អន្តរជាតិ
កូរ៉េខាងត្បូងថា ថាជប៉ុនមិនមានភាពស្មោះត្រង់ចំពោះប្រវត្តិសាស្ត្រ ប្រធានាធិបតី មូន ចេអុីន
× ប្រធានាធិបតី មូន ចេអ៊ីននៅថ្ងៃទី២៩ ខែសីហា ជំរុញឲ្យជប៉ុនមានភាពស្មោះត្រង់ចំពោះប្រវត្តិសាស្ត្រ និងមានហេតុផលត្រឹមត្រូវលើការរឹតត្បិតការនាំចេញពាណិជ្ជកម្មទៅកូរ៉េខាងត្បូង ខណៈពេលភាពតានតឹងរវាងប្រទេសទាំងពីរកាន់តែរីកធំឡើង។
ជប៉ុនមិនបានបង្ហាញភាពស្មោះត្រង់របស់ខ្លួនលើហេតុផលនៃការសងសឹកពាណិជ្ជកម្មឡើយ ហើយថែមទាំងបង្ហាញថាសកម្មភាពរបស់ខ្លួនត្រឹមត្រូវទៀត បើទោះបីជាគ្មានមូលដ្ឋានច្បាស់លាស់ក៏ដោយ។ ជាពិសេសជប៉ុនជាញយៗផ្លាស់ប្តូរការអះអាងរបស់ខ្លួនជានិច្ច។ នេះជាអ្វីដែលលោកប្រធានាធិបតីកូរ៉េខាងត្បូងបាននិយាយនៅក្នុងអំឡុងកិច្ចប្រជុំគណរដ្ឋមន្ត្រី នៅការិយាល័យប្រធានាធិបតី Cheong Wa Dae។
ប្រាប់ទីភ្នាក់ងារសារព័ត៌មានរបស់កូរ៉េខាងត្បូង Yonhap លោក មូន បានលើកឡើងថា៖ «ហេតុផលអ្វីក៏ដោយ វាជាក់ស្តែងណាស់ថា រដ្ឋាភិបាលជប៉ុនគឺភ្ជាប់ រឿងសេដ្ឋកិច្ចទៅនឹងបញ្ហាប្រវត្តិសាស្ត្រ ខ្ញុំមិនអាចនិយាយពីវាបានទេ ប៉ុន្តែវាពិតជាកាយវិការគ្មានការគោរពទាល់តែសោះ»។ គាត់បានផ្ញើរពាក្យទៅភាគីជប៉ុនថា ការទទួលស្គាល់ និងភាពស្តាយក្រោយនូវសកម្មភាពរបស់ខ្លួន ដែលបានធ្វើនូវក្នុងអតីតកាល គឺជាគន្លឹះក្នុងការដោះស្រាយជម្លោះរវាងប្រទេសទាំងពីរ។
មែនទែនទៅប្រទេសទាំងពីរ បានចោទគ្នាទៅវិញទៅមក រឿងកែប្រែប្រវត្តិសាស្ត្រប្រទេស។ ជាក់ស្តែងរដ្ឋមន្ត្រីការបរទេសជប៉ុន លោក Taro Kono បានលើកឡើងថា ប្រសិនបើកូរ៉េខាងត្បូងកំពុងព្យាយាមកែប្រែប្រវត្តិសាស្ត្រ វាមិនអាចទៅរួចទេ។ ជាការឆ្លើយតបទៅនឹងជប៉ុន អនុប្រធានទីប្រឹក្សាសន្តិសុខជាតិរបស់ប្រធានាធិបតីកូរ៉េ លោក Kim Hyun-chong កាលពីថ្ងៃទី២៨ ខែសីហា បានចោទជប៉ុនវិញថាប៉ុនប៉ងកែប្រែប្រវត្តិសាស្ត្រ។
យ៉ាងណាមិញ លោក មូន ចេអ៊ីន គូសបញ្ជាក់ថា កូរ៉េ និងប្រទេសជាច្រើនទៀតនៅក្នុងតំបន់អាស៊ី សុទ្ធតែមានប្រវត្តិសាស្ត្រមិនល្អមួយ ហើយជប៉ុន ជាអ្នកធ្វើរឿងទាំងនោះ។ គាត់បានបន្ថែមទៀតថា អាកប្បកិរិយារបស់រដ្ឋាភិបាលជប៉ុន មិនទទួលស្គាល់ និងមិនសោកស្តាយឡើយ ចំពោះប្រវត្តិសាស្ត្ររបស់ខ្លួន។ ជាពិសេសថែមទាំងព្យាយាមកែប្រែប្រវត្តិសាស្ត្រមួយផ្សេងទៀត ហើយវាធ្វើឲ្យប៉ះពាល់ដល់ជនរងគ្រោះខ្លាំងណាស់។
សូមបញ្ជាក់ថាជម្លោះរវាងកូរ៉េខាងត្បូង និងជប៉ុន កើតឡើងដោយសារសាលដីកាតុលាការជាន់ខ្ពស់កូរ៉េខាងត្បូង បញ្ជាឲ្យក្រុមហ៊ុនជប៉ុនផ្តល់សំណងទៅជនរងគ្រោះ ដែលត្រូវបានបង្ខំឲ្យធ្វើការនៅក្នុងសម័យសង្គ្រាម។ ប៉ុន្តែត្រូវជប៉ុនបដិសេធ ហើយរឿងនោះបានទូរទាត់រួចរាល់អស់ហើយតាំងពីឆ្នាំ១៩៦៥មកម្ល៉េះ។ ទាក់ទងទៅនឹងបញ្ហាខាងលើ ប្រទេសទាំងពីរបានឈានទៅដល់ការដកភាគីនីមួយៗចេញពីបញ្ជីពាណិជ្ជកម្មដែលគួរឲ្យទុកចិត្តបាន និងបញ្ឍប់ការចែករំលែកព័ត៌មានសំងាត់យោធាលក្ខណៈទ្វេភាគីទៀត៕
Tag:
កូរ៉េខាងត្បូង
ជប៉ុន
© រក្សាសិទ្ធិដោយ thmeythmey.com