក្រើកម៉ាឡេស៊ី 1MDB ព្រះរាជអាជ្ញាធរម៉ាឡេស៊ី Gopal Sri Ram បាននិយាយថា លោក ណាជីប បានប្រើតួនាទីកំពូលលោកជានាយករដ្ឋមន្ត្រីគេចវេះពីសំណាញ់ច្បាប់ ជាពិសេសគឺ ក្រោយបែកធ្លាយព័ត៌មានជុំវិញរឿងអាស្រូវលួចលុយជាតិ កាលពីខែកក្កដា ឆ្នាំ២០១៥។
ប្រាប់តុលាការកំពូលក្រុងកូឡាឡាំពួ លោក Gopal លើកឡើងថា លោកអតីតនាយករដ្ឋមន្ត្រី ណាជីប បានលូកដៃក្នុងដំណើរការស៊ើបអង្កេតលើករណីរឿងអាស្រូវ 1MDB ដោយប្រើរាល់មធ្យោបាយទាំងអស់ដើម្បីបិទបាំងអំពើឧក្រិដ្ឋកម្មរបស់លោក។ នេះបើតាមការចុះផ្សាយទូរទស្សន៍សិង្ហបុរី Channel News Asia ។
និយាយដល់រឿងអាស្រូវនោះ អាជ្ញាធរមា៉ឡេស៊ី និងសហរដ្ឋអាមេរិក អះអាងថា លុយប្រមាណ ៤,៥ពាន់លានដុល្លារ ត្រូវបានកេងប្រវ័ញ្ចចេញពីកម្មវិធីអភិវឌ្ឍន៍ 1MDB ដែលជាមូលនិធិរដ្ឋ បង្កើតឡើងដោយលោក ណាជីប ក្នុងឆ្នាំ២០០៩។
ក្រោយចាញ់ឈ្នះ អស់តំណែងនាយករដ្ឋមន្ត្រីកាលពីឆ្នាំ២០១៨ លោក ណាជីប ត្រូវបានចោទប្រកាន់បទល្មើសព្រហ្មទណ្ឌចំនួន ៤២ករណី ពាក់ព័ន្ធនឹងការបាត់បង់លុយក្នុងមូលនិធិ 1MDB និងស្ថាប័នរដ្ឋផ្សេងទៀត។ ទោះជាបែបនេះក្តី លោក បានបដិសេធការចោទប្រកាន់ទាំងនេះ ដោយបកស្រាយថា ការចោទប្រកាន់ប្រឆាំងលោកទាំងអស់ មានចរិតនយោបាយ។
ក្នុងសវនាការលើកទី២ នៅថ្ងៃពុធទី ២៨ សីហា ដដែលនេះ លោក ណាជីប ប្រឈមការចោទប្រកាន់ ២១ករណីពាក់ព័ន្ធនឹងរឿងលាងលុយកខ្វក់ និង៤ករណីទាក់ទងនឹងការរំលោភអំណាច ក្រោមរូបភាពទទួលលុយខុសច្បាប់យ៉ាងតិច ៥៥០,៨លានដុល្លារ ចន្លោះពីឆ្នាំ ២០១១ និង ២០១៤។ អយ្យការម៉ាឡេស៊ី ចោទលោក ណាជីបថា បានប្រើមូលនិធិរដ្ឋ 1MDB ជាឈ្នាន់ដើម្បីបម្រើផលប្រយោជន៍ផ្ទាល់ខ្លួន។
ម្យ៉ាងវិញទៀត អយ្យការម៉ាឡេស៊ី លើកឡើងថា លោក ណាជីប ពុំបានប្រព្រឹត្តសកម្មភាពនេះតែឯកឯងនោះទេ។ លោកបានឃុបឃិតជាច្រើនករណីជាមួយមហាសេដ្ឋីម៉ាឡេស៊ី លោក Low Taek Jho ស្គាល់ថា Jho Low ។ បច្ចុប្បន្ន លោក Low ដែលប្រឈមការចោទប្រកាន់ពីសំណាក់អាជ្ញាធរម៉ាឡេស៊ី និងសហរដ្ឋអាមេរិកជុំវិញការចូលដៃក្នុងរឿងអាស្រូវដ៏កក្រើកនេះ បានទាត់ចោលការចោទប្រកាន់ទាំងអស់ ហើយក៏ព្យាយាមលាក់បាំងទីកន្លែងលោកតាំងទីផងដែរ។ លោក Low ពុំមានកាន់មុខងារអ្វីផ្លូវការក្នុង 1MDB ទេ ប៉ុន្តែគេជឿថាលោកមានឥទ្ធិពលខ្លាំងលើប្រតិបត្តិការរបស់វា។
សូមបញ្ជាក់ថា ក្រោយពីចាញ់ឆ្នោត លោកអតីតនាយករដ្ឋមន្ត្រី ណាជីប និងភរិយា លោកស្រី Rosman Mansor ត្រូវបានអាជ្ញាធម៉ាឡេស៊ីដាក់បម្រាមចាកចេញពីទឹកដីម៉ាឡេស៊ី។ ក្រោយបើកការស៊ើបអង្កេតយ៉ាងលម្អិតជុំវិញជីវិតដ៏ប្រណីតពួកគេ ប៉ូលិសម៉ាឡេស៊ី បានរកឃើញ គ្រឿងអលង្ការ និងសាច់ប្រាក់ គិតជាទឹកប្រាក់រហូតដល់ ៣០០លានដុល្លារ ពាក់ព័ន្ធនឹងលោកណាជីប។ លោកស្រី Rosmah ដែលល្បីឈ្មោះដោយសារគ្រឿងអលង្ការ និងកាបូនយូរដៃប្រណិតៗតម្លៃថ្លៃៗ ក៏ត្រូវបានចោទប្រកាន់ពីបទពុករលួយ។ ប៉ុន្តែលោកស្រីច្រានចោល។
ដំណើរការសវនាការនៅថ្ងៃពុធនេះ បានចាប់ផ្តើមមួយថ្ងៃប៉ុណ្ណោះក្រោយពីអយ្យការម៉ាឡេស៊ីបានបិទសំណុំរឿងទីមួយរបស់លោកណាជីប ដោយលោកត្រូវបានចោទប្រកាន់ថា បានទទួលយកលុយដោយខុសច្បាប់ប្រមាណ ១០លានដុល្លារ ពី SRC International ដែលជាអតីតស្ថាប័នមួយរបស់ IMDB ៕