ជាតិ
តំបន់ខ្លះនៅរតនគិរី ត្រូវជន់លិច បណ្ដាលឲ្យរលំបង្គោលភ្លើង៧ដើមនិងងាប់គោ៣ក្បាល រូបភាពពីមន្ទីរធនធានទឹកនិងឧតុនិយមខេត្តរតនគិរី
× បន្ទាប់ពីមានភ្លៀងធ្លាក់កាលពីយប់ថ្ងៃទី២៨ដល់ព្រឹកថ្ងៃទី២៩សីហា នៅក្រុងបានលុងនិងស្រុកមួយចំនួនក្នុងខេត្តរតនគិរីបានរងនូវការជន់លិច បណ្ដាលឲ្យរលំបង្គោលភ្លើង៧ដើម គោ៣ក្បាលងាប់ និងលិចផ្ទះពលរដ្ឋ រួមទាំងផ្លូវផងដែរ។ នេះបើតាមរបាយការណ៍បឋមដែលសារព័ត៌មានថ្មីៗ ទទួលបានពីលោក នាង សំអាត នាយករដ្ឋបាលខេត្តរតនគិរី នៅថ្ងៃទី២៩សីហា ឆ្នាំ២០១៩។
នៅខេត្តរតនគិរី ក្រុងបានលុង បានរងនូវជំនន់ទឹកភ្លៀង បណ្ដាលឲ្យប៉ះពាល់ និងខូចខាតសម្ភារមួយចំនួននៅសង្កាត់បឹងកន្សែង នៅភូមិអូរកន្តិល បានបាក់ជញ្ជាំងផ្ទះមួយកន្លែងនិងចំណុចអូរសុភមង្គល ទឹកហូរជ្រុះដីប្រមាណ២គុណ៧ម៉ែត្រ។
ចំណែកនៅភូមិភ្នំស្វាយ បានរលំបង្គោលភ្លើង៣ដើម ហើយនៅព្រឹកនេះក្រុមការងារអគ្គិសនីកំពុងជួសជុល។ ការធ្លាក់ភ្លៀងខ្លាំងនេះ បណ្ដាលឲ្យសង្កាត់ឡាបានសៀក រលំបង្គោលភ្លើង៥ដើម និងសង្កាត់កាចាញ មានស្ថានភាពទឹកអូរឡើងខ្ពស់។
រីឯ ជន់លិចតំបន់មួយចំនួននៅតាមអូរ ដូចជាអូរកាញ អូរកាទៀង និងអូរទទឹង ដែលក្នុងឃុំល្បាំងមួយ ស្រុកលំផាត់ មានគោ៣ក្បាលងាប់។ ចំណែក ស្រុកអូរជុំ មានករណីជំនន់ទឹកភ្លៀង បណ្តាលឲ្យលិចផ្លូវលំមួយកន្លែង។ ពាក់ព័ន្ធនឹង ស្ថានភាពទឹកនៅទន្លេសេសាន ក្នុងស្រុករើនសៃ និងទន្លេស្រែពក ស្រុកលំផាត់ អាជ្ញាធរ បានប្រកាសឲ្យពលរដ្ឋមានការប្រុងប្រយ័ត្នផងដែរ៕
© រក្សាសិទ្ធិដោយ thmeythmey.com