ONE Championship
កីឡាជាតិ
ជាតិ
Brice Delval នឹងធ្វើឲ្យម្ចាស់ខ្សែក្រវាត់ Nong-O ខកចិត្តនៅវៀតណាម
×
អត្ថបទ៖ ស៊ីធី
Brice Delval រហស្សនាម «The Truck » ជឿជាក់ថា អាចធ្វើឲ្យម្ចាស់ខ្សែក្រវាត់ Nong-O Gaiyanghadao ខកចិត្តនៅសង្វៀន ONE: IMMORTAL TRIUMPH ដែលរៀបចំនៅប្រទេសវៀតណាមលើកដំបូង។ នៅថ្ងៃសុក្រទី៦ ខែកញ្ញា ខាងមុខម្ចាស់ខ្សែក្រវាត់ S1 Muay Thai World Champions សញ្ជាតិអាល់ហ្សេរី នឹងសាកល្បងសមត្ថភាពដ៏ខ្លាំងក្លាក្នុងអាជីពនៅក្រុងហូជីមិញពេលជួប ជើងខ្លាំងថៃ Nong-O Gaiyanghadao ដើម្បីប្រជែងយកខ្សែក្រវាត់ ONE Bantamweight Muay Thai World Title។
កីឡាករវ័យ២០ឆ្នាំបានថ្លែងថា ៖«គូប្រកួតរបស់ខ្ញុំ គឺលំដាប់ពិភពលោក។ គេជាកីឡាករដ៏អស្ចារ្យម្នាក់ ហើយមិនទាន់ចាញ់សោះក្នុងប្រភេទទម្ងន់នេះ។ គេមានអាជីពល្អបំផុតនៅប្រទេសថៃ និងជាជើងឯក ៤ សម័យកាលរបស់សង្វៀន Lumpinee , និង Rajadamnern។ គេប្រកួតជាមួយជើងខ្លាំងបំផុតជាច្រើន។ ខ្ញុំមានកិត្តិយសដែលបានប្រកួតជាមួយគាត់»។
«ខ្ញុំគិតថា Nong-O ជំនាញខាងទាត់និងវ៉ៃខាវ ។ គេជាកីឡាករប្រដាល់ដ៏មានថាមពលខ្លាំងក្លា។ វាជាប្រកួតដ៏តានតឹង តែខ្ញុំបានហ្វឹកហាត់ត្រៀមសម្រាប់ការប្រកួតនេះ។ ខ្ញុំត្រៀមរួចរាល់ហើយ»។ ជើងខ្លាំងមកពីអាល់ហ្សេរី បញ្ជាក់បែបនេះ។
វីដេអូខ្សែជីវិត Delval ៖
VIDEO
Delval បានលើកសរសើរដល់ក្លិប Mahmoudi Gym ដែលបានបណ្ដុះបានធនធានតារាលេចធ្លោនៅ ONE Super Super Series គឺ Elias Mahmoudi។ Delval កំពុងតែបង្កើតកំណត់ល្អមួយដោយឈ្នះ ៣០ ដង និង ចាញ់ត្រឹម ៥ ដងក្នុងនាមជាកីឡាករវ័យក្មេង។ កីឡាករសញ្ជាតិអាល់ហ្សេរីមានទំនុកចិត្តខ្ពស់ក្រោយទទួលការហ្វឹកហាត់ពីគ្រូបង្វឹក និង ជឿជាក់ថាគេអាចទទួលបានជ័យជម្នះនាពេលខាងមុខ។
ទោះបីជា Nong-O មានចំណុចខ្លាំង ប៉ុន្តែ Delval សន្យាដល់អ្នកគាំទ្រថានឹងសម្រុកដើម្បីវាយដៃគូឲ្យសន្លប់នៅលើសង្វៀន។ «ខ្ញុំធ្លាប់មើលការប្រកួតជាជាច្រើនរបស់ Nong-O តាមអ៊ិនធឺណិត ។ គេពិតជាល្អខ្លាំងទល់នឹងជើងខ្លាំងនានា។ ខ្ញុំមើលសឹងមិនឃើញចំណុចខ្សោយ និងគេចេះបត់បែនតាមកាលៈទេសៈពេលជួបគូប្រកួត។ ប៉ុន្តែគុណសម្បត្តិរបស់ខ្ញុំ គឺមានប្រៀបលើកម្ពស់ និង ការប្ដេជ្ញាចិត្តរបស់ខ្ញុំ។ ហើយខ្ញុំមានគ្រូបង្វឹកល្អៗ ដែលជួយជ្រោមជ្រែងការប្រកួត និងរៀបចំគម្រោងរបស់ខ្ញុំ។ ខ្ញុំនឹងប្រកួតឲ្យល្អបំផុត។ ខ្ញុំនឹងទទួលលទ្ធផលល្អ»។
វីដេអូ ហាយឡាយ Nong-O និង Delval ៖
VIDEO
កីឡាកររហស្សនាម «The Truck» ឡើងសង្វៀននាដើមខែកញ្ញាខាងមុខជាមួយនឹងភាពវិជ្ជមាន ជាពិសេសភាពវ័យក្មេងជាកម្លាំងដែលអាចរុញច្រានធ្វើឲ្យគេទទួលលទ្ធផលជូនអ្នកគាំទ្រ។ «The Truck» ធ្លាប់ឈ្នះគូប្រកួតខ្លាំងៗថៃជាច្រើននាពេលកន្លងមក ហើយគេរំពឹងថាធ្វើឲ្យពិភពលោកភ្ញាក់ផ្អើល។
ជើងខ្លាំងវ័យ ២០ ឆ្នាំសង្កត់ធ្ងន់ថា ៖«វានឹងធ្វើឲ្យខ្ញុំសប្បាយរីករាយដែលមានគូប្រកួតដ៏អស្ចារ្យ និងប្រកួតដើម្បីដណ្ដើមខ្សែក្រវាត់នៅ ONE Championship។ ហើយរឿងពិសេសនោះជាការប្រកួតដំបូងរបស់ខ្ញុំ។ ខ្ញុំនឹងធ្វើរឿងគ្រប់យ៉ាងដើម្បីឈ្នះការប្រកួត ទោះ Nong-O ល្អ តែខ្ញុំនឹងធ្វើឲ្យល្អជាង»។
© រក្សាសិទ្ធិដោយ thmeythmey.com