អន្តរជាតិ
ផ្អាកប្រជុំសភា លោក ចនសុន ចង់អូសអង់គ្លេសចេញពីអឺរ៉ុបដោយគ្មានកិច្ចព្រមព្រៀង?
នាយករដ្ឋមន្រ្តីអង់គ្លេស បូរីស ចនសុន ។ រូបភាព AFP
×![]()
ដោយ: តន ចាន់រិទ្ធារ៉ា
នាយករដ្ឋមន្ត្រីអង់គ្លេស បូរីស ចនសុន នៅថ្ងៃទី២៨ ខែសីហា បានប្រកាសផ្អាកកិច្ចប្រជុំសភារយៈពេលប្រាំសប្ដាហ៍ ដែលធ្វើឲ្យមានការផ្ទុះកំហឹងយ៉ាងខ្លាំងពីសមាជិកសភាដែលមាននិន្នាការគាំទ្រអឺរ៉ុប និងអ្នកគាំទ្រការចាកចេញពីសហភាពអឺរ៉ុបដោយមានកិច្ចព្រមព្រៀង។ ខឹង ព្រោះពួកគេជឿថា លោក ចនសុន មិនចង់ឲ្យសភាមានពេលគ្រប់គ្រាន់ដើម្បីរារាំងការចាកចេញដោយគ្មានកិច្ចព្រមព្រៀងតាមការចង់បានរបស់លោក។ 
ផ្អាកប្រជុំសភា លោក ចនសុន ចង់អូសអង់គ្លេសចេញពីអឺរ៉ុបដោយគ្មានកិច្ចព្រមព្រៀង? នេះជាសំណួរដែលលេចឡើងក្រោយនាយករដ្ឋមន្ត្រីចក្រភពអង់គ្លេស បូរីស ចនសុន នៅថ្ងៃទី២៨ ខែសីហាប្រកាសព្យួរកិច្ចប្រជុំសភាច្រើនសប្ដាហ៍នោះ។ មហាក្សត្រិយានី អេលីហ្សាប៊ែតទី២ ក៏បានប្រោសប្រទានការយល់ព្រមតាមសំណើរបស់លោក ចនសុន រួចហើយដែរ។ ប៉ុន្តែសមាជិកសភាជាច្រើន បានបង្ហាញជំទាស់នឹងការលើកពេលប្រជុំក្នុងកាលៈទេសៈបែបនេះ។
តាមពិតទៅ ការប្រកាសផ្អាកកិច្ចប្រជុំអំឡុងខែកញ្ញាដល់ខែតុលានេះ ជារឿងធម្មតានៅអង់គ្លេស ព្រោះជាពេលដែលបក្សធំៗ បើកកិច្ចប្រជុំរបស់ខ្លួន។ ប៉ុន្តែអ្វីដែលធ្វើឲ្យមានការផ្ទុះកំហឹងនោះ គឺការផ្អាកពេលនេះដែលចាប់ផ្ដើមពីពាក់កណ្ដាលខែកញ្ញាដល់ថ្ងៃទី១៤ ខែតុលា ធ្វើឡើងប៉ុន្មានសប្ដាហ៍មុនអង់គ្លេសត្រូវចាកចេញពីសហភាពអឺរ៉ុបនៅថ្ងៃទី៣១ ខែតុលា។ បានន័យថា សភានឹងមានពេលតិចតួចដើម្បីធ្វើច្បាប់រារាំងលោក ចនសុន ដែលចង់ដឹកដៃអង់គ្លេសចេញដោយគ្មានកិច្ចព្រមព្រៀង។
មុនការសម្រេចចិត្តរបស់លោក ចនសុន សមាជិកសភាអង់គ្លេស ក៏មានគម្រោងបោះឆ្នោតដើម្បីលុបចោលការសម្រាករបស់ខ្លួនផងដែរ ប៉ុន្តែលោក ចនសុន បែរជាប្រើអំណាចក្នុងនាមប្រមុខស្ថាប័នីតិប្រតិបត្តិរបស់ខ្លួនជាមុនទៅវិញ។ ប្រធានរដ្ឋសភាអង់គ្លេស លោក John Bercow ដែលជាតំណាងរាស្ត្របក្សអភិរក្សរបស់លោក ចនសុន ដែរនោះ ចាត់ទុកការផ្អាកកិច្ចប្រជុំសភានេះ ជាការបំពានរដ្ឋធម្មនុញ្ញដោយកំរោល។
ពាក់ព័ន្ធបញ្ហានេះ លោក ចនសុន បកស្រាយថា លោកគ្រាន់តែអនុវត្តតាមលំអានចាស់ប៉ុណ្ណោះ មុននឹងមហាក្សត្រិយានីអេលីហ្សាប៊ែតទី២ មានព្រះរាជសុន្ទរកថាពីគោលនយោបាយរបស់រដ្ឋាភិបាល។ ប៉ុន្តែសមាជិកសភា និងអ្នកនយោបាយជាច្រើនមិនជឿលោក ចនសុន ឡើយ ហើយក៏មិនជឿថា លោកគ្រាន់តែចង់អនុវត្តតាមរបៀបវារៈក្នុងស្រុកដែរ។ ការចាកចេញពីសហភាពអឺរ៉ុប ទើបជារឿងសំខាន់នៃការផ្អាកកិច្ចប្រជុំសភា។
ទោះជាយ៉ាងណា បើគិតតាមកាលបរិច្ឆេទនៃការព្យួរសភារហូតដល់ថ្ងៃទី៣១ ខែតុលា សមាជិកសភានៅមានពេលដើម្បីទប់ស្កាត់ការចាកចេញដោយគ្មានកិច្ចព្រមព្រៀង។ ការចាកចេញដោយគ្មានកិច្ចព្រមព្រៀង ជាសេណារីយោអាក្រក់បំផុតសម្រាប់អង់គ្លេស និងសហភាអឺរ៉ុប ខណៈសភាអង់គ្លេសបានបដិសេធកិច្ចព្រមព្រៀងចាកចេញពីររួចទៅហើយ។ លើសពីនោះ ថ្ងៃទី៣១ ខែតុលា ក៏ទំនងជាកាលបរិច្ឆេទចុងក្រោយដែលអង់គ្លេសជាសមាជិកសហភាពអឺរ៉ុបផងដែរ៕
Tag:
អង់គ្លេស
Brexit
បូរីស ចនសុន
© រក្សាសិទ្ធិដោយ thmeythmey.com
