ជាតិ
នយោបាយជាតិ
លោក ឥត សារ៉ាត់ ថ្លែងសន្និសីទកាសែត កាលពីថ្ងៃទី២៩ ខែសីហា ឆ្នាំ២០១៩ ពេលត្រឡប់មកពីប្រទេសថៃ (រូបពីក្រសួងការពារជាតិ)
×![]()
ដោយ: ថ្មីៗ
ក្រសួងការពារជាតិ ចុះផ្សាយថា នាយឧត្តមសេនីយ៍ ឥត សារ៉ាត់ អគ្គមេបញ្ជាការរងនិងជានាយសេនាធិការចម្រុះនៃកងយោធពលខេមរភូមិន្ទ បង្ហើបពីផែនការនៃការអភិវឌ្ឍបន្ថែមទៅលើកងទ័ពជើងទឹក ដើម្បីឲ្យមានសមត្ថភាពកាន់ខ្ពស់ ក្នុងការការពារដែនសមុទ្រកម្ពុជា។ 
នាយឧត្តមសេនីយ៍ ឥត សារ៉ាត់ បង្ហើបពីផែនការនេះ នៅចំពោះមុខនាយឧត្តមនាវី ដេវីត សុន មេបញ្ជាការឥណ្ឌូប៉ាស៊ីហ្វិករបស់អាមេរិក ក្នុងឱកាសដែលអ្នកទាំងពីរបានជួបគ្នា ពេលទៅចូលរួមប្រជុំកំពូលថ្នាក់អគ្គបញ្ជាការនៃបណ្តាប្រទេសក្នុងតំបន់ឥណ្ឌូប៉ាស៊ីហ្វិក។ កិច្ចប្រជុំនេះ រៀបចំនៅទីក្រុងបាងកក ប្រទេសថៃ ក្រោមប្រធានបទ «កិច្ចសហប្រតិបត្តិការដោយសេរី និងបើកទូលាយនូវឥណ្ឌូប៉ាស៊ីហ្វិក» ដោយមានការចូលរួមពីមន្ត្រីយោធាជាន់ខ្ពស់មកពី៣២ប្រទេស។
នាយឧត្តមសេនីយ៍ ឥត សារ៉ាត់ បានឲ្យដឹងថា ក្រៅពីពង្រឹងសមត្ថភាពកងទ័ពជើងទឹក ស្ថាប័នយោធាកម្ពុជា ក៏នឹងអភិវឌ្ឍផែផងដែរ ដែលជាកន្លែងសម្រាប់ជួសជុល និង ថែទាំនាវា។ លោក បន្តថា ក្នុងពេលខាងមុខ កងទ័ពជើងទឹកកម្ពុជា នឹងទទួលបាននាវាមួយចំនួន សម្រាប់ប្រើប្រាស់ក្នុងការការពារដែនដែនទឹក។
ក្រសួងការពារជាតិ បានស្រង់សម្តីរបស់នាយឧត្តមសេនីយ៍ ឥត សារ៉ាត់ ដែលថ្លែងក្នុងសន្និសីតកាសែត ពេលមកដល់កម្ពុជាវិញ កាលពីថ្ងៃទី២៩ ខែសីហា ឆ្នាំ២០១៩ ទៅចុះផ្សាយដូច្នេះថា៖«ការធ្វើទាំងអស់នេះ គឺកងយោធពលខេមរភូមិន្ទ ជាអ្នកធ្វើដោយខ្លួនឯងសុទ្ធិសាធ មិនមានប្រទេសណាជួយឡើយ ហើយវា ជារបស់កម្ពុជា មិនមែនជារបស់អ្នកណា ដូចដែលប្រព័ន្ធផ្សព្វផ្សាយ បានលើកឡើងនោះទេ»។
យ៉ាងណា អគ្គមេបញ្ជាការរងរូបនេះ មិនទាន់អាចបញ្ជាក់ឡើយថា នាវាទាំងនោះ មានទំហំប៉ុនណា និងផលិតនៅប្រទេសណា៕
Tag:
ទ័ពជើងទឹក
ដែនសមុទ្រ
© រក្សាសិទ្ធិដោយ thmeythmey.com
