អន្តរជាតិ
បូលីវី ថា ព្រៃឈើជាង១លានហិកតាត្រូវបានបាត់បង់ដោយសារភ្លើងឆេះ ភ្លើងឆេះព្រៃនៅបូលីវី។ រូបភាព AFP
×
ដោយ៖ ងួន សុភាវត្តី
ភ្លើងឆេះព្រៃបានបំផ្លាញព្រៃឈើ និងវាលស្មៅចំនួន១.២លានហិកតានៅបូលីវីក្នុងឆ្នាំ២០១៩នេះ។ នេះបើយោងតាមការប្រកាសរបស់រដ្ឋាភិបាលបូលីវីនៅថ្ងៃទី២៨ ខែសីហា។ ទោះជាយ៉ាងនេះក្តី អ្នកបរិស្ថានបាននិយាយថា ទំហំព្រៃឈើបាត់បង់ដោយការឆេះ គឺមានទំហំធំជាងនេះ។
ព័ត៌មាននៃការបាត់បង់ព្រៃឈើសន្ធឹកសន្ធាប់នៅបូលីវី បានកើតឡើងបន្ទាប់ប្រធានាធិបតីលោក Evo Morales បានផ្អាកយុទ្ធនាការបោះឆ្នោតឡើងវិញនៅថ្ងៃទី២៦ ខែសីហាដើម្បីដឹកនាំរដ្ឋាភិបាលឆ្លើយតបទៅនឹងគ្រោះមហន្តរាយបរិស្ថានដែលកើតមាននៅក្នុងព្រៃបូលីវីដែលជាផ្នែកមួយនៃព្រៃអាម៉ាហ្សូន។
លោក Morales បានរងការរិះគន់កាន់តែខ្លាំងឡើងពីប្រជាជន ដោយសារមិនធ្វើសកម្មភាពដោះស្រាយទាន់ពេល ក៏ដូចជាការអនុវត្តគោលនយោបាយដែលនាំឲ្យមានការកាប់បំផ្លាញព្រៃឈើ។
ទំហំព្រៃឈើរបស់បូលីវីមានការរួញតូចទៅៗនៅក្នុងប៉ុន្មានឆ្នាំចុងក្រោយនេះ។ ជាក់ស្តែង កាលពីឆ្នាំ២០០៥ទំហំព្រៃឈើបូលីវីគឺ ៤៧.៣លានហិកតា ប៉ុន្តែនៅឆ្នាំ២០១៧ទំហំព្រៃឈើនេះគឺមានត្រឹមតែ៤៣.៨លានហិកតាតែប៉ុណ្ណោះ។ នេះបើយោងតាមការសិក្សារបស់អង្គការបរិស្ថាននិងសិទ្ធិមនុស្សបូលីវី Solon Foundation។
ពាក់ព័ន្ធទំហំព្រៃឈើបាត់បង់វិញ អង្គការក្រៅរដ្ឋាភិបាល The Friends of Nature Foundation បាននិយាយថាទំហំពិតប្រាកដដែលបានបំផ្លាញដោយភ្លើងនេះគឺ ១.៨លានហិកតាឯណោះ។ អ្នកសិក្សាបរិស្ថានបានរិះគន់ពីច្បាប់ដែលបានដាក់អោយអនុវត្តដោយលោក Morales ដែលច្បាប់នេះបានលើកទឹកចិត្តអោយមានការដុតព្រៃដើម្បីយកដីនោះមកដាំដំណាំវិញ។
រដ្ឋាភិបាលរបស់លោក Morales មានគម្រោងនឹងដាំដើមឈើចំនួន៤.៥លានហិកតាឡើងវិញនៅឆ្នាំ២០៣០ ដើម្បីឆ្លើយតបតាមរបស់អង្គការសហប្រជាជាតិ។ ប៉ុន្តែគម្រោងនេះត្រូវបានរិះគន់ដោយអ្នកបរិស្ថានមួយចំនួនវិញ។ ពួកគេបានលើកឡើងថា គម្រោងនេះត្រូវបានរដ្ឋាភិបាលលើកឡើង៣ឆ្នាំមកហើយ ប៉ុន្តែពួកគាត់មិនទាន់ឃើញមានការដាំដើមឈើនេះកើតឡើងនៅឡើយទេ គ្មានសូម្បីតែដាំលើដី ៥ម៉ឺន ហិកតា៕
© រក្សាសិទ្ធិដោយ thmeythmey.com