​ការប្រគល់​ពាន UEFA Men's Player of the Year បាន​ប្រព្រឹត្ត​ធ្វើឡើង នៅ​យប់​ថ្ងៃទី​២៩ ខែសីហា ក្នុងប្រទេស​ម៉ូ​ណា​កូ ពោលគឺ​ស្របពេល​ពិធី​ចាប់ឆ្នោត​រើស​ពូ​ល UEFA Champions League រដូវ​កាល​ថ្មី ២០១៩-២០ នេះ​ផង​។ 
 

​ខ្សែបម្រើ​ឆ្នើម​សញ្ជាតិ​ហូ​ឡង់ Van Dijk បាន​ក្លាយជា​កីឡាករ​ល្អ​បំផុត​ដែល​រៀបចំ​ដោយ​សហព័ន្ធ​កីឡា​បាល់​ទ្វីបអឺរ៉ុប​ហៅ​កាត់​ថា UEFA​។ តាមរយៈ​ការបោះឆ្នោត​ពី​ក្រុម​គ្រូបង្វឹក ៦០​រូប  និង​អ្នកសារព័ត៌មាន​៥៥​នាក់ មកពី​ទូទាំង​ទ្វីបអឺរ៉ុប ខ្សែការពារ​ថ្លៃ​ជាងគេ​របស់ Liverpool ទទួលបាន​សំឡេងគាំទ្រ​៣០៥ ខណៈ Messi ២០៧​សំឡេង និង Ronaldo តិចជាងគេ​ត្រឹម ៧៤​សំឡេង​ប៉ុណ្ណោះ​។​
 

Van Dijk ដែល​ជួយ​ហង្ស​ក្រហម​ដណ្តើមបាន​ពាន Champions League រដូវ​កាល​មុន បាន​ក្លាយជា​ខ្សែការពារ​ដំបូង​បំផុត​ដែល​អាច​ឈ្នះ​ពាន​កីឡាករ​ល្អ​ប្រចាំ​អឺរ៉ុប​នេះ​។​
 

​ដោយឡែក តំណែង​អ្នកចាំទី​ល្អ​បំផុត​បាន​ទៅ Alisson Becker (Liverpool) ខ្សែការពារ Virgil van Dijk (Liverpool) ខ្សែបម្រើ Frenkie de Jong កាល​លេង​ឲ្យ Ajax តែ​សព្វថ្ងៃ​ផ្លាស់​ទៅ Barcelona និង ខ្សែប្រយុទ្ធ​ឆ្នើម​បាន​ទៅ Leo Messi (Barcelona)​។​
  
 

​សម្រាប់​ផ្នែក​នារី​វិញ ខ្សែការពារ​ក្រុម​ជម្រើសជាតិ​នារី​អង់គ្លេស Lucy Bronze ជា​អ្នក​គ្រង​ពាន Uefa Women's Player of the Year​។ Bronze ក៏បាន​ក្លាយជា​កីឡាការិនី​ដំបូង​ផងដែរ​របស់​អង់គ្លេស​ដែល​អាច​ឈ្នះ​ពានរ​បស់​អឺរ៉ុប តាមរយៈ​ការ​ប្រជែង​ឈ្នះ​មិត្ត​រួម​ក្រុម Lyon ពីររូប​ទៀត​ដូចជា Ada Hegerberg និង Amandine Henry ពី​ការបោះឆ្នោត​របស់​គ្រូបង្វឹក និង​អ្នកកាសែត​៕

 

​