ជាតិ
សង្គមជាតិ
អូស្រា្តលី ផ្តល់ទឹកប្រាក់២.៩ លានដុល្លារសម្រាប់កិច្ចការស្រាវជ្រាវលើវិស័យកសិកម្ម សុខាភិបាល ពាណិជ្ជកម្ម និងសេដ្ឋកិច្ច
×![]()
ភ្នំពេញ៖ រដ្ឋាភិបាលអូស្ត្រាលី ផ្តល់ថវិកាចំនួន២.៩លានដុល្លារ សម្រាប់អនុវត្តគម្រោងក្នុងរយៈពេល៣ឆ្នាំចាប់ពីឆ្នាំ២០១៩ ដល់ឆ្នាំ២០២២ លើកិច្ចការស្រាវជ្រាវអំពីវិស័យអប់រំ កសិកម្ម សុខាភិបាល ពាណិជ្ជកម្ម និងសេដ្ឋកិច្ច នៅកម្ពុជា។ ឯកអគ្គរាជទូតអូស្ត្រាលីប្រចាំប្រទេសកម្ពុជា លោកស្រី Angela Corcoran ជឿជាក់ថាគម្រោងនេះនឹងអាចជួយលើកម្ពស់ឲ្យកិច្ចការស្រាវជ្រាវលើវិស័យសំខាន់ៗប្រកបដោយគុណភាព ដើម្បីឲ្យមានអំណះអំណាង ភស្តុតាងច្បាស់លាស់ សម្រាប់ផ្តល់ជាអនុសាសន៍ដល់រាជរដ្ឋាភិបាលកម្ពុជា។ 
ថ្លែងនៅក្នុងកម្មវិធីសម្ពោធដាក់ឲ្យដំណើរការគម្រោង«ពន្លកចំណេះ»ដែលជាគម្រោងកិច្ចការស្រាវជ្រាវលើវិស័យសំខាន់ៗនៅកម្ពុជា លោកស្រី Angela Corcoran ឯកអគ្គរាជទូតអូស្ត្រាលីប្រចាំប្រទេសកម្ពុជា កាលពីថ្ងៃទី២៩ ខែសីហា បានបញ្ជាក់ថា គម្រោងនេះនឹងធ្វើឲ្យកិច្ចការស្រាវជ្រាវលើវិស័យសំខាន់ៗនៅកម្ពុជាមានគុណភាព ប្រសិទ្ធភាព និងឈានដល់គោលដៅ មានភស្តុតាងច្បាស់លាស់ និងជួយសង្គមស៊ីវិល និងរដ្ឋាភិបាលត្រៀមខ្លួនសម្រាប់ដោះស្រាយបញ្ហាប្រឈម ដែលកម្ពុជានឹងជួបប្រទះ ស្របពេលដែលសម្បត្តិជាតិមានការកើនឡើង។
លោកស្រី Angela Corcoran ឯកអគ្គរាជទូតអូស្ត្រាលីប្រចាំប្រទេសកម្ពុជា អះអាងថាកម្ពុជានឹងមានចំណូលខ្ពស់ត្រឹមឆ្នាំ២០៥០ខាងមុខ។ ដើម្បីឈានដល់ចំណុចនេះ កិច្ចការស្រាវជ្រាវ និងការប្រើប្រាស់ភស្តុតាងជាក់លាក់ ពិតជាដើរតួសំខាន់ដើម្បីពន្យល់អំពីការសម្រេចចិត្តរបស់អ្នកបង្កើតគោលនយោបាលពេលខាងមុខ»។
តាមរយៈគម្រោងនេះ លោកស្រី Angela Corcoran ឯកអគ្គរាជទូតអូស្ត្រាលីប្រចាំប្រទេសកម្ពុជា ជឿជាក់ថានឹងអាចពង្រឹងកិច្ចទំនាក់ទំនងរវាងរាជរដ្ឋាភិបាលអូស្ត្រាលី និងរាជរដ្ឋាភិបាលកម្ពុជា ឲ្យកាន់តែរឹងមាំបន្ថែមទៀត។ ក្នុងគម្រោងនេះទៀតសាត ក៏អនុញ្ញាតឲ្យបណ្តានិស្សិតទាំងអស់អាចចូលរួមចែករំលែក និងសិក្សាពីអ្នកអនុវត្តគម្រោង និងអ្នកដែលធ្វើកិច្ចការស្រាវជ្រាវផ្ទាល់ផងដែរ។
ក្នុងរយៈពេលជាង២៥ឆ្នាំកន្លងមកនេះ រាជរដ្ឋាភិបាលអូស្ត្រាលីបានផ្តល់ជំនួយប្រមាណ១.៣ ប៊ីលានដុល្លារ សម្រាប់អភិវឌ្ឍវិស័យអនុភាពដូចជា វិស័យអប់រំ កសិកម្ម សុខាភិបាល និងហេដ្ឋារចនាសម្ព័ន្ធ ឲ្យកាន់តែប្រសើរឡើង៕
Tag:
អូស្ត្រាលី
ជំនួយ
© រក្សាសិទ្ធិដោយ thmeythmey.com
