ភ្នំពេញ៖ ជារៀងរាល់ថ្ងៃ ផ្សារទួលទំពូង ឬផ្សាររុស្សី មានសកម្មភាពលក់ដូរយ៉ាងមមាញឹក ដោយមានទាំងភ្ញៀវទេសចរជាតិ និងអន្តរជាតិ ចេញចូលទិញទំនិញ និងវត្ថុអនុស្សាវរីយ៍បណ្តាក់គ្នាឥតដាច់។ តើផ្សារទួលទំពូងមានលក្ខណៈពិសេសអ្វីខ្លះ? តើអ្នកទេសចរបរទេស និងអតិថិជនខ្មែរ និយាយអ្វីខ្លះពីផ្សារទួលទំពូង?
សូមអញ្ជើញស្តាប់បទយកការណ៍ ដែលរៀបចំ ដោយ លោក រ៉ឹម ភារី នៃសារព័ត៌មានថ្មីៗដូចតទៅ៖
ផ្សារទួលទំពូង ឬផ្សាររុស្សី មានទីតាំងស្ថិតនៅខណ្ឌចំការមន រាជធានីភ្នំពេញ។ ផ្សារដ៏ចំណាស់មួយនេះ ក្លាយជាកន្លែងលក់ទំនិញចម្រុះ ប៉ុន្តែអ្វីដែលទាក់ទាញភ្ញៀវទេសចរជាតិ និងអន្តរជាតិនៅទីនេះនោះ គឺការលក់សម្លៀកបំពាក់យ៉ាងសម្បូរបែប និងវត្ថុអនុស្សាវរីយ៍ដ៏ច្រើនសន្ធឹកសន្ធាប់។
លោក Thomas Lazaridis ជាភ្ញៀវទេសចរម្នាក់ ក្នុងចំណោមភ្ញៀវទេសចរបរទេសជាច្រើនទៀត ដែលដើរទិញទំនិញ និងវត្ថុអនុស្សាវរីយ៍ផ្សេងៗនៅក្នុងផ្សារទួលទំពូង។ ទេសចរជនជាតិបារាំងរូបនេះ ស្គាល់ផ្សារទួលទំពូងតាមរយៈមិត្តភក្តិ។ Thomas Lazaridis ដែលពាក់អាវក្រណាត់ដៃខ្លី និងខោខូវប៊ូយ ដៃទាំងសងខាងកាន់ថង់សំពីងសំពោងដែលក្នុងនោះមានសុទ្ធតែសម្លៀកបំពាក់នោះ បានចាត់ទុកផ្សារទួលទំពូងថា ជាកន្លែងដ៏ល្អនៅក្នុងការទិញសម្លៀកបំពាក់ និងវត្ថុអនុស្សាវរីយ៍។
លោក Thomas Lazaridis បាននិយាយយ៉ាងដូច្នេះថា៖ «នៅទីនេះមានរបស់របរគ្រប់យ៉ាង។ ខ្ញុំអាចទិញអ្វីៗបានគ្រប់យ៉ាង ដូចជាវត្ថុអនុស្សាវរីយ៍ និងសម្លៀកបំពាក់ជាដើម។ ទីនេះ ជាកន្លែងដ៏ល្អសម្រាប់ការទិញអីវ៉ាន់ ហើយតម្លៃទៀតសោតក៏សមរម្យ។ ផ្សារទួលទំពូងជាកន្លែងដ៏ល្អមួយ»។
ចេញពីតូបសម្លៀកបំពាក់តែបន្តិច គេសង្កេតឃើញមានតូបលក់វត្ថុអនុស្សាវរីយ៍តម្រៀបគ្នាស្អេកស្កះ។ តូបនីមួយៗ បានដាក់តាំងវត្ថុធ្វើពីឈើ ថ្ម ស្ពាន់ និងប្រាក់ជាដើម ដែលបានរចនាម៉ូដផ្សេងៗគ្នា ដោយខ្លះដាក់ផ្ទាល់លើឥដ្ឋការ៉ូ និងខ្លះទៀតព្យួរតាមជញ្ជាំងតូប លាយឡំនឹងសម្រស់អំពូងភ្លើងពណ៌លឿង ក្រហមយ៉ាងស្រស់ស្អាត ប្រកបដោយរបៀបរៀបរយ។
សូមអញ្ជើញទស្សនាវីដេអូអំពីទិដ្ឋភាពទូទៅរបស់ផ្សារ ទួលទំពូង ខាងក្រោមនេះ៖
កំពុងដើរមើលនាឡិកាក្នុងតូបមួយជាមួយនារីម្នាក់ ទាំងមិនទាន់បានទិញអ្វីនៅឡើយ លោក Faith Kim ភ្ញៀវទេសចរជនជាតិកូរ៉េ ដែលមានសក់ស្លូត រាងខ្ពស់ និងសម្បុរស បានរៀបរាប់ថា៖ «ខ្ញុំស្រឡាញ់នាឡិកានៅផ្សារទូលទំពូង។ វាមាននាឡិកាច្រើនណាស់នៅផ្សារទួលទំពូង។ ខ្ញុំមានអារម្មណ៍ថារំភើបណាស់»។
ក្នុងវ័យ២៧ឆ្នាំ Faith Kim បានមកលេងនៅកម្ពុជាចំនួន២ថ្ងៃ ប៉ុន្តែ មុនត្រឡប់ទៅកូរ៉េវិញ លោកក៏ឆ្លៀតចូលទិញវត្ថុអនុស្សាវរីយ៍មួយចំនួន។ មិនខុសពីភ្ញៀវទេសចរដទៃប៉ុន្មានទេ ការមកផ្សារទួលទំពូង ក៏ព្រោះនៅទីនេះ ក្រៅពីមានទំនិញច្រើនងាយស្រួលជ្រើសរើស និងមានតម្លៃធូរថ្លៃ ចំណែកអាជីវករមួយចំនួន ក៏អាចនិយាយភាសាអង់គ្លេសបាន ដែលបង្កើតភាពងាយស្រួលក្នុងការទំនាក់ទំនង។
អ្នកស្រី Agnes ភ្ញៀវទេសចរជនជាតិបារាំង ដែលមកកម្សាន្តនៅកម្ពុជារយៈពេល២សប្តាហ៍ ហើយបានមកផ្សារទូលទំពូង អំឡុងពេលអ្នកស្រីស្នាក់នៅភ្នំពេញ បន្ទាប់ពីបានទៅទស្សនាតំបន់អង្គរ កំពត និងខេត្តកែបជាមួយសមាជិកគ្រួសារ និងមិត្តភក្តិ៦នាក់ទៀត។ ដើរបណ្តើរ ជជែកគ្នាបណ្តើរ អ្នកស្រី Agnes ដែលមានវ័យ៦៣ឆ្នាំ បានរៀបរាប់ប្រាប់សារព័ត៌មានថ្មីៗយ៉ាងដូច្នេះថា៖ «ចាស! មិត្តភក្តិខ្ញុំមកទីនេះ គាត់បានទិញអាវយឺត។ តែសម្រាប់ ខ្ញុំមិនទិញអ្វីទេ។ ពេលខ្ញុំមកទីនេះ ខ្ញុំមានអារម្មណ៍ថារីករាយ»។
តាមពិតទៅ ផ្សារទួលទំពូង ក្រៅពីជាទីចូលចិត្តរបស់អ្នកទេសចរបរទេស តែផ្សារនេះ ក៏ជាទីពេញនិយមរបស់ពលរដ្ឋខ្មែរទូទៅផងដែរ។ អ្នកស្រី សៀ សុធីមុនីរម្យ ដែលមានផ្ទះម្តុំផ្សារហេងលី ប៉ុន្តែ អ្នកស្រីបែរធ្វើដំណើរឆ្ងាយគួរសម ដើម្បីមកទិញទំនិញកូនក្មេងនៅផ្សារទួលទំពូងនេះដែរ។
កំពុងរើសខោអាវកូនក្មេង ជាមួយកូនតូចដែលគេងក្នុងរទេះរុញ អ្នកស្រី សៀ សុធីមុនីរម្យ ដែលមានវ័យ២៩ឆ្នាំ មានរាងខ្ពស់ និងសម្បុរស បានអះអាងយ៉ាងដូច្នេះថា៖ «នៅទីនេះ អីវ៉ាន់ មើលទៅវាសមរម្យ តម្លៃក៏សមរម្យ គុណភាពក៏ល្អ អាចប្រើបាន។ បើសម្រាប់ខ្ញុំ ខ្ញុំមកទីនេះ ភាគច្រើនទិញឥវ៉ាន់កូនក្មេង ព្រោះ វាធូរថ្លៃ និងអាចប្រើប្រាស់បាន»។
ផ្សារទួលទំពូង ក្រៅពីល្បីថា មានសម្លៀកបំពាក់តម្លៃធូរថ្លៃ និងមានលក់វត្ថុអនុស្សាវរីយ៍ដ៏សម្បូរបែបហើយនោះ ទីប្រជុំជនមួយនេះ ក៏ត្រូវបានគេស្គាល់ថា ជាកន្លែងលក់ឧបករណ៍គ្រឿងបន្លាស់ម៉ាស៊ីនដ៏ធំមួយ និងជាកន្លែងមានម្ហូបអាហារឆ្ងាញ់ផងដែរ។ លោក នៅ សុធារិទ្ធ និស្សិតសាលាភូមិន្ទរដ្ឋបាល ក៏បានស្កាត់មកហូបបាយថ្ងៃត្រង់នៅទីនេះជារឿយៗ។
ពាក់អាវសទីនុយជាមួយខោខ្មៅ លោក នៅ សុធារិទ្ធ ដែលមាន៣៨ឆ្នាំ បានបរិយាយយ៉ាងដូច្នេះ៖ «ខ្ញុំមកញឹកញាប់ដែរ។ ខ្ញុំរៀននៅសាលាអឺរ៉ា(ភូមិន្ទរដ្ឋបាល) តែខ្ញុំមកញាំបាយនៅទីនេះញឹកញាប់ដែរ ព្រោះនៅទីនេះ មានម្ហូបច្រើន។ ហើយនៅពេលញ៉ាំបាយហើយ សល់ម៉ោងខ្ញុំដើរលេង»។
ផ្សារទួលទំពូង មានតូបចំនួន១៣៧៤តូប។ នេះបើតាមការបញ្ជាក់របស់ លោក សូ ប៉ូច គណៈកម្មការផ្សារទួលទំពូង។ បើតាមលោក សូ ប៉ូច ផ្សារទួលទំពូង ត្រូវបានបង្កើតឡើងនៅក្នុងអំឡុងឆ្នាំ១៩៥៣ ប៉ុន្តែ ភ្ញៀវទេសចរបរទេសភាគច្រើន មិនសូវស្គាល់ឈ្មោះផ្សារទួលទំពូងឡើយ។ ប៉ុន្តែ ពួកគេបែរជាស្គាល់ផ្សារនេះថា ជាផ្សាររុស្សីទៅវិញ។ លោកពន្យល់ថា មូលហេតុដែលពួកគេហៅផ្សារនេះថា ជាផ្សាររុស្សី ព្រោះនៅពេលរុស្សីដាក់ទូតនៅកម្ពុជា ពេលនោះមានជនជាតិរុស្សីជាច្រើនចូលចិត្តមកផ្សារទួលទំពូង ហេតុនេះហើយ ទើបភ្ញៀវទេសចរអន្តរជាតិ តែងតែហៅផ្សារនេះតៗគ្នា ថាផ្សាររុស្សី។ បើគណៈកម្មការផ្សារទួលទំពូងដដែល ផ្សារទួលទំពូង នឹងមិនមានការអភិវឌ្ឍន៍អ្វីឡើយ ដោយនៅតែរក្សាទម្រង់ដើម ដើម្បីទាក់ទាញភ្ញៀវទេសចរជាតិ និងអន្តរជាតិឲ្យស្គាល់បានកាន់តែច្រើន៕