កីឡាអន្តរជាតិ
អន្តរជាតិ
Ronaldo រំពឹងថា មានឱកាសទទួលទានអាហារពេលល្ងាចជាមួយ Messi រូបភាព៖ វេបសាយផ្លូវការរបស់ UEFA
× វត្តមាន Cristiano Ronaldo និង Lionel Messi ក្នុងកម្មវិធីប្រកាសជ័យលាភីពានរង្វាន់កីឡាករឆ្នើមបំផុតប្រចាំឆ្នាំរបស់អឺរ៉ុប (UEFA Men's Player of the Year) និងចាប់ឆ្នោតរើសពូលក្របខណ្ឌ Champions League ឆ្នាំនេះ ពិតជាទទួលបានការចាប់អារម្មណ៍យ៉ាងខ្លាំងពីសំណាក់អ្នកចូលរួម និងអ្នកតាមដានជុំវិញពិភពលោក។
អ្នកទាំងពីរ បាននិយាយអំពីការប្រជែងគ្នារយៈពេលជាងមួយទសវត្សរ៍កន្លងមកក្នុងវិស័យបាល់ទាត់ អំឡុងចូលរួមកម្មវិធីខាងលើ ដែលរៀបចំនៅប្រទេសម៉ូណាកូ នាយប់ថ្ងៃទី២៩ ខែសីហា។ ក្នុងបទសម្ភាសន៍បែបសប្បាយៗពីសំណាក់ពិការិនី Ronaldo ថែមទាំងបង្ហើបសំដីថារូបគេចង់បបួល Messi ញ៉ាំអាហារពេលល្ងាចម្តងនៅថ្ងៃណាមួយ។
ខ្សែប្រយុទ្ធ Juventus និងខ្សែបម្រើរបស់ Barcelona ជាប់ឈ្មោះបេក្ខភាព៣រូបចុងក្រោយពានរង្វាន់កីឡាករឆ្នើមប្រចាំឆ្នាំរបស់ UEFA សម្រាប់សមិទ្ធផលរដូវកាលមុន។ យ៉ាងណា បើទោះខ្សែការពារ Virgil van Dijk របស់ក្រុម Liverpool ជាអ្នកគ្រងពាននេះក៏ដោយ ប៉ុន្តែក៏មិនបានធ្វើឲ្យអ្នកទាំងពីរខូចអារម្មណ៍នោះដែរ។ ផ្ទុយទៅវិញ Ronaldo និង Messi បែជាញ៉ាំងឲ្យកម្មវិធីទាំងមូលកាន់តែមានភាពសប្បាយរីករាយទៅវិញ។
អំឡុងពេល Ronaldo ប្រកបអាជីពនៅ Real Madrid ជិត១០ឆ្នាំ ពោលគឺមុនពេលចេញទៅ Juventus ជាសម័យកាលដ៏ក្តៅគគុកសម្រាប់ការប្រជែងគ្នាជាមួយ Barca ដែលមាន Messi។ ប្រធានក្រុមជម្រើសជាតិព័រទុយហ្គាល់ និងប្រធានក្រុមអាហ្សង់ទីនតែងតែត្រូវបានគេប្រៀបធៀបពីទម្រង់លេង ជាពិសេសអ្នកការសែតកីឡានៅជុំវិញពិភពលោកតែម្តង ដែលនាំឲ្យពួគេទាំងពីរទើសទាល់នឹងគ្នា។
យ៉ាងណាក៏ដោយ នៅពេលឆ្លើយសំណួររបស់ពិធីការិនីថាហេតុអ្វីអ្នកទាំងពីរមិនសូវបាននិយាយគ្នាច្រើនសោះ បើទោះមានវត្តមាន និងអង្គុយជិតគ្នានៅទីនេះស្ទើររាល់ឆ្នាំ Ronaldo ឆ្លើយទាំងញញឹមបន្ទាប់ពីការបកស្រាយរបស់ Messi ថា៖«ជាការពិតយើងមានទំនាក់ទំនងល្អ។ យើងមិនដែលញ៉ាំអាហារពេលល្ងាចជាមួយគ្នានៅឡើយទេ ប៉ុន្តែខ្ញុំសង្ឃឹមថានាពេលអនាគតយើងអាច។ គាត់បានជំរុញខ្ញុំ ហើយខ្ញុំក៏ជាអ្នកជំរុញគាត់ដែរក្នុងការក្លាយជាកីឡាករលំដាប់ពិភពលោកដល់សព្វថ្ងៃ។ វាពិតជាអស្ចារ្យ ដែលបានក្លាយជាផ្នែកមួយនៃប្រវត្តិសាស្ត្របាល់ទាត់»។
ការបកស្រាយរបស់ Ronaldo បែបនេះ បានទទួលការសាទរយ៉ាងខ្លាំងពីបណ្តាអ្នកចូលរួមទាំងអស់ក្នុងកម្មវិធីប្រចាំឆ្នាំរបស់ UEFA នេះ៕
Tag:
Cristiano Ronaldo
Lionel Messi
© រក្សាសិទ្ធិដោយ thmeythmey.com