ជាតិ
សង្គមជាតិ
សូមប្រុងប្រយ័ត្ន! ឥទ្ធិពលព្យុះ«ប៉ូដុល»នឹងធ្វើឲ្យទឹកទន្លេហក់ឡើងខ្ពស់
× ភ្នំពេញ៖ ក្រសួងធនធានទឹក និងឧតុនិយមបានព្យាករសាជាថ្មីថា រយៈពេលប៉ុន្មានថ្ងៃខាងមុខនេះកម្ពុជាទទួលរងឥទ្ធិពលព្យុះ «ប៉ូដុល» ដែលធ្វើឲ្យបណ្តាខេត្តដែលនៅជាប់ទន្លេមេគង្គ នឹងមានភ្លៀងធា្លក់បង្កឲ្យទឹកនៅទន្លេមានការហក់ឡើងខ្ពស់ផងដែរ។ នេះបើតាមការផ្សាយរបស់ក្រសួងធនធានទឹក និងឧតុនិយម។
តាមការព្យាកររបស់ក្រសួងធនធានទឹក ព្យុះ«ប៉ូដុល»បានធ្វើដំណើរចូលដល់ប្រទេសវៀតណាមភាគកណ្តាល រួចបន្តចូលប្រទេសឡាវ នៃអាងទន្លេមេគង្គ។ បាតុភូតនេះ បានធ្វើឲ្យប្រទេសឡាវ ថៃមានភ្លៀងធ្លាក់ខ្លាំងផងដែរ។ ចំណែកកម្ពុជា ក៏ទទួលរងនូវឥទ្ធិពលនេះផងដែរ។
បាតុភូតនេះ នឹងធ្វើឲ្យទឹកទន្លេមេគង្គហក់ឡើង ហើយកម្រិតនៃការហក់ឡើងនេះ អាចនឹងជិតដល់កម្រិតដែលត្រូវប្រុងប្រយ័ត្នផងដែរ។ បើតាមព្យាកររបស់ក្រសួង ទឹកទន្លេមេគង្គនៅស្ទឹងត្រែង អាចហក់ឡើងដល់ ១០,៥០ម៉ែត្រ, ខេត្តក្រចេះ ហក់ឡើងដល់២១ម៉ែត្រ, ខេត្តកំពង់ចាម អាចឡើងដល់១៣,៥០ម៉ែត្រ, ទន្លេនៅចតុមុខ អាចហក់ឡើងដល់៨ ម៉ែត្រ។ ចំណែកទន្លេសេកុង ទន្លេសេសាន និងទន្លេស្រែពក ក៏នឹងហក់ឡើងផងដែរ។
អាស្រ័យហេតុនេះ ក្រសួងសូមស្នើឲ្យស្ថាប័ន អាជ្ញាធរដែនដី ប្រជាពលរដ្ឋ ដែលរស់នៅតាមដងទន្លេមេគង្គ បង្កើនការប្រុងប្រយ័ត្ន ដើម្បីជៀសវាងនូវគ្រោះជាយថាហេតុ។ ទន្ទឹមនឹងនេះ ក្រសួងសូមឲ្យពលរដ្ឋត្រៀមវិធានការប្រមូល និងថែរក្សាទឹកទុក ដើម្បីប្រើប្រាស់នៅពេលខាងមុខ៕
Tag:
ទឹកជំនន់
ទន្លេមេគង្គ
ព្យុះ
អាកាសធាតុ
ភ្លៀង
© រក្សាសិទ្ធិដោយ thmeythmey.com